Sponsored Links
Sponsored Links
Penmai eMagazine September! | All Issues

User Tag List

Like Tree2Likes
  • 1 Post By ahilanlaks
  • 1 Post By Strawberry

விதைகள் ஆயுதமானால் வாழ்வே சூன்யமாகும்!


Discussions on "விதைகள் ஆயுதமானால் வாழ்வே சூன்யமாகும்!" in "Health" forum.


  1. #1
    ahilanlaks's Avatar
    ahilanlaks is offline Ruler's of Penmai
    Real Name
    Athilakshmi Ahilan ( Bhuvana )
    Gender
    Female
    Join Date
    Mar 2015
    Location
    Chennai
    Posts
    12,408

    விதைகள் ஆயுதமானால் வாழ்வே சூன்யமாகும்!

    விதைகள் ஆயுதமானால் வாழ்வே சூன்யமாகும்!

    நன்றி குங்குமம் டாக்டர்

    எச்சரிக்கை - பன்னாட்டு நிறுவனங்களின் பகாசுர யுத்தம்


    மனித இனம் தோன்றிய காலந்தொட்டே மனிதனுக்கும் ஆயுதங்களுக்குமான உறவு தொடங்கி விட்டது. வில், வாள், துப்பாக்கி, பீரங்கி, ஏவுகணை என இந்த பரிணாம வளர்ச்சியில் இன்றைக்கு உலகையே அச்சுறுத்திக் கொண்டிருக்கும் ஆயுதம் ‘அணுகுண்டு’. பொருளாதாரத்தை விட அணு ஆயுத பலம் கொண்டிருக்கும் நாடுகளே இன்றைக்கு வலிமையான நாடுகளாக கருதப்படுகின்றன.

    ஆனால், இந்த அதிபயங்கரமான அணுகுண்டை விடவும் கொடிய ஆயுதம் ஒன்றுண்டு. அவை ‘விதைகள்’. போரின் நோக்கம் உயிர்களை அழிப்பதல்ல... ஒரு நாட்டின் மக்கள் மற்றும் வளங்களை தன் வசப்படுத்திக் கொள்வதுதான். ஒரு நாட்டின் பாரம்பரிய விதைகளை அழித்து பன்னாட்டு நிறுவனங்களின் விதைகளைப் பரப்புவதன் மூலம், விவசாயிகள் தங்களது தற்சார்பை இழந்து, விதை நிறுவனங்களைச் சார்ந்து வாழ வேண்டிய நிலை ஏற்படும்.

    அச்சூழல் உருவாகினால், ஒரு நாட்டின் உணவு உற்பத்தியையே தீர்மானிக்கும் சக்தியாக விதை நிறுவனங்கள் உருமாறிவிடும். ஆகவேதான் விவசாய, பொருளியல் அறிஞர்கள் இதனை ‘உயிரியல் போர்’ என்று குறிப்பிடுகின்றனர். விதைகளே இப்போரின் ஆயுதங்களாக இருக்கின்றன.

    வியாபார அரசியல்... விபரீத விளைச்சல்...

    1997ம் ஆண்டு வெளியான ‘உயிரியல் புரட்சியின் ஒடுக்குமுறைகள்’ எனும் நூலின் மூலம் விவசாயத்தின் மீது நிகழ்த்தப்படும் பன்னாட்டு நிறுவனங்களின் அரசியல் குறித்துக் கூறிய எழுத்தாளர் பாமயனிடம் இது பற்றிப் பேசினோம்... "பன்னாட்டு நிறுவனங்களைப் பொறுத்த வரை எந்த நாடும் அவர்களுக்குச் சொந்த நாடு கிடையாது. எல்லா நாடுமே அவர்களுக்குச் சொந்தம். எங்கும் சுரண்டுவார்கள், எங்கும் கடை விரிப்பார்கள். பணப் பொருளாதாரத்தை முற்றிலுமாக ஓரிடத்தில் குவிப்பது மட்டுமே அவர்களுடைய நோக்கம். ஒரு நாட்டின் இறையாண்மை வேளாண்மையில் இருக்கிறது. வேளாண்மையின் இறையாண்மை விதைகளில் இருக்கிறது. பல நூறு ஆண்டுகளாக விவசாயிகள் பாதுகாத்து வந்த விதைகள், பசுமைப்புரட்சியின்போது அரசு மற்றும் தனியார் நிறுவனங்களின் கைகளுக்குச் சென்றது.

    பாரம்பரிய ரகங்களை மறுத்து ஆய்வுக்கூடத்தில் உருவாக்கப்பட்ட விதைகளைக் கொண்டு விவசாயம் புரிய விவசாயிகள் நிர்ப்பந்திக்கப்பட்டார்கள். அந்த விதைகள் ரசாயன உரங்கள் மற்றும் பூச்சிக்கொல்லிகளின் தயவில்தான் வளரும். விதைகளை உருவாக்க பண உதவி புரிந்த நிறுவனங்கள்தான் உரம் மற்றும் பூச்சிக்கொல்லியைத் தயாரித்தன. இதிலிருந்தே பசுமைப்புரட்சிக்குப் பின்னர் இருக்கும் லாப நோக்கிலான வியாபார அரசியலைப் புரிந்து கொள்ள முடியும். இந்தியா மிகப்பெரிய விதைச்சந்தையைக் கொண்டிருக்கிறது. இதனால் பன்னாட்டு விதை நிறுவனங்களின் மிக முக்கியமான இலக்காக இந்தியா இருந்து வருகிறது. பூச்சித்தாக்குதலை சமாளிக்க முடியாமல் பூச்சிக்கொல்லிக்காகவே அதிகம் செலவு செய்து நொந்து போனவர்கள் பருத்தி விவசாயிகள்.

    அப்படியான சூழலில், ‘பூச்சிக்கொல்லியே தேவையில்லை’ எனக்கூறி, பூச்சியை எதிர்க்கும் திறன் கொண்ட விதைகள் என மரபீனி மாற்ற பி.டி. பருத்தி விதைகளைக் கொண்டு வந்தன. அடுத்ததாக பி.டி. கத்தரிக்காய் கொண்டு வருவதற்கென மேற்கொள்ளப்பட்ட முயற்சி மக்கள் போராட்டத்தால் முறியடிக்கப்பட்டது. மரபீனி மாற்ற பருத்தி விதையைக் கொண்டு வந்ததன் மூலம் விதை நிறுவனங்கள் பல்லாயிரம் கோடிகளை அள்ளிக்கொண்டன. தொடக்கத்தில் 10 சதவிகிதம் மட்டுமே மரபீனி மாற்ற பருத்தி பயிரிடப்பட்டது. கடந்த பத்தாண்டுகளிலோ அதன் பயன்பாடு 90 சதவிகிதமாக உயர்ந்திருக்கிறது. மரபீனி மாற்ற பருத்தி விதைகளை விளைவிக்கத் தொடங்கியவர்கள் பாரம்பரிய நாட்டு ரக பருத்தி விதைகளை சேமிக்கத் தவறி விட்டனர்.

    ஆகவே, இன்றைக்கு இந்திய பருத்தி விவசாயத்தின் குடுமி மன்சாண்டோ எனும் விதை நிறுவனத்தின் கையில் இருக்கிறது. பருத்திக்கு ஏற்பட்ட இதே நிலைமை முக்கியமான உணவுப் பயிர்களுக்கும் ஏற்பட்டால் என்ன ஆகும்? வேளாண் உற்பத்தியே மன்சாண்டோ, சிஞ்செண்டா, டூபாண்ட் போன்ற பன்னாட்டு விதை நிறுவனங்களைச் சார்ந்து மேற்கொள்ளப்படும்போது, நாட்டின் இறையாண்மை என்னவாகும்? அப்படியானதொரு நிலைக்குக் கொண்டு வருவதற்கான வேலை சத்தமே இல்லாமல் நடந்து கொண்டிருக்கிறது. இனியும் நாம் விழிப்படையவில்லை என்றால், விதை நிறுவனங்களின் வசம் நமது விவசாயம் அகப்பட்டுக் கொள்ளும். இந்தியாவில் என்ன பயிரிட வேண்டும் என்பதை அந்நிறுவனங்களே தீர்மானிக்கும் கதிக்கு ஆளாக வேண்டி வரும்.

    அந்நிறுவனங்கள் விதை விற்பனையை நிறுத்தி உணவுத்தட்டுப்பாட்டை ஏற்படுத்த இயலும். இதன் மூலம் ஆயுதப்போர் நிகழ்த்தாமலேயே ஒரு நாட்டைக் கைப்பற்ற முடியும். அரசின் விவசாயக் கொள்கைகள் இந்திய இறையாண்மையைக் காப்பாற்றுவதாக இல்லை. அரசியல் மாற்றம் கோருவது முக்கியமானது என்றாலும், மக்களாகிய நாம் தெளிவடைந்து முன்னெடுக்க வேண்டிய பணிகள் இருக்கின்றன. விவசாயிகளே ஒன்றிணைந்து விதை வங்கிகளை உருவாக்க வேண்டும். விதைத்திருவிழாக்கள் மூலம் விதைகள் குறித்த விழிப்புணர்வை பரவலாக ஏற்படுத்த வேண்டும். குல தெய்வ வழிபாடு போல ஒவ்வொருவரும் குறிப்பிட்ட விதைகளை பாதுகாத்து அடுத்த தலைமுறைக்குக் கொடுத்து செல்ல வேண்டும். விதைகளை காப்பாற்றும்/மீட்டெடுக்கும் பணிகளை பல தன்னார்வ அமைப்புகளும் மனிதர்களும் மேற்கொண்டு வருகிறார்கள். இது போன்ற ஆரோக்கியமான செயல்பாடுகளும், விதைகள் குறித்த விழிப்புணர்வுமே இன்றைய தேவையாக இருக்கிறது’’ என்கிறார் பாமயன்.

    மரபீனி மாற்று விதைகளின் ஆதிக்கம் மேலோங்கினால் நமது விவசாயம் எத்தகைய சீரழிவுக்கு ஆளாகும்? விளக்குகிறார் இயற்கை வேளாண் செயற்பாட்டாளர் இளங்கோ கல்லாணை... "உலகில் வாழும் ஒவ்வொரு உயிரும் வாழ்தலுக்கான தகவுகளைக் கொண்டிருக்கும். வறட்சி, வெள்ளம் போன்ற பேரிடர்களைத் தாங்கி வளரக்கூடிய தகவு பாரம்பரிய விதைகளுக்கு இருக்கிறது. உயிரியல் தொழில்நுட்பம் என்றைக்கு விவசாயத்துக்குள் நுழைந்ததோ, அன்றிலிருந்தே அதன் அழிவு தொடங்கி விட்டது. அந்தந்த பகுதியின் தட்பவெப்ப நிலைக்குத் தகுந்தாற்போன்ற பயிர்களும் பல ரகங்களும் இயற்கையாகவே இருக்கின்றன. அதனை மறுத்து குறிப்பிட்ட விதை ரகங்களுக்குள் விவசாயத்தைச் சுருக்கியதுதான் பிரச்னையே.

    உலகம் முழுவதும் மரபீனி மாற்று விதைகளைத் திணிக்கும் பணியை பன்னாட்டு விதை நிறுவனங்கள் மேற்கொண்டு வருகின்றன. பில்கேட்ஸ் கூட மான்சாண்டோ நிறுவனத்தில் முதலீடு செய்திருக்கிறார். உலக அரசியலையே தீர்மானிக்கும் சக்திகளாக விதை நிறுவனங்கள் இன்றைக்கு வளர்ந்து
    நிற்கின்றன. விவசாயத்தை லாபம் தரும் தொழிலாக மட்டுமே கொண்டு செல்வதுதான் இவர்களின் நோக்கம். மரபீனி மாற்று விதைகளைப் பயிர் செய்யும் நிலையில் நடவு தொடங்கி அறுவடை வரையிலும் அந்நிறுவனங்கள் சொல்வதைத்தான் பின்பற்ற வேண்டி வரும். காலங்காலமாக நம் முன்னோர் நமக்கென விட்டுச்சென்ற விவசாய முறைகள் அத்தனையும் பயனற்றுப் போகும்.

    எல்லா உற்பத்திகளையும் போல் விவசாய உற்பத்தியையும் தொழிற்சாலைமயமாக்கும் பணியைத்தான் இவர்கள் மேற்கொள்கிறார்கள். 50 கிராமில் சோப்பு தயாரித்து விற்பதைப்போல வகுத்து வைக்கப்பட்ட அளவு/காலத்துக்குள் விளை பொருட்களையும் உற்பத்தி செய்வார்கள். அதற்கு உயிரித்தொழில்நுட்பம் துணை புரியும். அந்தந்தப் பகுதிகளுக்கான பயிர் உற்பத்தி என்பதை மறுத்து பரவலாக ஒரே ரகப் பயிர்களை மட்டும் விளைவிக்கும் ஒருமைக்கலாசாரம் பின்பற்றப்படும். விவசாயிகளுக்கு ஆதரவாக இல்லாத அரசியல்/சந்தை சூழலை உருவாக்கி விவசாயிகளை விவசாயத்தை விட்டு வெளியேற்றுவார்கள். பன்னாட்டு நிறுவனங்களின் வசம் விவசாய நிலங்கள் வந்த பிறகு, இயந்திரங்களைக் கொண்டே விவசாயம் புரிவார்கள்.

    உதாரணத்துக்கு பஞ்சாப் மாநிலத்தில் பெப்சி நிறுவனம் மேற்கொள்ளும் ஆரஞ்சு உற்பத்தியைக் கூற முடியும். மரபீனி மாற்ற ஆரஞ்சு மரங்களில் ஒரே நேரத்தில், ஒரே அளவில் பூ பூத்து காய் காய்க்கும். இயந்திரமயப்படுத்துவதற்கான ஒழுங்கான கட்டமைப்பை மரபீனி மாற்றம் மூலம் கொண்டு வந்துள்ளதன் விளைவுதான் இது. மரபீனி மாற்ற விதைகள் என்பது முற்றிலும் இயற்கைக்கும் நமது நாட்டின் இறையாண்மைக்கும் எதிரானது. பாரம்பரிய விவசாயத்தினால்தான் விவசாய உற்பத்தி குறைந்துள்ளது என்று தவறான பரப்புரைகள் மேற்கொள்ளப்படுகின்றன. உண்மையில் விவசாய உற்பத்திக் குறைவுக்கு நகர்மயமாதல்தான் காரணம். போலியான பரப்புரைகளை புறந்தள்ளி விட்டு நமது பாரம்பரிய இயற்கை விவசாயத்தை முன்னெடுப்பதன் மூலம் மட்டுமே நமது எதிர்கால சந்ததியை வளமானதாக உருவாக்க முடியும்’’என்கிறார் இளங்கோ கல்லாணை.

    மறையுது மருத்துவ குணம்... குறையுது நம்பிக்கை...

    இப்பிரச்னை அரசியல் மற்றும் வாழ்வாதாரப் பிரச்னை மட்டுமல்ல உடல் நலத்திலும் மிக மோசமான விளைவுகளை ஏற்படுத்தும் என்கிறார் சித்த மருத்துவர் திருநாராயணன்..."இன்றைக்கு இந்தியாவின் உணவுப் பயன்பாட்டில் 35 சதவிகித உணவுப்பொருட்கள் வெளிநாடுகளில் உற்பத்தி செய்யப்பட்டு இறக்குமதி
    செய்யப்படுகின்றன. அந்தந்த பகுதிகளில் விளைபவையே அந்தந்த பகுதிகளில் வாழும் உயிரினங்களுக்கானது என்பதே இயற்கையின் கூற்று. மலேசியாவில் இருந்து பாமாயில், சீனாவிலிருந்து பூண்டு, தென் அமெரிக்க நாடுகளின் இஞ்சி விதைகளை நம் நாட்டுக்கு கொண்டு வருவதற்கான தேவையே இல்லை. அன்றாடம் பருகும் காபியின் தாயகம் அரேபியா, தேநீரின் தாயகம் சீனா. இப்படியான வேற்று நாட்டு உணவுப் பொருட்களின் ஆதிக்கம் தழைத்தோங்கும்போது நமது பாரம்பரிய உணவுப் பொருட்களை இழந்து விடுகிறோம்.

    சித்த மருத்துவ நூல்களிலேயே மருத்துவ குணம் வாய்ந்த நெல் ரகங்கள் குறிப்பிடப்பட்டிருக்கிறது. ரத்த சர்க்கரை அளவைக் கட்டுப்படுத்தும், ரத்த சோகையைப் போக்கும், தாய்ப்பால் சுரப்பை அதிகரிக்கும் நெல் ரகங்கள் இருக்கின்றன. இப்போதோ, அரிசி சாப்பிடுவதே தவறு என்கிற கருத்தை பரப்பிக் கொண்டிருக்கிறார்கள். இப்படியாக மருத்துவ குணம்மிக்க உணவுப் பொருட்களை எல்லாம் இழந்து, ரசாயனத்தினால் மேற்கொள்ளப்படும் விவசாய உற்பத்தியால் ஏற்பட்டிருக்கும் விளைவு அபாயகரமானது. தமிழகத்தில் 17 சதவிகிதம் பேர் நீரிழிவுக்கும், 10 சதவிகிதம் பேர் ரத்தக்கொதிப்புக்கும் ஆளாகி இருக்கிறார்கள். புற்றுநோயாளிகளின் எண்ணிக்கையும் சிறுநீரகச் செயலிழப்பும் இன்றைக்கு அதிகரித்திருப்பதற்கான காரணம் நஞ்சு கலந்த நமது உணவுகள்தான்.

    மரபீனி மாற்று விதைகள் நமக்குத் தெரியாமலேயே இந்தியாவில் மறைமுகமாக காலூன்றியிருக்கின்றன. வீரிய ஒட்டு ரகம் என நாம் நினைத்துக் கொண்டிருக்கும் பலவற்றில் மரபீனி மாற்றம் செய்யப்பட்டிருக்கிறது. தொற்றாநோய்கள் அத்தனையையும் மரபீனி மாற்று விதைகள் ஏற்படுத்துகின்றன. மரபீனி மாற்ற உணவுப்பொருட்களை உட்கொள்ளும்போது ஏற்படும் உடல் நலப் பாதிப்புகள் குறித்து பல நாடுகள் ஆய்வு மேற்கொண்டுள்ளன. மரபீனி மாற்ற விவசாயம் மனித இனம்/சூழலை சிதைத்து விடும் என்பதை அந்த ஆய்வுகள் நிரூபித்ததன் காரணமாக பல நாடுகள் அதனைத் தடை செய்திருக்கின்றன. மரபீனி மாற்றம் என்பது அறிவியல் தொழில்நுட்பத்தின் ஒரு படி என்று சொல்வார்கள் எனில், நாம் அறிவியலுக்கு எதிரானவர்கள் அல்ல. மரபீனி மாற்ற விதைகள் முற்றிலும் பாதுகாப்பானவை என நடுநிலைமையோடு மேற்கொள்ளப்படும் ஆய்வுகளில் நிரூபிக்கப்படும் வரையிலும் நாம் அதனை எதிர்த்துதான் ஆக வேண்டும்’’ என்கிறார் திருநாராயணன்.

    அறிவை இழந்தோம்... ஆற்றலையும் இழக்கிறோம்...

    நமது பாரம்பரிய விதைகளின் சிறப்பு மற்றும் அது பாதுகாக்கப்பட்ட விதம் குறித்து விளக்குகிறார் தமிழகத்தின் பாரம்பரிய நெல் ரகங்களை மீட்டெடுக்கும்
    பணியில் தீவிரமாக இயங்கி வரும் நெல் ஜெயராமன்... "நமது முன்னோர் நமக்கு அளித்துச் சென்ற பத்தாயிரத்துக்கும் மேற்பட்ட நெல் ரகங்கள் மற்றும் பல வகையான காய், பழ வகைகள் மற்றும் அரு(சிறு)ந்தானியங்களையும், பாரம்பரிய அறிவையும் நாம் பெரிய அளவில் இழந்து விட்டோம். திருமணத்துக்கு முன்பாக மாப்பிள்ளை சம்பா, திருமணத்துக்குப் பின் கருப்புகவுணி, மகப்பேறு காலத்தில் பூங்கார், குழந்தை பிறந்த பிறகு பால்குட வாழை, குழந்தை வளர்ந்ததும் முதல் உணவாக குள்ளகார், வாடன்சம்பா என அரிசி வகைகளை சாப்பிட வேண்டிய காலங்களைக் கூட வகுத்துச் சென்றிருக்கின்றனர்.

    விதைகளை பாதுகாத்து அடுத்த தலைமுறைக்குக் கைமாற்றிக் கொடுப்பதை தங்களது தலையாயப் பணியாகச் செய்தனர். வைக்கோல் மூலம் கோட்டை கட்டி அதனுள் விதை நெல்லைக் கொட்டி வைக்கோலைச் சுற்றிலும் சாணம் பூசி பாதுகாத்து வந்தார்கள். காய்கறி விதைகளை சாணத்துக்குள் கலந்து மண் சுவரில் அடித்துக் காய வைத்து பாதுகாத்தார்கள். வெள்ளமே வந்தாலும் அருந்தானியங்கள் அழிந்து விடக்கூடாது என்பதற்காக, கோயில் கோபுரக் கலசங்களில் கும்பாபிஷேகத்தின் போது வரகு தானியத்தை வைத்து பாதுகாத்தனர். அப்படி வைக்கப்படும் தானியம் அடுத்த கும்பாபிஷேகம் வரையிலும் 12 ஆண்டுகள் ஆனாலும் முளைப்புத் திறன் குறையாமல் இருந்து வந்துள்ளது. இப்படியாக நமது முன்னோர் தங்களது அனுபவ அறிவின் மூலம் பாதுகாத்து நமக்கு அளித்துச் சென்ற விதைகளை நாம் இழந்து கொண்டிருக்கிறோம். பாரம்பரிய விதைகளை மீட்டெடுத்து அதன் மூலம் இயற்கை வழியிலான வேளாண்மையை பரவலாக முன்னெடுக்கும் நிலையில்தான் விவசாயத்தில் தற்சார்பை சாத்தியப்படுத்த முடியும்’’என்கிறார் நெல் ஜெயராமன்.


    Similar Threads:

    Sponsored Links
    Strawberry likes this.
    ​Bhuvana Ahilan

    Love Makes Life Beautiful

  2. #2
    Strawberry's Avatar
    Strawberry is offline Citizen's of Penmai
    Real Name
    ishu
    Gender
    Female
    Join Date
    May 2016
    Location
    srilanka
    Posts
    656

    Re: விதைகள் ஆயுதமானால் வாழ்வே சூன்யமாகும்!

    Tfs:

    ahilanlaks likes this.
    Ishu..
    Ur Dream Is Ur Signature..

loading...

Bookmarks

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  
Like It?
Share It!







Follow Penmai on Twitter