Sponsored Links
Sponsored Links
Penmai eMagazine December! | All Issues

User Tag List

Like Tree4825Likes

Today's Medical Info


Discussions on "Today's Medical Info" in "Health" forum.


  1. #1531
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்
    எச்சிலால் ஏற்படும் கிருமித் தொற்று!

    இன்று பெரும்பாலான மக்கள் தங்கள் உமிழ்நீரை விரல்களால் தொட்டு ரூபாய் நோட்டுகளை எண்ணுவது, பேருந்து நடத்துநர்கள் உமிழ்நீரால் விரல்களை நனைத்து டிக்கெட் விநியோகம் செய்வது, மாணவர்களும் ஆசிரியர்களும் விரல்களை உமிழ்நீரில் தோய்த்து புத்தகங்களின் பக்கங்களைப் புரட்டுவது, சூப்பர் மார்க்கெட்களில் பாலிதீன் கவர்களைப் பிரிப்பதற்காக உமிழ்நீரில் தொட்ட விரல்களைப் பயன்படுத்துவது போன்ற ஆரோக்கியக் குறைவான செயல்களில் ஈடுபடுகிறார்கள். எச்சிலால் ஏற்படும் கிருமித் தொற்றுகளால் உண்டாகும் வியாதிகள் பற்றி ஆயுர்வேதம் என்ன கூறுகிறது?
    எஸ்.அனந்தராமன், புட்டபர்த்தி.


    நோய்கள் ஏற்படுவதற்கான காரணத்தை நிஜம் என்றும் ஆகந்துகம் என்றும் இருவகையாக ஆயுர்வேதம் குறிப்பிடுகிறது. தவறான உணவு அல்லது செய்கையால் உடல் உட்புற தோஷங்களாகிய வாத, பித்த கபங்கள் சீற்றமடைந்து தாதுக்களையும் மலங்களையும் கேடு அடையச் செய்து நோய்களை உருவாக்குவது "நிஜம்' என்றும், வெளிப்புறக் காரணங்களாகிய பூதம், விஷம், வாயு, காயம், முறிவு முதலியவற்றால் தோன்றுபவையும், காமம், குரோதம், பயம் முதலிய மனம்சார்ந்த காரணங்களால் தோன்றுபவையுமான எல்லா நோய்களும் "ஆகந்துக'மென்றும் குறிப்பிடுகிறது. நீங்கள் குறிப்பிடும் வகை "ஆகந்துகம்' என்ற வகையைச் சேர்ந்ததாகும்.
    கைக்கு கை மாறும் பணத்தில் கண்களுக்குப் புலப்படாத எண்ணற்ற கிருமிகளும் அழுக்குகளும் இருக்கும்நிலையில், கைவிரலை உமிழ்நீரில் நனைத்து எண்ணி, மறுபடியும் அதே விரலை வாயிலுள்ள உமிழ்நீரில் நனைத்தால், ரூபாய் நோட்டுகளிலுள்ள அழுக்குகளும் கிருமிகளும் வாயினுள்ளே வந்து சேர்ந்து விடும். வயிற்றுப் பகுதிக்கு அரணாக, வாயினுள் அமைந்துள்ள எச்சில் சுரப்பிகள், ருசி கோளங்கள், டான்சில், அடினாய்டு, உள்நாக்கு, பற்கள் போன்ற பகுதிகளை இந்தக் கிருமிகளும், அழுக்குகளும் தாக்கக் கூடிய ஆபத்தை வீணாக வரவழைத்துக் கொள்ளும் தவறான பழக்கமாகும் இது. ஏதேனும் வழியாக அவை மூளைப் பகுதிக்குச் சென்றுவிட்டால் மூளையைக் கவசம் போல் பாதுகாக்கும் சவ்வுப் பகுதியில் தாக்கினால், கடுமையான மூளை உபாதைகளைச் சந்திக்க வேண்டி வரும். சுரப்பிகள் தடித்து வீங்கிச் செயலாற்றும் திறன் குன்றிப் போவதால் ஏற்படும் உபாதைகளை நீக்குவதற்காக கடும் உணவுக் கட்டுப்பாடும் இருக்க வேண்டிய நிலை ஏற்படும். வயிற்றினுள் சென்றுவிட்டால் இனம் புரியாத வலி, வாந்தி, பேதி போன்ற உபாதைகளையும், காய்ச்சல், தோலில் தடிப்பு, அரிப்பு போன்றவற்றையும் ஏற்படுத்தலாம்.
    இதற்கு மாற்று வழியாக, நீரால் நனைத்த பஞ்சு டப்பியை தொட்டு, நோட்டு எண்ணுவதை சில இடங்களில் நீங்கள் பார்த்திருக்கக் கூடும். அமர்ந்து இருக்கக் கூடியவர்களுக்கு இதை எளிதாகச் செய்ய முடியும் நடத்துநர், சூப்பர் மார்க்கெட்டில் வேலை செய்பவர்கள் இதை ஒரு சிறிய வடிவத்தில் கழுத்திலிருந்து கட்டித் தொங்கவிட்டு, அதன் மூலம் ரூபாய் நோட்டுகளையோ, பாலிதீன் கவர்களையோ தொட்டு அவற்றைப் பிரித்துக் கொடுத்தால் அவர்களுக்கு நோய் பரவாமல் தடுக்க முடியும் என்பது மட்டுமல்ல, அதை வாங்குபவருக்கும் அருவருப்பை ஏற்படுத்தாது. இவர்கள் மூலம் மற்றவர்களுக்கு நோய் பரவாமல் தடுக்கவும் முடியும்.
    நீங்கள் குறிப்பிடும் தவறான இந்தச் செய்கையால் நோய்க் கிருமிகளும் அழுக்குகளும் வாயினுள் சென்று அவ்விடத்தில் ஏதேனும் நோய்களைத் தோற்றுவித்தால், "கபளக்கிரஹம்' என்ற ஒரு சிகிச்சை முறையால், உபாதைகளை நம்மால் குறைக்க முடியும் என்று ஆயுர்வேதம் கூறுகிறது. கருங்காலிக்கட்டை, ஆலம்பட்டை, அரசம்பட்டை, அத்திப்பட்டை, இத்திப் பட்டை, வேலம்பட்டை ஆகியவற்றை வகைக்கு 5 கிராம் வீதமெடுத்து, 400 மி.லி. தண்ணீரில் கலந்து, கொதிக்கவிட்டு, 200 மி.லி. ஆனதும், குளிர்ந்த பிறகு, வடிகட்டி வாயினுள் விட்டு, அசைத்துக் குலுக்கித் துப்பி விடுதலுக்கு கபளக்கிரஹம் என்று பெயராகும். சுவையறியாமை, வாயில் உண்டாகும் அழுக்கு, கெட்ட நாற்றம், சுரப்பிகளில் ஏற்படும் கிருமித் தொற்று போன்றவை இதன் மூலம் குணமாகும்.
    அலைபேசியையும், அடையாள அட்டையையும் நாடா மூலம் கழுத்தில் தொங்க விட்டுக் கொள்வது சகஜமாகிப் போன இக்காலத்தில் நீரால் நனைத்த பஞ்சு டப்பியையும் தொங்கவிட்டுக் கொண்டு பயன்படுத்தினால், அதற்கு நல்ல வரவேற்பு பொதுமக்களிடம் இருந்து நிச்சயம் கிடைக்குமே தவிர, யாரும் குறை சொல்லமாட்டார்கள் என்பது உறுதி.
    (தொடரும்)

    எஸ். சுவாமிநாதன், டீன்
    ஸ்ரீஜயேந்திர சரஸ்வதி ஆயுர்வேதக் கல்லூரி,
    நசரத்பேட்டை } 600 123 (பூந்தமல்லி அருகே)
    செல் : 94444 41771


    dinamani 31 March 2013



    Sponsored Links
    jv_66 and Sriramajayam like this.

    "மண்ணில் நல்ல வண்ணம் வாழலாம்"

  2. #1532
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்: குண்டான முகம் இளைக்க..!

    எனக்கு இன்னும் இரண்டு மாதங்களில் திருமணம். வயது 27. என் முகம் குண்டாக உள்ளது. முகம் இளைப்பதற்கு வழி என்ன? கழுத்துப் பகுதி கறுப்பாக உள்ளது. பழைய நிறத்துக்கு வர என்ன செய்வது? திருமண மேடையில் நான் அழகாகக் காட்சி தரவும், எனது திருமணம் இனிதே நடைபெறவும் ஆயுர்வேத மருத்துவம் உதவுமா?
    சந்திரன், ஊர் குறிப்பிடப்படவில்லை


    முகம் வீக்கமாக இருக்கிறதா? அல்லது சதை பருத்து, முகம் தொங்குகிறதா? போன்ற விவரங்கள் முக்கியமானவை. தலையினுள் நீர்க்கோவை ஏற்பட்டு அதனால் முகம் குண்டாயிருந்தால் அது அழகான குண்டல்ல. வைத்தியம் தேவைப்படும். ரத்த சோகையினால் சிலருக்கு முகம் குண்டாகத் தெரியும். மதுபானம் சாப்பிடும் பல ஆண்களுக்கும் முகம் குண்டாகத் தெரிகிறது. இவை அனைத்தும் சரியல்ல.

    கழுத்துப் பகுதி வெயிலில் படும்படி அடிக்கடி வெளியே செல்ல நேர்ந்தால் கறுத்துப் போகும். ரசாயனத் தொழிற்சாலையில் வேலை செய்தாலோ, உரம் தயாரிக்கும் கூடங்களில் வேலை செய்தாலோ, தோல் கறுத்துப் போகும். எண்ணெய் தேய்த்துக் குளிக்கும் பழக்கமின்மை, உணவில் போதுமான அளவுக்குத் தோல் ஊட்டத்தைத் தரும் சத்தில்லாத கறிகாய்களையும், நெய்ப்பில்லாத வறட்சியான உணவுகளையும் சாப்பிடுவது போன்றவற்றாலும் தோல் கறுத்துவிடும். பச்சைப் பயறு, கடலை மாவு போன்றவற்றை முகம் கழுவப் பயன்படுத்தாமல் வறண்ட முகத்தின் மீது, அடிக்கடி சோப் போட்டு முகம், கழுத்தைக் கழுவினாலும், தோல் வறண்டு கறுத்துவிடும். இப்படி பல காரணங்களிருக்க, நீங்கள் எதனால் முகம் குண்டாக இருக்கிறது, கழுத்து கறுப்பாக ஆனது என்பதற்கான விளக்கம் தெரிவிக்கவில்லை.

    இத்தனை இருந்தும் நீங்கள் விரைவில் மாப்பிள்ளையாக மணமேடையில் அமர இருப்பதால், உங்களுக்கு ஏதேனும் வகையில் உதவிட முடியுமா என்று மனம் ஏங்குகிறது. ஏலாதி சூரணம் என்ற பெயரில் ஓர் ஆயுர்வேத மருந்து இருக்கிறது. அதை தயிரின் மேல் நிற்கக் கூடிய தண்ணீரில் கலந்து, முகத்தைத் தண்ணீர் விட்டு அலம்பிய பிறகு, கீழிருந்து மேலாகத் தேய்த்தும், உருட்டி உருட்டித் தேய்த்தும் சுமார் 1/4 - 1/2 மணி நேரம் ஊறிய பிறகு, அலம்பி விடுவது நல்லது. காலையில் 6 மணி முதல் 6.30 மணிக்குள் இந்தச் சிகிச்சையை செய்து கொண்டு விடுவது நல்லது. வெயில் நன்றாக வந்த பிறகு இதைச் செய்து கொள்வது கூடாது. மாலையில் 6 மணி முதல் 6.30 மணிக்குள் காலையில் குறிப்பிட்டது போலவே முகத்தை அலம்பிக் கொள்வது நல்லது.

    கழுத்திலுள்ள கறுப்பு நிறம் மாறி இயற்கை நிறம் பெற ஏலாதி கேர தைலம் எனும் மூலிகை தேங்காய் எண்ணெய்யைப் பூசி அரை மணி நேரம் ஊறிய பிறகு, பச்சைப் பயறு பொடியைக் குளிர்ந்த நீரில் கரைத்து, அந்த எண்ணெய் பிசுக்கை அகற்றப் பயன்படுத்தவும். இதையும் காலை, மாலை என்று இருவேளை செய்து கொள்ளலாம்.

    குங்குமாதி தைலம் எனும் மருந்தை மூக்கினுள் 2 -4 சொட்டுகள் விட்டு உறிஞ்சித் துப்பிவிடுவதும் நல்ல சிகிச்சைமுறைதான். முகத்திலுள்ள பருமன் குறைந்து தோலுக்கு அழகையும் மென்மையையும் வசீகரத்தையும் கூட்டும். காலை, இரவு பல் தேய்த்த பிறகு, மூக்கினுள் விட்டுக் கொள்வது நல்லது. இரவு படுக்கும் முன் இளநீர்க் குழம்பு எனும் கண் சொட்டு மருந்தை ஓரிரு துளிகள் விட்டுக் கொள்வதால், முகத்திலும் கண்களிலும் உள்ள நீர்க்கட்டு ஏதேனுமிருந்தால், அது நீர்த்து வெளியேறிவிடும். இதன் மூலமாகவும் குண்டான முகத்தை மெலிதாக்க முடியும். வாயினுள் அரிமேதஸ் தைலம் 3 -5 மி.லி. விட்டுக் கொப்பளித்துத் துப்புவதால், முகத்தின் உட்புற கன்னத்திலுள்ள தேவையற்ற கொழுப்பைக் குறைத்து குண்டான முகத்தை மெலிதாக்கி அழகுறச் செய்யும்.

    முகத்தை உப்புசமாக்கும் மதுபானம் பழக்கமிருந்தால், அதைத் தவிர்க்கவும். சட்டையிலுள்ள காலர் பொத்தானைக் கொண்டு கழுத்துப் பகுதியை மூடிக் கொண்டு வெயிலில் செல்லவும். உணவில் இனிப்பும் புளிப்பும் தவிர்க்க வேண்டிய சுவைகளாகும். பகல் தூக்கம் கூடாது. இவை அனைத்தும் செய்து வந்தால், திருமணத்தின்போது நீங்கள் அழகாகக் காட்சி தருவீர்கள். நல் வாழ்த்துகள்.

    (தொடரும்)


    By Viswanathan Vj
    dinamani 06 April 2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  3. #1533
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்: முகத்தில் ஏற்படும் கறுப்பு உருண்டை!

    எனக்கு வயது 63. எனக்கு இந்த வயதிலும் முகத்தில் பரு போன்ற கட்டி வருகிறது. அதற்கு வைத்தியம் பார்க்காவிட்டால் அது பெரிய கறுப்பு உருண்டையாக மாறிவிடுகிறது. அயோடின் உப்பு இதற்குக் காரணமாகலாம், அதனால் அதைச் சாப்பிடக் கூடாது என்று தோல் மருத்துவர் கூறிவிட்டார். இதற்கு ஆயுர்வேதம் கூறும் காரணமென்ன? மருந்து என்ன சாப்பிடலாம்?
    ஆர்.பாஸ்கரன், வேளச்சேரி.


    தோலிலுள்ள திசுக்களை அரித்து, கட்டி மற்றும் முகப்பருக்களை ஏற்படுத்தக் கூடிய அயோடின் கலந்த உணவு வகைகளை அதிக அளவில் பயன்படுத்தக் கூடாது என்று தோல் ஆராய்ச்சி நிபுணர்கள் ஒரு கருத்தை வெளிப்படுத்துவதாகக் கூறப்படுகிறது. ஆனால் பலரும் அயோடின் கலந்த உப்பைப் பயன்படுத்தி நன்றாகத்தான் இருக்கிறார்கள். வேண்டுமானால் உங்களைப் போன்ற ஒரு சிலருக்கு ஒவ்வாமையை ஏற்படுத்தலாம். அயோடின் உப்பை நிறுத்திவிட்டால் உங்களுக்கு இந்த பிரச்னை சரியாகிவிடுகிறதா என்பதை நிதானமாக ஆராய்ந்து அறிந்து கொள்வது அவசியம்.

    அதிக உடற்பயிற்சி - உடற்சூடு - ஒவ்வாமை உணவு - குடலில் சஞ்சரிக்கும் வாயு, இந்த நான்கு வகைக் காரணங்களால் உணவுப் பாதை நெடுக, உணவின் செரிமானத்துக்காக பயன்படும் கப, பித்த தோஷங்கள் தமக்கே உரிய இடம் விட்டு, ரக்தம் - மாம்ஸம் - மேதஸ் - எலும்பு- மஜ்ஜை - விந்து மற்றும் தோல் பகுதிகளுக்கு வந்துவிட்டால் அவற்றின் சீற்றத்துக்கு ஏற்றவாறு நோய்களை ஏற்படுத்துகின்றன. தோலின் அடிப்பகுதியில் அமைந்துள்ள கொழுப்புக் கோளங்களில் அவை அடைபடும்போது, தோலின் மேற்பரப்பில் பரு போன்ற கட்டிகளாகவும், சிகிச்சை செய்யாமற் போனால், கறுப்பு உருண்டைகளாகவும் மாறி உபாதைகளை ஏற்படுத்தும்.

    இதுபோன்று அடைந்து கிடக்கும் கெட்டுப் போன கப - பித்த தோஷங்களை அவ்விடத்திலிருந்து உருக்கி நீர்க்கச் செய்து, எந்த வழியாகச் சென்றதோ, அதே பாதை வழியாக குடலுக்குக் கொண்டு வந்து, வாந்தி செய்வித்தோ, பேதி செய்வித்தோ வஸ்தி எனும் எனிமா சிகிச்சை மூலமாகவோ, வெளியேற்றுவது ஒன்றே சிறந்த சிகிச்சையாக ஆயுர்வேதம் கருதுகிறது. உருகிய கப பித்த தோஷங்கள் தலைப்பகுதியில் தங்கினால், நஸ்யம் எனும் மூக்கில் மருந்துவிட்டு வெளியேற்றும் சிகிச்சை சிறந்ததெனக் கூறலாம். குடலுக்கு மறுபடியும் வந்து சேர்ந்த தோஷங்களை வெளியேற்றாமல், அவற்றை உடலின் உட்புறத்திலேயே அடக்கம் செய்துவிடலாம் என்று எண்ணி சிகிச்சை செய்தால், அவைதாம் மறுபடியும் சீற்றமடையச் செய்யும் காரணத்தை எதிர்நோக்கிக் காத்திருக்கும். தகுந்த காரணம் கிடைத்துவிட்டால், மறுபடியும் கிளர்ச்சியுற்று உடலின் மிகவும் ஆழமான பகுதிகளாகிய நரம்பு மண்டலப் பகுதிக்குச் சென்றுவிட்டால், கடுமையான பாதிப்புகளை ஏற்படுத்தக் கூடும். ஆகையால் ஒரு நோயை ஏற்படுத்தும் தோஷங்களை, உடலிலிருந்துப் பிரித்து வெளியேற்றும் சிகிச்சை முறைகளைக் கையாள்வது என்பதை ஆயுர்வேதம் பாராட்டுகிறது. இந்தச் சிகிச்சை முறைகளைத் தாங்கும் சக்தி இல்லாதவருக்கு அடக்கிவிடும் சிகிச்சையை மேற்கொள்ளலாம்.

    அதனால் நீங்கள் இந்த உபாதையை தோற்றுவிக்கக் காரணமாகிய கப - பித்த தோஷங்களை வளரவிடாமல் பார்த்துக் கொண்டால், அதிக பாதிப்பு ஏதும் ஏற்படாமல் இருக்கலாம். உணவில் அதிக இனிப்பு, புளிப்பு, உப்புச் சுவை சேர்க்காமலும், பகல் வேளையில் படுத்து உறங்காமலிருப்பதும் மிகவும் நல்லது. புளிப்பான கெட்டித் தயிர், மாமிச உணவு வகைகள், எண்ணெய்யில் பொரித்த அப்பளம், பஜ்ஜி, போண்டா, வடை, பிஸ்கட் வகையறாக்கள், ஐஸ்கிரீம், முட்டை சேர்த்த கேக், குளிர்பானங்கள், சமோசா, காபி போன்றவற்றைத் தவிர்ப்பது நலம்.

    ஒரு வில்வாதி குளிகை எனும் மாத்திரையை துளசி சாறும் இடித்துக் கலந்து முகத்திலுள்ள பரு போன்ற கட்டிகளின் மீது காலை, இரவு உணவுக்கு முன் பற்று போட்டு, அரைமணி நேரம் வரை ஊற வைத்து துடைத்துவிடவும். தோலின் அடிப்புறத்திலுள்ள விஷ சத்து ஏதேனுமிருப்பின், அதைக் கரைத்து வெளியேற்றிவிடும். இதே குளிகை மருந்தை ஒன்றிரண்டு காலை, இரவு உணவுக்குப் பிறகு, வெந்நீருடன் சாப்பிடலாம். சததெதகிருதம் எனும் ஆயின்ட்மென்டை கட்டிகளின் மீது பூசலாம். இரவில் படுக்கும் முன் சிறிது நேரம் பூசி வைத்திருந்து, துடைத்துவிட்டுப் பின் படுத்துறங்கலாம்.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை - 600 123 (பூந்தமல்லி அருகே) செல் : 94444 41771
    dinamani 13 April 2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  4. #1534
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்: உட்புற வறட்சி... வெளிப்புற வியர்வை!

    என் வயது 41. அடிக்கடி தலைசுற்றல், தண்ணீர் தாகம், பசியின்மை, தூக்கமின்மை, சோர்வு போன்ற உபாதைகளால் அவதிப்படுகிறேன். இவை எதனால் ஏற்படுகின்றன? இந்த உபாதைகள் நீங்கி என் உடல் வலுப்பட ஆயுர்வேதம் உதவுமா?
    சங்கர், சாலிகிராமம்.


    உடலின் உட்புறப் பகுதிகளில் வறட்சியும், வெளிப்புறத்தோல் பகுதியிலிருந்து அதிக வியர்வையும் ஏற்பட்டால் நெய்ப்பு என்னும் எண்ணைப் பசை உடலில் குறைந்துவிடும். வறட்சி மற்றும் வியர்வைப் பெருக்கு ஏற்படக் காரணமாக இருப்பது, உணவு மற்றும் செயல்களில் நெருப்பு - வாயு - ஆகாயம் போன்ற மகாபூதங்களின் சேர்க்கைதான். இவற்றின் வரத்து அதிக அளவில் உள்ள நிலையில் நிலம் மற்றும் நீரின் அம்சம் குறையும்போது, உடல் வேகமாக இளைக்கத் தொடங்கி, நீங்கள் குறிப்பிடும் உபாதைகளும் தோன்றக் கூடும். உட்புற வறட்சி, வெளிப்புற வியர்வை யாருக்கு அதிகரிக்கக் கூடும் என்று ஒரு பட்டியலை ஆயுர்வேதம் தயாரித்திருக்கிறது. நோய்களின் தாக்குதலால் உடல் மெலிந்தவர், மருந்துகளைத் தொடர்ந்து சாப்பிட வேண்டிய நிர்பந்தமுள்ளவர், மதுபானம் செய்பவர், மனதில் மகிழ்ச்சி இல்லாமல் சோகமாகவே இருப்பவர், கனமான சாமான்களைத் தூக்குவதால் சோர்வடைந்தவர், அதிக தூரம் நடந்து செல்பவர், இருமலால் மார்புக் கூடு பலவீனமடைந்தவர், இயற்கையாகவே உடல் வறட்சியாயிருப்பவர் போன்றவர்களுக்கு, நீங்கள் கூறும் உபாதைகள் நன்றாகத் தென்படும்.

    ஆக, நெருப்பு, வாயு, ஆகாயம் எனும் மகாபூதங்களைக் குறைத்து, நிலம் மற்றும் நீரின் அளவு உங்களுக்குக் கூடினால் ஏற்பட்டுள்ள உபாதைகள் குறைய வாய்ப்பிருக்கிறது. மாமிச சூப்பு, பால், சர்க்கரை, நெய், நல்ல உறக்கம், படுக்கையில் சுகமாகப் படுத்திருத்தல், மூலிகை எண்ணைய்த் தேய்ப்பு, குளியல், திருப்தி மற்றும் மகிழ்ச்சி போன்றவற்றின் தொடர் உபயோகத்தினால் உங்களுடைய உபாதைகள் பல குறைந்து விரைவில் குணமாக வாய்ப்பிருக்கிறது. ஏனென்றால் இவை அனைத்தும் நிலம் - நீரின் அளவை உடலில் அதிகரிக்கச் செய்து, நெருப்பு - வாயு - ஆகாயம் ஆகியவற்றைக் குறைத்துவிடுபவை.

    மேற்குறிப்பிட்டவை உடலுக்குச் செய்யும் நன்மைகள் - உடல் வலு கூடும், உடல் போஷணை பெறும். மேற்குறிப்பிட்ட உணவு மற்றும் சிசிச்சை முறைகளை, உங்கள் உடல் உபாதைகள் குணமாகும் வரைதான் செய்ய வேண்டும். அவற்றின் மீது விருப்பம் ஏற்பட்டு, அவற்றையே தொடர்ந்து செய்து கொண்டிருந்தால், உடல் பருமன், சர்க்கரை உபாதை, காய்ச்சல், வயிற்றில் நீர் சேர்தல், பெத்திரம், இருமல், மூச்ச்சை, சிறுநீர்த்தடை, மப்பு நிலை மற்றும் தோல் உபாதைகள் ஏற்படக் கூடும்.

    எளிதில் செரிக்கக் கூடியதும், உடல் போஷணைக்கு உதவக் கூடியதுமான உணவே உங்களுக்குச் சிறந்தது. காலையில் புழுங்கலரிசிக் கஞ்சியுடன், நெய்யும் உப்பும் கலந்து வெதுவெதுப்பாகச் சாப்பிட்டால், உடல் புஷ்டிக்கு ஏற்றதாக இருக்கும். உப்பைத் தவிர்த்து இந்தக் கஞ்சியுடன் நெய்யும் சர்க்கரையும், பாலும் கலந்து வெதுவெதுப்பாகக் காலையில் குடித்தால் அது உடல் ஊட்டத்துக்கும் சுறுசுறுப்புக்கும் ஏற்றதான உணவாகும். மாமிச சூப்பும் கலந்து பருகலாம். மதியம் நல்ல திடமான இனிப்பும் நெய்ப்பும் தரக்கூடிய ஜவ்வரிசி பாயசமும், பருப்பு சாதமும், மோர்க்குழம்பும், தயிர்சாதமும் சாப்பிட உகந்தவை. மாலையில் சிறிது கோதுமை அல்வாவும், இரவில் பால்சாதம், சர்க்கரை கலந்து சாப்பிடவும் ஏற்றவை.

    ப்ருகச்சாகலாதி கிருதம், விதார்யாதி கிருதம், அஸ்வகந்தாதி லேகியம், சியவனப்பிராசம் லேகியம், கூஷ்மாண்ட ரசாயனம், ப்ராம்ஹ ரசாயனம், குமார்யாஸவம், மிருத சஞ்ஜீவனீ போன்ற தரமான ஆயுர்வேத மருந்துகளை ஓர் ஆயுர்வேத மருத்துவரின் அறிவுரைப்படி நீங்கள் சாப்பிட்டு வந்தால், உடல் உபாதைகள் அனைத்தும் குணமாகிவிடும்,. ஆனால் இதில் நீங்கள் மிகவும் கவனமாக இருக்க வேண்டும். இம்மருந்துகளின் சுவையில் நீங்கள் மயங்கித் தொடர்ந்து சாப்பிடாமல், உபாதைகள் குணமானதும் நிறுத்திவிடுவது மிகவும் நல்லது.

    (தொடரும்)


    By எஸ். சுவாமிநாதன், டீன்
    dinamani 20 April 2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  5. #1535
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்: எவ்வளவு தண்ணீர் குடித்தாலும் நாக்கு உலர்ந்து போகிறது!

    என்னுடைய வயது 67. இதய நோயும் ரத்த அழுத்தமும் உள்ளது. இதயத்துக்கு ரத்தத்தைக் கொண்டு செல்லும் குழாய்களில் அடைப்புகள் உள்ளன. இரவில் நாக்கு உலர்ந்து போகிறது. எவ்வளவு தண்ணீர் குடித்தாலும் நாக்கு உலர்ந்து போகிறது. இது எதனால்? இதைக் குணப்படுத்த முடியுமா?
    அ.ஸ்ரீ ராம் பராசரன், சாலிகிராமம், சென்னை-93.


    ரத்தக் குழாய்களில் ஏற்பட்டுள்ள அடைப்பை நீக்க, நீங்கள் சாப்பிடும் மருந்துகள் அனைத்தும் அடைப்பைச் சுரண்டி எடுக்கக் கூடியவையாகவும், வறட்சி மற்றும் சூடான வீர்யம் கொண்டவையாகவும் இருக்கக் கூடும். சூடான வீர்யத்தினால் அடைப்பை உருக்கி, அவ்விடத்திலிருந்து சுரண்டி எடுத்து வறட்சி என்னும் தன்மையால் சுண்டச் செய்யும் வீர்யமிக்க மருந்துகளால், வாயின் உட்பகுதிகளில் அமைந்துள்ள எச்சில் சுரப்பிகளில் அவற்றின் தாக்கம் உணரப்படும். வாயின் உட்புறம் எப்போதும் நெய்ப்புடன் எளிதில் இயங்கக் கூடியதாக இருக்க நெய்ப்பும் நெகிழ்ச்சியும் உமிழ்நீரால் கிடைக்கிறது. உமிழ்நீர் குறைந்தால் வாயும் தொண்டையும் உலர்ந்துவிடும். நா வறட்சியால் நீர் வேட்கை, தாக உணர்வு ஏற்படும். பெரும்பாலும் உடலில் நிறைந்துள்ள தண்ணீரின் நிறை, குறைநிலைகளை உணர்த்தும் முக்கியப் பணியைச் செய்யும் உமிழ்நீரில் ஏற்படும் தாக்கத்தின் பிரதிபலிப்புதான் இரவில் ஏற்படும் தாக உணர்ச்சி.

    அதனால் நீங்கள் சாப்பிடும் மாத்திரைகளின் தன்மையை மருத்துவர் மூலம் கண்டறிந்து அவற்றை எப்படி எப்போது சாப்பிட்டால் வாய், நாக்குப் பகுதிகள் உலர்ந்து போகாமலிருக்கும் என்பதை அறிந்து கொள்வது நலம். இரவு உணவுக்குப் பிறகு, ஓரிரு டம்ளர் வெண்ணைய், ஆடை நீக்கிக் கடைந்துள்ள மோரில் கால் பங்கு தண்ணீர் சேர்த்துப் பருகுவது நல்லது. இந்த வகையில் கடைந்து, தண்ணீர் சேர்க்கப்பட்ட மோர் சுவையில் சிறிது அளவு துவர்ப்பு, புளிப்பும், இனிப்பும் நல்ல விகிதமுள்ளதாயிருக்கும். குடலில் ஜீரணமான பின்பும் இனிப்புச் சுவையுடையது, சூடான வீர்யம் உடையது. எளிதில் செரிக்கும். மற்ற உணவையும் செரிக்கும் அளவுக்குப் பசியைத் தூண்டிவிடும். பருகியதும் உடலுக்கும் மனதுக்கும் திருப்தி தந்து வாயு தோஷத்தைக் குறைக்கும். ஜீரண இறுதியில் இனிப்பாக மாறுவதால் பித்த தோஷத்தைத் தூண்டிவிடாது. துவர்ப்புச் சுவை, உஷ்ண வீர்யம், வெண்ணெய் நெய்ப்பு இன்றி வறட்சியான குணம் போன்றவற்றால் கபத்தையும் குறைக்கும். இப்படியாக மூன்று தோஷங்களையும் சமனம் செய்யும் உயர்ந்த குணங்கள் கொண்டது இந்த மோர். பகல் வேளைகளில் ஆடை சத்து முழுவதும் எடுத்துக் கடைந்த தயிரில் நிறைய நீர் சேர்த்து, நீர் மோர் தயாரித்து கொத்துமல்லி இலை, கறிவேப்பிலை உப்பு சேர்த்துச் சாப்பிடுவது மிகவும் நல்லது. நல்ல குளிர்ச்சியானது. நா வறட்சியைப் போக்கும்.

    நல்லெண்ணெய் - தேங்காய்ப்பாலை வாயில் விட்டுக் கொப்பளித்துத் துப்புவதால் வாய் வறட்சியையும் நாக்கு வறட்சியையும் போக்கிக் கொள்ள முடியும். எள்ளை மென்று வெகுநேரம் வாயில் வைத்திருந்து பிறகு உமிழ்ந்து கொப்பளிப்பதும் நல்லதே.

    இரவில் சாப்பிடும் உணவு மாவு வகைகளாகிய இட்லி, தோசை என்று அமைந்திருந்தால், நடு இரவில் நாக்கு உலர்ந்துபோய் அதிக தண்ணீரின் தேவையை உணர்த்தக் கூடும். மாவினுடைய அம்சம் ரத்தத்தில் கலந்திருக்கையில் அதை நீர்க்கச் செய்து, செரிமானம் செய்ய வேண்டிய நிர்பந்தத்துக்கு உடல் ஆட்படும்போது, நீரின் தேவைக்கான உத்தரவை நீர் வேட்கையின் மூலம் உத்தரவிடுகிறது. அதனால் நீங்கள் மாவுப் பண்டங்களை இரவில் சாப்பிடாமல், கோதுமையை உப்புமா, சப்பாத்தி என்ற வகையில் மாற்றி அமைத்துச் சாப்பிடவும்.

    இரவில் அதிகம் தண்ணீர் பருகினால், சிறுநீரின் வெளியேற்றம் அதிகரிக்க வாய்ப்பிருக்கிறது. இதனால் தூக்கம் கெட்டுவிடக் கூடும். தூக்கம் குறைந்தால் அனேக உபாதைகள் தலைதூக்கிவிடும். அதனால் உலர்ந்து போய்விட்ட நாக்குக்கு வெட்டி வேர் போட்டு ஊறிய மண் பானைத் தண்ணீரை, நாக்கின் மீது படர விட்டு, சிறிதுநேரம் வைத்திருந்து சிறிய அளவில் பருகினால், மேலும் மேலும் ஏற்படக் கூடிய நாவறட்சியை எளிதில் போக்கிக் கொள்ளலாம்.

    (தொடரும்)


    ஆயுள்காக்கும் ஆயுர்வேதம்: எவ்வளவு தண்ணீர் குடித்தாலும் நாக்கு உலர்ந்து போகிறது!
    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை - 600 123 (பூந்தமல்லி அருகே) செல் : 94444 41771
    dinamani


    Sriramajayam likes this.

    "மண்ணில் நல்ல வண்ணம் வாழலாம்"

  6. #1536
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள் காக்கும் ஆயுர்வேதம்: கை, கால்களில் பயங்கர வலி!

    நான் ஒரு மலையாளி. வயது 67. தினமும் தலைக்குச் சாதாரண தண்ணீரில்தான் குளிக்கிறேன். கடந்த 4 மாதமாக கை, கால்களில் பயங்கர வலி உள்ளது. சரியாக அசைக்கவோ, மடக்கவோ முடியவில்லை. இரவில் வலி கூடுகிறது. உடம்பு தேய்த்துக் குளிக்க கையைத் தூக்க முடியவில்லை. இந்த உபாதை தீர வழி உள்ளதா?
    எம்.ருக்குமணி, தண்டையார்பேட்டை.


    தண்ணீரிலுள்ள குளிர்ச்சி தலை வழியாகக் கழுத்துத் தண்டுவடப் பகுதியில் இறங்கினால், அப்பகுதியிலுள்ள வில்லைகளின் திடமான உயரமும், அதன் ஸ்திரத் தன்மையும் கலகலத்துவிடக் கூடும். அவை மெலிந்தாலோ, தன் இடம் விட்டு நெகிழ்ந்தாலோ, நரம்புகளின் மீது அழுத்தத்தை ஏற்படுத்தி, கைகளில் கடும் வலியை ஏற்படுத்தும். குளிர்ச்சியான தண்ணீரை தலையில் விட்டுக் கொண்டால், நரம்புகளிலுள்ள வாயு எனும் தோஷம் சீற்றமடையும். அதனால் தண்டுவடப் பகுதியிலுள்ள நரம்புகளில் குடிகொண்டுள்ள கண்களுக்குப் புலப்படாத வாயு சீற்றமடைந்து, உங்களுக்கு உடல் வலியை ஏற்படுத்தி இருப்பதாகத் தெரிகிறது.

    தண்டு வடத்திலுள்ள குளிர்ச்சியை மாற்றுவதற்கு, சூடான வீர்யம் கொண்டதும், வலி நிவாரணியாகவும் செயல்படக் கூடிய நொச்சி, எருக்கு, ஆமணக்கு, கற்பூரம், கல்யாண முருங்கை, யூகலிப்டஸ், புங்கை போன்றவற்றின் இலைகளை ஒரு துணியில் மூட்டை கட்டி, சட்டியில் போட்டு சூடாக்கி, முதுகுத் தண்டுவடப் பகுதியில் கழுத்து முதல் கீழ் இடுப்பு வரை ஒத்தடம் கொடுப்பது மிகவும் நல்லது. இதைக் காலையில் உணவுக்கு முன் செய்து கொள்வதுதான் சிறந்தது. குளியலை மாலை வேளைக்கு மாற்றிக் கொள்ளலாம்.

    மாலை வேளைகளில் கற்பூராதி தைலம், நாராயண தைலம், ஸஹசராதி தைலம் போன்றவற்றில் ஒன்றிரண்டைக் கலந்து நீராவியில் சூடாக்கி, தண்டுவடம் முழுவதும் மேலிருந்து கீழாக, இதமான பதத்தில் தேய்த்து வெந்நீர் ஒத்தடம் கொடுப்பது நல்லது. அதன் பிறகு, வெதுவெதுப்பான தண்ணீரில் குளிக்க வேண்டும். தலைக்குக் குளிர்ந்த தண்ணீர் விட்டுக் கொள்வதைத் தவிர்க்கவும்.

    "க்ரீவாவஸ்தி' என்று ஒரு சிகிச்சைமுறையும், "கடி வஸ்தி' என்ற ஒரு முறை வைத்தியமும் உங்களுக்கு நல்ல பலனைத் தரலாம். உளுந்து மாவை கழுத்தின் தண்டுவடப் பகுதியில் வரம்பு கட்டி, அதனுள்ளே மூலிகைத் தைலத்தை வெதுவெதுப்பாக ஊற்றி, சுமார் 1/2 - 3/4 மணி நேரம் ஊற வைத்து, எண்ணெய்யைப் பஞ்சால் முக்கி ஒரு பாட்டிலில் சேகரித்து, வரம்பை எடுத்துவிடும் சிகிச்சை முறையால் பல அறுவை சிகிச்சைகளைத் தவிர்க்க இயலும். இதற்கு "க்ரீவா வஸ்தி' என்று பெயர். இதே சிகிச்சை முறையை இடுப்புப் பகுதியில் செய்தால் அதற்கு "கடி' வஸ்தி என்று பெயர்.

    சூடான வீர்யம் கொண்ட மூலிகைத் தைலங்களில் ஒன்றை 2 -4 சொட்டுகள் மூக்கினுள் விட்டு, உறிஞ்சித் துப்பிவிடுதல் எனும் நஸ்ய சிகிச்சை முறையால், குளிர்ச்சியால் ஏற்பட்டுள்ள கழுத்து எலும்புப் பகுதியின் வலியைக் குறைக்க முடியும். இதற்குப் பிறகு, தவிடு மாவு கொண்டு சூடாக கழுத்தில் ஒத்தடம் கொடுப்பதும் நல்லதே.

    குளிர்ந்த தரையில் படுப்பது, குளிரூட்டப்பட்ட அறையில் சில்லிட்டிருக்கும் தலையணையின் மீது கழுத்து எலும்பு படும்படி படுத்தல், குளிர்ந்த நீரைப் பருகுதல், வெயிலில் சென்றுவிட்டு, வீட்டுக்கு வந்ததும், குளிர்ந்த பானங்களைப் பருகுதல் போன்ற செயல்களை நீங்கள் தவிர்க்க வேண்டும்.

    குடலில் வாயுவை அதிகரிக்கச் செய்யும் பருப்பு வகைகள், உருளைக் கிழங்கு, வாழைக்காய், சேப்பங்கிழங்கு போன்றவற்றைத் தவிர்க்கவும். கறிகாய்களால் தயாரிக்கப்பட்ட சூப், மிளகு ரசம், தனியா, ஜீரகம், மிளகு, உப்பு சேர்த்துப் பொடிக்கப்பட்ட பொடி சாதம், கறிகாய் கூட்டு வகையறா, மோர் புளித்தது போன்றவை சாப்பிட உகந்தவை.

    ஸஹசராதி கஷாயம், மஹாராஸ்னாதி கஷாயம், யோகராஜ குக்குலு, குக்குலு திக்தகம் கஷாயம், ராஸ்னா ஸப்தகம், ஸப்தஸரம் போன்ற மருந்துகளில் உகந்ததை ஆயுர்வேத மருத்துவரின் ஆலோசனைப்படி சாப்பிடவும்.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை - 600 123 (பூந்தமல்லி அருகே) செல் : 94444 41771
    dinamani04 May 2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  7. #1537
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்: இரவும் பகலும் சளி, இருமல்!

    என்னுடைய வயது 79. வெளிச்சம் குறைவாக உள்ள இடத்தில், கண்பார்வை மிகவும் குறைவாக உள்ளது. ஆஸ்துமா சுமார் 15 வயது முதலே தொடர்ந்து இருக்கிறது. காற்றோட்டம் சற்றுக் குறைந்தாலும் மூச்சுவிடச் சிரமமாக இருக்கிறது. உடல் பலவீனம். இரவும் பகலும் சளி இருமல். சளி வெளியேறிவிட்டால் சுகமாக இருக்கிறது. இவற்றைக் குணப்படுத்த என்ன வழி?
    எஸ்.எம்.கே.தனபாலன், மதுரை.


    தலையிலும் மார்பிலும் பிராண - உதான வாயுக்கள் சரியாக வேலை செய்யவில்லை என்பதையே தங்களுடைய உடல் நிலை காட்டுகிறது. மருந்துகளின் தொடர் உபயோகத்தால் மூச்சுக் குழாயின் ரப்பர் போன்ற தன்மை குறைந்து இறுகிவிட்டால், மூச்சுவிடச் சிரமம் ஏற்படும். போதுமான அளவில் பிராண வாயுவின் வரத்து உட்புறக் குழாய்களின் மூலம் எடுத்துச் செல்ல முடியாத நிலை ஏற்பட்டுள்ளதால், உடல் பலவீனம் ஏற்படுகிறது. கெட்டியான சளி மூச்சுக் குழாயில் படிந்திருப்பதால், அதை வெளியேற்ற முயற்சிக்கும் செயல்கள் அனைத்துமே உடல் சோர்வைத் தரும்.

    பிராண - உதான வாயுக்களை நேர்ப்படுத்த சிறந்த வழி பிராணாயாமம் என்ற முறைதான். யோகப் பயிற்சிகளில் திறமையானவர்களை நீங்கள் நேரில் சந்தித்து அவர்கள் மூலம் ஆசன - பிராணாயாம முறைகளைக் கற்றுக் கொண்டால், உங்கள் உடல் நிலையில் நல்ல முன்னேற்றம் ஏற்பட வாய்ப்பிருக்கிறது.

    நாட்பட்ட சளியை நெஞ்சில் சுமந்து கொண்டு வாழ்வது சரியல்ல. கொள்ளு, கொண்டைக் கடலை, துவரம் பருப்பு, யவை எனும் பார்லி, பச்சைப் பயறு, பச்சரிசி ஆகியவற்றை வகைக்கு 15 கிராம் வீதம் சேர்த்து, 1 1/2 லிட்டர் தண்ணீரில் வேக வைத்து, 750 மி.லி. ஆனதும் வடிகட்டி, வெதுவெதுப்பாக, சிறிது இந்துப்பு கலந்து, காலை உணவாகப் பருகினால், சளியைக் கரைத்து வெளியேற்றும். சூடு ஆறிவிட்டால் 1/2 - 1 ஸ்பூன் தேன் கலந்து சாப்பிடுவதும் நல்லதே. மதிய உணவாக மிளகு ரஸம், கறிவேப்பிலைத் துவையல், சூடாக்கிய மோரில் மஞ்சள் தூள், நல்லெண்ணெய்யில் தாளித்த ஓமம் கலந்து சாப்பிடுவது மிகவும் நல்லது. இரவில் கோதுமை வகையைச் சார்ந்த உணவாக இருத்தல் நலம். இனிப்பு - புளிப்பு - உப்புச் சுவையைக் குறைக்க வேண்டும்.

    கோரைக் கிழங்கு 10 கிராம், சுக்கு 5 கிராம், 1 லிட்டர் தண்ணீருடன் கலந்து 1/2 லிட்டராகக் குறுகியதும் வடிகட்டி, சிறிது சிறிதாகக் குடிக்கப் பயன்படுத்துவது சிறந்தது. ஏலக்காய், கிராம்பு, ஓமம், சீரகம், சோம்பு ஆகியவற்றை இரண்டு வெற்றிலையுடன் சுருட்டி, உணவுக்குப் பின் மென்று சாப்பிடுவதால் கபக்கட்டு நன்றாகக் கரைந்து விடும்.

    ஒரு சில ஆயுர்வேதச் சிகிச்சை முறைகள் பயன் தரலாம். தேகராஜாதி தைலத்தையோ, கர்ப்பூராதி தைலத்தையோ நெஞ்சுப் பகுதியிலும், முதுகுப் பகுதியிலும் வெதுவெதுப்பாகப் பூசி அரை அல்லது முக்கால் மணி நேரம் ஊறிய பிறகு, தவிடு அல்லது கொள்ளு ஒத்தடம் கொடுக்க, சளி கரைந்து மூச்சு எளிதாக விட வாய்ப்பிருக்கிறது. சுமார் 7 முதல் 10 நாட்கள் வரை இந்தச் சிகிச்சையைத் தொடர்ந்து செய்து கொள்ள வேண்டி வரலாம். திரிபலா சூரணம், அதிமதுரம் சூரணம், திரி கடுகம் சூரணம் ஆகியவற்றைச் சேர்த்து, மொத்தம் 5 கிராமெடுத்து 10 மி.லி.தேனுடன் குழைத்து, காலை, இரவு உணவுக்குப் பிறகு நக்கிச் சாப்பிடலாம். கண்பார்வைக்கும், சளியைக் கரைப்பதற்கும் பயன்படும்.

    வியாக்ரயாதி கஷாயம், தசமூல கடுத்ரயாதி கஷாயம் ஆகியவற்றை வகைக்கு 7.5 மி.லி. வீதம் கலந்து, 60 மி.லி. கொதித்து ஆறிய தண்ணீர் கலந்து அதை 1/2 - 1 ஸ்பூன் (5 மி.லி) தேனுடன் காலை, மாலை வெறும் வயிற்றில் சுமார் 41 -48 நாட்கள் சாப்பிடுவதால், மார்பு சளி, இருமல் குறைந்து, மூச்சுவிடச் சுலபமாக இருக்கும்.

    தாளீசபத்ராதி சூரணத்தை 1/2 - 1 ஸ்பூன் அடிக்கடி சாப்பிட, உடல் பலவீனம் குறைந்து, தெம்பைத் தரும். இரவில் படுக்கும் முன், சூடு ஆறிய தண்ணீரில், சிறிது தேன் கலந்து சாப்பிட்டு படுத்துறங்குவதால், மார்பில் சளி சேர்வதை தடுக்க முடியும்.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை - 600 123 (பூந்தமல்லி அருகே) செல் : 94444 41771
    dinamani 11 May 2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  8. #1538
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள்காக்கும் ஆயுர்வேதம்!

    என் சகோதரியின் வயது 62. இரண்டு மாதத்துக்கு முன்பு காய்ச்சல் வந்து தலையில் மட்டும் கொதிக்கிறது என்று கூறுகிறார். பெரிய மருத்துவமனைக்கெல்லாம் சென்று காண்பித்துவிட்டோம். நரம்பு மருத்துவரிடமும் காண்பித்தோம். டெஸ்ட் எல்லாம் எடுத்தாகிவிட்டது. எந்த ஒரு நோயும் இல்லை என்றுதான் கூறுகின்றனர். இப்போது படபடப்பாக இருக்கிறது என்கிறார். படுக்கக் கூட முடியவில்லை. தொடர்ந்து நடப்பதும், மாறி மாறி நாற்காலியில் அமருவதுமாக இருக்கிறார். வேலையில் கவனமில்லை. இதற்கு என்ன காரணம்?
    மும்தாஜ், தக்கோலம்.


    பித்த தோஷத்தின் ஊடுருவும்தன்மை மற்றும் சூடு என்னும் இருவகையான குணங்களின் ஆதிக்கம் பொதுவாகவே காய்ச்சலில் கூடிவிடும். தம் சொந்த இருப்பிடம் விட்டு, மூளைப் பகுதிக்கு வந்து ஆதிக்கம் செலுத்தினால், தலைப்பகுதி கொதிக்கத் தொடங்கிவிடும். அவற்றை அமைதிப்படுத்தி, அங்கிருந்து அகற்றக் கூடிய உணவு - மருந்து - செயல் ஆகியவற்றைக் கவனமாக மேற்கொள்ளாமல், உதாசீனப்படுத்தினால், மூளையிலுள்ள நரம்பு மண்டலங்களின் வழியாக, உடல் பகுதிகளிலெல்லாம் சூடு பரவிவிடும். பரபரப்பும், நிதானமின்மையும், படபடப்பும், கவனமின்மையும் இதனால் ஏற்படக் கூடும். எந்தவிதமான லேப் டெஸ்ட்டாலும் இவை புலப்படாது. குணங்களின் செயல்பாடுகளை அவற்றின் செயல் மூலமாக மட்டுமே அறிய முடியுமே தவிர, உடலை எத்தனை கூறு போட்டு ஆராய்ந்தாலும், அவை தென்படாது என்பது கற்றறிந்த வல்லுநர்களின் கூற்றாகும்.

    காய்ச்சல் விட்டுவிட்டாலும், உணவில் புளி, உப்பு, காரம் ஆகியவற்றை அதிகம் சேர்த்தாலே, பிறர் மீது கோபம், வெறுப்பு கொண்டு கடும் வார்த்தைகளைப் பிரயோகம் செய்தாலோ, நரம்பில் குடி கொண்டுள்ள இந்த இரு குணங்களும் மேலும் மேலும் வலுப்பெற்று உடலைப் படாதபாடு படுத்தும். அவற்றை அங்கிருந்து பிரித்து, குடல் வழியாக வெளியேற்றும் சிகிச்சை முறைகளும் கடுமையாகக் கையாளப்பட வேண்டிய நிலைக்கு மருத்துவர் தள்ளப்படுவார். ஆகையால் உங்கள் சகோதரி செய்ய வேண்டிய செயல்கள், உண்ண வேண்டிய உணவு, சாப்பிட வேண்டிய மருந்து ஆகியவற்றைக் கீழ்காணும் வகையில் அமைத்துக் கொள்வது நல்லது.

    செயல்கள்: லேசாகவும் சுத்தமாகவுமுள்ள ஆடைகளை அணிந்து, மல்லிகை, முல்லை போன்ற பூக்களைத் தலையில் சூடி, உடல் மீது வாசனையுள்ள சந்தனத்தை பன்னீர் விட்டு அரைத்துப் பூசி, மாடி வீட்டின் மச்சு மீதமர்ந்து இரவின் முதல் யாமத்தின் இறுதிப் பகுதியாகிய 8 மணி முதல் 10 மணி வரை, சந்திரனின் ஒளிக்கதிர்கள் மேல்படும்படி அமர்ந்திருத்தல் நலமாகும். தவிர்க்க வேண்டிய செயல்கள் - எதிர்க்காற்று உடலில் படும்படி நடந்து செல்லுதல், பகலுறக்கம், பனி பொழியும் இடங்களில் நிற்பது, வயிறு நிறையச் சாப்பிடுதல்.

    உணவு: பச்சரிசி, கோதுமை, பச்சைப் பயறு, சர்க்கரை, தேன், புடலை, நெல்லிக்காய், திராட்சை, பழச்சாறுகள், கசப்பும் துவர்ப்பும் புளிப்பும் மிக்க நாரத்தை மாதுளை முதலிய கனிகள், கரும்புச் சாறு, சர்க்கரை கலந்த இனிக்கும் கடைந்த மோர் பருகுதல் போன்றவை நல்லது. புலால் உணவு தவிர்க்கவும். தயிர், எண்ணெய்ப் பொருட்கள் சாப்பிட வேண்டும்.

    மருந்து: வாஸகுடூச்யாதி கஷாயம், திராக்ஷதி கஷாயம் ஆகியவற்றைக் கலந்து பருகலாம். இவற்றைக் கலந்து சாப்பிட வேண்டிய அளவை ஓர் ஆயுர்வேத மருத்துவரால் மட்டுமே கூற இயலும். காரணம் நோயின் தன்மைக்கேற்ப இவற்றின் அளவைக் கூட்டுவதும் குறைப்பதுமாகச் செய்ய வேண்டும்.

    த்ரிவிருத்லேஹ்யம், கல்யாண குலம், அவிபத்தி சூரணம் போன்றவற்றிலொன்றை குடல்வாகை அனுசரித்துத் தேர்ந்தெடுத்து, நன்றாக பேதியாகும் வகையில் சாப்பிட்டால், பித்த நீரைக் குடலிலிருந்து வெளியேற்றலாம்.

    சந்தனாதி தைலம், ஹிமசாகரதைலம், திரிபலாதி தைலம், அமிருதாதி தைலம் போன்றவற்றிலொன்றை தலைக்குத் தேய்த்துக் குளித்து வருவது நல்லது.

    வீட்டில் நிலவும் அமைதியான சூழ்நிலையும், அன்பான பேச்சும், அவரிடம் மற்றவர்கள் காட்டும் கரிசனமும் அவர் விரைவில் குணமாக வழி அமைத்துத் தரும். அவருடைய மனம் மகிழும்படி பார்த்துக் கொண்டாலே, நரம்புகளில் பற்றியுள்ள பித்த குணங்கள் நெகிழ்ந்து வெளியேறி, மூளைப் பகுதியையும் வலுப்படுத்தி, உபாதைகள் குறைந்துவிட வாய்ப்பை உருவாக்கித் தரும்.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை- 600 123 (பூந்தமல்லி அருகே) செல் : 94444 41771
    dinamani - 26.05.2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  9. #1539
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள் காக்கும் ஆயுர்வேதம்: பாசகம் என்றொரு பித்தம்..!

    எனக்கு வயது 45. முகத்தில் பருக்களால் ஏற்பட்ட தழும்புகள் மறைய வேண்டும். கரும்புள்ளிகள் அகல வேண்டும். பாத வெடிப்பு - கைகளில் ஒன்றிரண்டு வெண்புள்ளிகள் - மூட்டு வீக்கம் - சிறுநீர் கழிப்பது குறைவு - காலை 9 முதல் மதியம் 2 மணி வரை ஒரே மயக்கம் - ரத்த அழுத்தம் குறைவு போன்ற உபாதைகள். இவை தீருமா? குணமாகுமா?
    ஒரு வாசகி, திருப்பூர்.


    இவையனைத்தும் ஒன்றோடொன்று தொடர்புடையதா? அல்லது தனித்தனியாக ஏற்பட்டதா? என்று ஒரு குழப்பம் ஏற்படலாம். உணவுப் பாதையின் மத்தியப் பகுதியில் பாசகம் என்றொரு பித்தமிருக்கிறது. இது உணவைச் சீரணிக்கச் செய்கிறது. உணவுச் சத்திலிருந்து சத்தையும், மலத்தையும் பிரிக்கிறது. மற்ற இடங்களிலுள்ள பித்தங்களுக்கு தன்னிருக்கையிலிருந்து கொண்டே ஊட்டமளிக்கிறது. இந்தப் பித்தத்திற்கு தவறான உணவு வகைகளால் கேடு ஏற்பட்டால், அதுவே நீங்கள் குறிப்பிடும் பல உபாதைகளுக்குக் காரணமாகலாம். அத்தனை மதிப்பு வாய்ந்த இந்த பாசக பித்தத்தை இன்று பெருமளவு மதித்து நடக்காததால்தான் ஆஸ்பத்திரிகளில் கூட்டத்துக்குப் பஞ்சமில்லாமலிருக்கிறது.

    உங்களுக்கு ஏற்பட்டுள்ள உபாதைகளைத் தனித்தனியாகவும் பார்த்து வைத்தியம் கூறலாம். அந்த வகையில் தேங்காய்ப் பாலை முகத்தில் பூசி, சிறிது நேரம் ஊறிய பிறகு கழுவிவிடுவதால், நெய்ப்பு எனும் எண்ணெய்ப் பசையைத் தோலுக்கு ஏற்படுத்தி முகப்பருக்களால் ஏற்பட்ட தழும்புகளை அது மறையச் செய்யும். குங்குமப் பூவை சந்தனத்துடன் பன்னீர் விட்டரைத்துக் கரும்புள்ளிகள் மீது பூசி வர, அவை மறையும்.

    துணி துவைக்கும் கல்லில் பாதத்தை தண்ணீர்விட்டுத் தேய்த்து அலம்பி, துணியால் துடைத்துக் கொள்ளவும். ஆறு பங்கு தேங்காய் எண்ணெய்யைச் சுட வைத்து அதில் ஒரு பங்கு தேன் மெழுகைப் போட இளகிக் களிம்பு போலாகும். இதனைப் பாத வெடிப்பில் தடவ வலி, வறட்சி, பிளவு குறையும்.

    கார்ப்போகரிசியைப் பொடித்து, சிட்டிகை எடுத்து அரை கிளாஸ் மோருடன் கலந்து பருகி வர, வெண்புள்ளி உபாதை குறையும்.

    சதகுப்பையை புளித்த மோருடன் அரைத்துச் சூடாக்கி முட்டியில் பற்று இட, முட்டி வீக்கம் குணமடையும். காய்ந்த திராட்சையை 15 -

    30 கிராம் எடுத்துச் சுத்தமான தண்ணீர் அரை கிளாஸ் (150 மி.லி.) சேர்த்து ஊற வைத்துக் கசக்கிப் பிழிந்து எடுத்த சாறுடன் பசுவின் பால் 300 மி.லி. சேர்த்துச் சாப்பிட, சிறுநீர் கழிப்பது எளிதாகும். கொத்துமல்லி, சந்தனத்தூள், நெல்லி வற்றல் இம்மூன்றையும் வெந்நீரில் டீ போல் தயாரித்துச் சாப்பிட மயக்கம் குணமாகி, ரத்த அழுத்தம் சாதாரண நிலைக்கு வரும்.

    மேற்குறிப்பிட்ட சிகிச்சைகள் நன்றாக வேலை செய்ய வேண்டுமானால், முதலில் குறிப்பிட்ட பாசக பித்தத்தின் உதவி தேவைப்படும். அதற்கு முதலில் அதிலுள்ள நச்சுத் தன்மையை நீக்க வேண்டும். திரிபலா எனும் சூரண மருந்து 5 கிராம் எடுத்து 150 மி.லி. சூடான பாலுடன் காலையில் தொடர்ந்து வெறும் வயிற்றில் 3 - 7 நாட்கள் சாப்பிட, பேதியாகி கெட்ட பித்தம் குடலிருந்து வெளியேறி, சீரணிக்க உதவும் பாசக பித்தம் சுத்தமாகிவிடும். அதன் பிறகு, மேற்குறிப்பிட்ட மருந்துகளை உள்ளும்புறமும் உபயோகப்படுத்துவதே சிறந்தது.

    வறண்ட பிரதேசத்தில் நீங்கள் குடியிருப்பதாலும், சூடான இடத்தில் வேலை செய்வதாலும் உடலிலுள்ள நீர் மற்றும் எண்ணெய்ப் பசை அகலாதிருக்க வாரமிருமுறை நல்லெண்ணெய்யை உடலெங்கும் தேய்த்து ஊற வைத்து பின் குளிக்கவும். உடலின் வெளிப்புற - உட்புற விஷங்களை அகற்றக் கூடிய சக்தி எண்ணெய்க் குளியலில் அடங்கியிருக்கிறது.

    உடல் உபாதைகளைக் குணப்படுத்தும் முயற்சியில் நீங்கள் இறங்கியுள்ள நாட்களில் மனதைச் சார்ந்த ரஜஸ் - தமஸ் எனும் தோஷங்களின் சீற்றத்தை வளரவிடக் கூடாது. கோப - தாபங்களின்றி மன அமைதியுடன், பேச்சில் நிதானமும் சாந்தமும்,மகிழ்ச்சியுடன் நண்பர்கள் - உறவினர்களுடன் பேசிப் பழகினால், உங்கள் உபாதைகளை விரைவில் குணமடைய நிறைய வாய்ப்பிருக்கிறது. மருத்துவரின் நேரடிப் பார்வையில் வைத்தியம் செய்து கொள்வதும் மிகவும் நல்லது.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை } 600 123 (பூந்தமல்லி அருகே) செல் : 94444 41771
    dinamani 01.06.2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

  10. #1540
    datchu's Avatar
    datchu is offline Silver Ruler's of Penmai
    Gender
    Female
    Join Date
    Feb 2012
    Location
    Chennai
    Posts
    25,375

    re: Today's Medical Info

    ஆயுள் காக்கும் ஆயுர்வேதம்:
    கருவுற்ற பெண்ணுக்குக் காய்ச்சல் வந்தால்..?

    என் மகளுக்கு வயது 32. நிறை மாத கர்ப்பிணி. இருமுறை கர்ப்பம் நிலைக்காமல் கலைந்துவிட்டது. இது தலைச்சன் பிரசவம். ஜூலை முதல் வாரத்தில் பிரசவம். இப்போது அவளுக்கு நல்ல சளி, காய்ச்சல். ஆண்ட்டி பயாடிக் ரசாயன மருந்துகள் உட்கொள்ளக் கூடாது என்று அலோபதி டாக்டர்கள் எச்சரித்துள்ளார்கள். என்ன மருந்துகள் இந்த நிலையில் பாதுகாப்பானவை?
    பாலாம்பாள், சாலிக்கிராமம்.


    காய்ச்சல் விரைவில் குணமடைவதற்கு மூன்று முக்கிய விஷயங்களில் கவனம் செலுத்த வேண்டியது அவசியம். அவை ஆசாரம், ஆகாரம், ஒஷதம்.

    ஆசாரம்: ஆசாரங்களில் முதலாவது விச்ராந்தி. உடல், பேச்சு, மூளை மூன்றுக்கும் தேவையான ஓய்வு கொடுக்க வேண்டும். இரும்புக் கட்டிலில் படுப்பதைவிட மரக்கட்டிலில் படுப்பதே நல்லது. இரும்புக் கட்டில் குளிர்காலத்தில் அதிக குளிர்ச்சியாகவும், வெயில் காலத்தில் அதிக சூடாகவும் மாறுகின்றது. மரக்கட்டில் எல்லாப் பருவ காலங்களிலும் ஒரே சீரான சுகமான சீதோஷ்ணத்திலேயே இருக்கும். மகள் படுத்திருக்கும் மெத்தையும் தலையணைகளும் இலவம் பஞ்சு கொண்டதாயிருக்க வேண்டும். இலவம் பஞ்சில் மிருதுத்தன்மை அதிகம். அத்துடன் சீதோஷ்ண மாறுதல் ஏற்படுவதில்லை. படுக்கையின் மேல் விரிப்பும் பருத்தியினால் நெய்யப்பட்டதாய் இருப்பதுதான் நல்லது. தோலிலிருந்து வெளியாகும் வியர்வையை உறிஞ்சி வியர்வை நாளங்களை விரியச் செய்து சுத்தமாகக் காப்பாற்றும். குளிரூட்டப்பட்ட அறையில் படுக்கக் கூடாது. அதுபோன்ற அறையில் படுத்தால் மார்பில் சளி கட்டும். காய்ச்சல் உள்ளவர்களுக்கு வியர்வை உண்டாகிக் கொண்டிருப்பதே நல்லது. வியர்வை மூலம் உடலின் மலாம்சம் வெளியேறுகின்றது. அவர் படுக்கும் அறையில் காற்றும் வெளிச்சமும் மிதமாய் மட்டுமே இருக்க வேண்டும். மின்சார விசிறியும் உடலின் மேல் நேராகப் படும்படி அமைக்காமல் மிக மந்த வேகத்தில் எட்டியே வைக்க வேண்டும். அவருடைய ஓய்வுக்கு எந்தவிதத்திலும் குந்தகம் விளையாதபடி சூழ்நிலை அமைந்திருக்க வேண்டும். இனிய சங்கீதம் அவர் காதில் விழும்படி செய்தால் உறக்கம் இடையூறு இல்லாமலிருக்கும்.

    ஆகாரம்: எல்லா சமயங்களிலும் ஒரே திட்டமாய் உணவை அமைக்க முடியாது. காய்ச்சலின் வேகம், மப்பு நிலை, காய்ச்சலுக்கான காரணம், ஜீரண சக்தி முதலியவற்றை நன்கு யோசித்துத் தகுந்தபடி உணவை அமைத்துக் கொள்ள வேண்டும். சளியும் காய்ச்சலும் சேர்ந்திருப்பதால், ஷடங்கபானீயம் என்னும் ஒரு வகைக் குடிநீர், பருக ஏற்றது. கோரைக் கிழங்கு, வெட்டிவேர்,விளாமிச்சை வேர், பர்ப்படகம், சுக்கு, சந்தனசிராய் ஆகிய ஆறு சரக்குகள் ஒவ்வொன்றையும் பத்து கிராம் அளவுக்கு எடுத்து இடித்து தவிடு மாதிரி பெருந்தூளாகச் செய்து கொள்ளவும். அதில் 10 கிராம் அளவு எடுத்து இரண்டு லிட்டர் அளவு தண்ணீரில் போட்டு, ஒரு லிட்டர் அளவு மீதமாகக் காய்ச்சி வடிகட்டிக் கொள்ளவும். நா வறட்சியைப் போக்குவதற்காக இதை அடிக்கடி சாப்பிட்டு வரலாம். ஆற வைத்துச் சாப்பிட்டால் வாத, கபம் மேலிட்ட காய்ச்சல் குணமாகும்.

    மகளுக்குப் பசி குறைவாக இருந்தால் புழுங்கலரிசியை சிறிது சிவப்புக் காணும் வரை லேசாக வறுத்து 3-4 அரிசித் திப்பிலியை வறுத்துப் பொடித்துச் சேர்த்துக் கொள்ளவும். இதை 1 பங்காகவும், தண்ணீர் 20 பங்காகவும் சேர்த்து, கால் பங்கு சுண்டும் வரை கொதிக்கவிட்டு, இறக்கிக் கொள்ளவும். பருக்கையை வடிகட்டி, கஞ்சியை மட்டும் காலையில் சிறிது உப்பு சேர்த்து வெதுவெதுப்பாகப் பருகினால், மிக எளிதில் ஜீரணமாகும். உடலிலுள்ள கடுப்பு வலி, கனம், முறித்துக் கொள்ளும் வேதனை, தொண்டை, மார்பு, தலை முதலிய இடங்களில் கபம் கட்டிச் சளி, நீர் இளக்கம் முதலிய வாத - கப உபத்திரவங்கள் அனைத்தும் நீங்கும். 2 -3 நாட்களுக்குப் பிறகு, பசி நன்றாக எடுக்கத் தொடங்கிவிட்டால், கோதுமையையும், பார்லியையும் லேசாக வறுத்து 1 பங்கு எடுத்து, 12 பங்கு தண்ணீர் சேர்த்து, தண்ணீர் சரிபாதியாகச் சுண்டக் காய்ச்சி வடிகட்டி, சிறிது உப்பு சேர்த்து காலையில் பருக, சளியால் ஏற்படும் காய்ச்சல் குணமாகும். மதியம், இரவு சூடான சாதத்துடன் மிளகு, சீரகம் பொரித்த ரசம் கலந்து நன்கு வேக வைத்த கறிகாய்ப் பொரியல் சாப்பிடலாம். தேங்காய் கூடாது.

    ஒஷதம் (மருந்து): நீர்க்கோவையினால் ஜலதோஷம் தலை பாரம், தலைவலி இருந்தால் ரஸ்னாதி சூரணத்தை இஞ்சிச் சாறில் குழைத்துச் சூடாக்கி, நெற்றியில் பற்று இடவும். காலை, மாலை வேளைகளில் சுமார் 1/2 - 1 மணி நேரம் போட்டு வைக்கலாம்.

    குடூச்யாதி எனும் கஷாயத்தை 15 மி.லி. அளவில் எடுத்து 60 மி.லி. கொதித்து ஆறிய தண்ணீரில் கலந்து காலை, மாலை, வெறும் வயிற்றில் சாப்பிட, கப - பித்தங்களால் ஏற்படும் காய்ச்சல் குணமாகும்.

    (தொடரும்)


    By எஸ். சுவாமிநாதன், டீன் ஸ்ரீஜயேந்திர சரஸ்வதி ஆயுர்வேதக் கல்லூரி, நசரத்பேட்டை } 600 123 (பூந்தமல்லி அருகே) செல் : 94444 41771
    dinamani 09.06.2013


    jv_66 and Sriramajayam like this.

    "மண்ணில் நல்ல வண்ணம் வாழலாம்"

loading...

Bookmarks

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  
Like It?
Share It!







Follow Penmai on Twitter