Sponsored Links
Sponsored Links
Penmai eMagazine December! | All Issues

User Tag List

Like Tree13Likes

How to take care of the Newborn babies?- -இளம் பெற்றோர்களே.இங்கே கவனியுங்க&#


Discussions on "How to take care of the Newborn babies?- -இளம் பெற்றோர்களே.இங்கே கவனியுங்க&#" in "Newborn and Infants" forum.


  1. #1
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    How to take care of the Newborn babies?- -இளம் பெற்றோர்களே.இங்கே கவனியுங்க&#

    இளம் பெற்றோர்களே...இங்கே கவனியுங்கள் !
    கூட்டுக் குடும்பமாக இருந்தவரை குழந்தை வளர்ப்பு சுலபமானதாக இருந்தது. குழந்தை கூடுதலாக இரண்டு முறை 'கக்கா' போனால், 'வயித்துக்குச் சரியில்லை பார்த்துக்கோ’ என்று உஷார்படுத்துவார் பாட்டி. காய்ச்சலில் உடம்பு கொதித்தால், 'பருத்தித் துணியை தண்ணியில் நனைச்சு, உடம்ப துடைச்சு விடு’ என்று முதலுதவி சொல்வார் தாத்தா.

    இன்றோ நியூக்ளியர் ஃபேமிலி கலாசாரம்... இளம் பெற்றோருக்கு ஆலோசனைகள் கூற பெரியவர்கள் யாரும் உடன் இல்லை. குழந்தையின் அழுகை தொடங்கி, சாப்பாடு ஊட்டுவது வரை குழப்பங்களும் அச்சங்களும் பிடித்துக் கொள்கின்றன பெற்றோரை.

    அவர்களுக்குக் கைகொடுக்கிறார் சென்னையைச் சேர்ந்த குழந்தைகள் நல மருத்துவர் ஆர்.பிரதீப்ராஜ்...

    ''பால் குடிச்சவொடனே கக்கிடுது டாக்டர்.. என்பதுதான் புது அம்மாக்களின் முதல் கம்ப்ளெயின்ட். பால் குடிக்கும்போது காற்றையும் சேர்த்து உள்ளிழுக்கும். எனவே, தாய்ப்பால் கொடுத்தவுடன் குழந்தையைத் தோளில் போட்டு பத்து நிமிடம் முதுகில் மிருதுவாகத் தட்டிக்கொடுக்க, அப்போது வரும் ஏப்பத்தில் அந்தக் காற்று வெளிவந்துவிடும். ஓவர் ஃபீடிங்கும் கக்குவதற்கான காரணமாக இருக்கலாம்.

    பசியினாலோ... தூக்கமின்மை, வியர்வை என அசௌகரியத்தாலோ குழந்தை அழுதால்... 20 நிமிடங்களுக்குள் சமாதானப்படுத்திவிடலாம். அதற்கு மேலும் குழந்தை அழுதால், டாக்டரை அணுக வேண்டியது அவசியம்.

    'குழந்தை யூரின் போறப்போ எல்லாம் அழுது’ என்று பதறும் பெற்றோர் பலர். இதில் பயப்பட ஒன்றும் இல்லை. பிறந்த குழந்தைக்கு யூரின் பிளாடரும், அடிவயிற்றுத் தசைகளும் உறுதியாக இருக்காது. இதனால், யூரின் பிளாடர்களுக்குப் பிரஷர் கொடுத்தபடிதான் சிறுநீர் வெளியேறும். இந்தக் காரணத்தால், குழந்தை அழுவது இயல்பான ஒன்றுதான். இரண்டு வயதுக்குள் இது தானாகவே சரியாகிவிடும்.

    ஆறு மாதத்துக்குப் பிறகு தாய்ப்பாலோடு குழந்தைகளுக்கு இணை உணவை ஆரம்பித்துவிட வேண்டும். எளிதாக ஜீரணிக்கக் கூடிய இட்லி, பருப்பு சாதம், மசித்த ஆப்பிள் என கொடுக்கலாம். முதல் வாரம் காலை இட்லி மட்டும், இரண்டாவது வாரம் காலை இட்லி, மதியம் சாதம், மூன்றாவது வாரம் காலை, மதியம், இரவு உணவு என கொடுக்கலாம். குறை மாதக் குழந்தைகளுக்குப் பிறந்து ஆறு வாரத்துக்குப் பின் இரும்புச் சத்து டிராப்ஸ், மல்டி வைட்டமின் டிராப்ஸ் கொடுக்க வேண்டும். இவர்களுக்கு, இணை உணவை தாமதமாகவே ஆரம்பிக்கலாம்.

    குளிப்பாட்டுவது, அடுத்த சவால். இரண்டரை கிலோ எடையுடன் பிறக்கும் குழந்தைகளை 15 நாள் கழித்து இதமான சுடுநீரால் குளிப்பாட்டலாம். மூன்றரை கிலோ எடையுடன் பிறக்கும் குழந்தைகளைப் பிறந்த இரண்டாவது நாளே தலை தவிர்த்து உடம்புக்கு மட்டும் ஊற்றிக் குளிப்பாட்டலாம். குழந்தையின் காது, மூக்கை சுத்தம் செய்யும் வேலைகள் எல்லாம் வேண்டாம். இயற்கையாகவே சுத்தமாகிவிடும். எக்காரணம் கொண்டு நாக்கில் வசம்பு போன்ற வீரியமுள்ள பொருட்களை தடவக் கூடது.



    தனிக்குடும்ப அம்மாக்கள் தங்கள் குழந்தைகள் பற்றி வைக்கும் பிரதான கவலை... 'என் குழந்தை இன்னும் பேசல’ என்பதுதான். தாத்தா பாட்டி, மாமா, சித்தி என்று உறவுகள் சூழ்ந்திருக்கும் கூட்டுக் குடும்பத்தில், ஒருவர் மாற்றி ஒருவர் குழந்தையைக் கொஞ்சுவது, பேசுவது, தாலாட்டு பாடுவது என்று இருப்பார்கள். அந்தச் சூழலில் குழந்தைக்கும் தானாகவே சீக்கிரம் பேச்சு வந்துவிடும். தனிக் குடும்பத்தில் குழந்தையிடம் அம்மா, அப்பாவே நேரம் செலவழித்துப் பேசுவதில்லை. பின் எப்படி அது மட்டும் பேசும்? எனவே, ஒரு மாத குழந்தையாக இருந்தாலும், அப்போதே பேச ஆரம்பித்து விடுங்கள். அதற்குப் புரிகிறதோ இல்லையோ... வீட்டுக்கு வருகிறவர்களை எல்லாம் பெயர், உறவு முறையுடன் அறிமுகப்படுத்துங்கள்.

    விஷ§வல் ஸ்டிமுலேஷன் தெரபி, டேக்டைல் ஸ்டிமுலேஷன் தெரபி, ஆடிடிவ் ஸ்டிமுலேஷன் தெரபி என முக்கியமான சில தெரபிகள் இருக்கின்றன. விஷ§வல் ஸ்டிமுலேஷன் என்பது குழந்தைகளுக்கு வண்ணங்களை அடையாளப்படுத்துவது. டேக்டைல் என்பது குழந்தைகளின் உடலை நன்கு மசாஜ் செய்து விடுவது. ஆடிடிவ் என்பது குழந்தைகளின் காது கேட்கும் திறனை பலப்படுத்துவதற்காக கை தட்டுவது, கொலுசு போட்டுவிடுவது, கிளுகிளுப்பை என பல இசைகளை அதைக் கேட்கச் செய்வது. இந்தத் தெரபிகள் எல்லாவற்றையும் ஆறு மாதத்துக்குள் செய்துவிட வேண்டும்.

    குழந்தைகளின் விளையாட்டுப் பொருட்களும் வாஷபிளாக இருக்க வேண்டும். குழந்தைகளுக்கான தடுப்பூசி தவணைகளை எக்காரணம் கொண்டும் தவற விடக்கூடாது!''
    - அக்கறையுடன் முடித்தார் டாக்டர்.


    Similar Threads:

    Sponsored Links
    jv_66, cuteyammmu05 and sumitra like this.

  2. #2
    sumitra's Avatar
    sumitra is offline Registered User
    Blogger
    Ruler's of Penmai
    Gender
    Female
    Join Date
    Jul 2012
    Location
    mysore
    Posts
    23,699
    Blog Entries
    18

    Re: இளம் பெற்றோர்களே.இங்கே கவனியுங்கள்

    The importance of joint family system and the contribution of elders and relatives in the child's growth is explained well in this post. thank you!

    chan likes this.

  3. #3
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    How to care for a newborn baby? - பச்சிளம் சிசுவைப் பாதுகாப்பது எப்&#

    பச்சிளம் சிசுவைப் பாதுகாப்பது எப்படி?

    டாக்டர் என். கங்கா



    பிறந்தது முதல் ஒரு மாதம் வரை

    பிரசவம் முடிந்தவுடன் ஒரு மிருதுவான ரோஜாச் செண்டை வெள்ளைத் துணியில் நன்கு பொதிந்து முகம் மட்டும் தெரியுமாறு தாய்க்கும் மற்ற உறவினர்களுக்கும் காட்டுவார்கள்! இந்த மலர்க்கொத்தைக் காணும்போது மனத்தில் மகிழ்ச்சி பொங்கும். சந்தேகமில்லை. அதே நேரம் ஒரு மெல்லிய பய உணர்வும், பொறுப்பும் மனத்தில் படர்வது இயற்கையே! இந்த அருள் கொடை நம் பொறுப்பில் என்பது சுகமான சுமை!

    குழந்தை ஆணா, பெண்ணா என்ன எடை என்றெல்லாம் கேள்விகளை அடுக்குவோம். அன்றலர்ந்த தாமரை போல் பொக்கை வாயும் கண்களை இறுக்கமாக மூடிக் கொண்டு அழும் இந்த குழந்தையில் ஆண் பெண் வித்தியாசமெல்லாம் தேவையா? பிறந்தவுடன் இருந்த எடையை அறிந்து கொள்வது கட்டாயம். தாய்க்கு கடைசியாக மாதவிடாய் வந்த நாள் (Last menstrual period - LMP) முதல் 270 நாட்கள் சேர்த்து அத்துடன் முன்னே அல்லது பின்னே ஒரு வாரம் என்று கணக்கிட்டு குழந்தை பிறக்கும் தேதியைக் கணக்கிடலாம்.

    (Expected date of delivery) மீளா ஒலி அலை (Ultra sound scan) செய்து கருவில் சிசுவின் எடை, நீளம், சுவாசப் பாதை முதிர்ச்சி, உடல் அசைவுகள், பனிக்குடநீரின் முதிர்ச்சி ஆகியவற்றை கணக்கிட்டு, பிறக்கும் தேதியை சுமாராகக் கணிக்கலாம். இதில் சில மாறுதல்கள் ஏற்படுவது இயற்கையே!

    37-40 வாரங்களுக்குள் பிறக்கும் குழந்தை நிறை மாதம் (Full term) என்று அறியலாம். 37 வாரங்களுக்கு முன்பாகப் பிறந்தால் குறைமாதக் குழந்தை (Pre Term) என்றும் குறிக்கப்படுகிறது.

    நிறை மாதம் ஆன குழந்தை பிறக்கும் போது குறைந்த பட்சம் 2.5 கிலோ எடை இருக்க வேண்டும். அதிக எடையாக 4 – 4.5 கிலோ இருக்கலாம். 2.5 கிலோவிற்குக் குறைவாகப் பிறக்கும் குழந்தை குறைந்த எடையுள்ள குழந்தை எனப்படுகிறது.

    குறை மாதக் குழந்தை, பிறப்பு எடை குறைந்த குழந்தை (Low birth weight), பிறப்பு எடை மிக அதிகமான குழந்தை போன்றவரக்ளை High Risk Babies என்கிறோம். அவர்களுக்கு மருத்துவச் சிக்கல்கள் வரலாம். நோய்க் கிருமித் தொற்று (Infection) மூச்சுத் திணறல், உடல் வெப்பநிலை குறைதல் (Hypothermia) ரத்தத்தில் சர்க்கரை, சோடியம், பொட்டாசியம், கால்சியம் போன்ற தாது உப்புக்கள் மாறுபடுதல், ரத்தத்தில் அமிலத்தன்மை (Ph) மாறுதல்கள் போன்ற பலதரப்பட்ட பிரச்னைகள் ஏற்படலாம்.

    உடனடியாக மருத்துவம் செய்யாவிடில் உயிருக்கு ஆபத்தாகலாம். அதனால் தான் நிறை மாதமா, பிறந்த எடை என்ன என்ற கேள்விகள் எழுகின்றன. மகப்பேறு மருத்துவர் மற்றும் குழந்தை மருத்துவர் பிரச்னைகளை எதிர்பார்த்து மருத்துவம் செய்ய தயார்படுத்திக் கொள்ள வேண்டும். (Anticipatory preparedness).

    குழந்தை பிறந்தவுடன் நன்கு வீறிட்டு அழ வேண்டும். அப்போது நுரையீரல் நன்கு சுருங்கி விரிந்து மூச்சு விடுவது சீராகும். மூளைக்குத் தேவையான ரத்த ஓட்டமும் ஏற்படும். பிறந்தவுடன் குழந்தை சரி வர அழவில்லையானால் மூளை பாதிப்புகள் ஏற்படலாம்.

    குழந்தை பிறந்த உடன் பிரசவ அறையில் உள்ள மருத்துவர் மற்றும் செவிலியர் குழந்தையை நன்கு பரிசோதனை செய்வார்கள். வெளியில் தெரியும் பிறவிக் கோளாறுகள் (உ.ம்) 6 விரல்கள், தலை சுற்றளவு, உடலில் உள்ள 9-10 துவாரங்கள் – 2 கண்கள், 2 காதுகள் 2 நாசித் துவாரங்கள், வாய் மற்றும் அண்ணம் தொண்டை, சிறுநீர்த் துவாரம், மலத்துவாரம், பெண் குழந்தைக்கு பிறப்புப் பாதைத் துவாரம் ஆகியவற்றை சரி பார்ப்பார்கள். குழந்தை பிறந்தவுடன் குழந்தையை நன்கு துடைத்து 2-3 அடுக்கு துணிகள் கொண்டு சுற்றி வெதுவெதுப்பாக வைக்க வேண்டும்.

    எடை குறைந்த அல்லது குறை மாதக் குழந்தைக்கு உடல் வெப்பம் குறைவது – Hypothermia ஒரு உயிர்க் கொல்லி நோய். குளிர் காலத்தில் 5 – 6 அடுக்குத் துணிக் கொண்டு பாதுகாக்கலாம். வெளிர் நிறத்தில் பிரிண்ட் – டிசைன் எதுவும் இல்லாத காட்டன் சட்டையை முதலில் போட்டு அதன் மேல் ஸ்வெட்டர் அல்லது கெட்டியான பனியன் மெட்ட்ரீரியலில் சட்டை போடலாம். தலைக்கு காட்டன் குல்லாய், கைகளுக்கு குத்துச் சண்டை வீரர் போன்ற உறை, கால்களுக்கு காட்டன் சாக்ஸ் எல்லாம் போட்டு பாதுகாக்க வேண்டும். குழந்தையின் சட்டையில் பட்டன், ஹூக், ஜிப் இருக்கக் கூடாது.

    நாடா அல்லது வெல்க்ரோ நல்லது. விற்கப்படும் நாப்கின், டயாபர்களைத் தவிர்க்கலாம். ஏனெனில் குழந்தையின் மலம், சிறுநீர் அதிலேயே ஊறி பிறப்பு உறுப்புப் பகுதியில் இன்பெக்*ஷன் பூசணத் தொற்று, புண் ஆகியவை ஏற்பட வாய்ப்பு உண்டு. பிறந்த குழந்தை நீர், மலம், இரண்டுமே அதிகம் போகும் என்பதால் புண்ணாகும் வாய்ப்பு அதிகம்! பெண் குழந்தைக்கு இன்னும் அதிகமாக நோய் தொற்று ஏற்படக்கூடும். சுத்தமான வெள்ளை அல்லது வெளிர் நிற காட்டன் துணிகளை முக்கோணமாக மடித்து லூசாக இடுப்பில் கட்டிவிடலாம். இது தருமே இயற்கை பாதுகாப்பு!

    தொடர்புக்கு - டாக்டர் என். கங்கா : 9443123313



    Last edited by chan; 6th Oct 2015 at 01:56 PM.
    jv_66 likes this.

  4. #4
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    நீங்கள் கங்காரு ஆகலாம்

    நீங்கள் கங்காரு ஆகலாம்

    டாக்டர் என். கங்கா




    பச்சிளம் குழந்தையை வெதுவெதுப்பாக பராமரிக்க வேண்டியிருப்பதால் கங்காரு மதர் கேர் அறிவுறுத்தப்படுகிறது. தாயின் நெஞ்சுப் பகுதியில் குழந்தையின் நெஞ்சும் வயிறும் படும்படியாக குழந்தையை வைக்க வேண்டும். இரண்டு மார்பகங்களுக்கு நடுவில் அழகாக குழந்தை ஒட்டிக் கொள்ளும். தலைக்குக் குல்லா, கைகளுக்கு உறை, இடுப்புத் துணி மட்டும் அணிவிக்க வேண்டும்.

    தாயின் ஜாக்கெட்டினுள் அருமையாக ஃபிட் ஆகிவிடும் குழந்தை! ஜாக்கெட்டுக்கு வெளியே தாயின் கழுத்துக்கு அருகில் குழந்தையின் தலை! இப்படி பல மணி நேரங்கள் பராமரிக்கலாம். இதற்கு மேலும் சூடு தேவைப்பட்டால் தாயையும் குழந்தையையும் ஒரு ஷால் கொண்டு போர்த்தலாம். அம்மாவுக்கும் பாப்பாவிற்கும் எத்தனை அதிகமாக தொடு உணர்வு கிடைக்கிறதோ அந்த அளவு தாய் சேய் பாசப்பிணைப்பு (mother infant bonding) வலுவடையும்.

    அம்மாவுக்கு களைப்பாக இருந்தால் பாட்டி, அத்தை, அப்பா, தாத்தா, மாமா ஆகியோர் கங்காரு ஆகலாம். ஆண்கள் இந்த முறையைக் கடைபிடிக்கும் போது சிறிது லூசான பனியனை அணிந்து அதன் மேல் வேட்டி அல்லது லுங்கி கட்டிக் கொண்டால் குழந்தை ந்ழுவி விடாது.

    கங்காருப் பையில் குட்டியை சுமப்பது போல் நாமும் சுமந்து கொண்டே வீட்டில் நடமாடலாம்.

    குழந்தை பிறந்த ஒரு மணி நேரத்துக்குள் தாயிடம் பாலூட்ட விட வேண்டும். ஆபரேஷன் செய்திருந்தால் தாய்க்கு மயக்கம் தெளிந்தவுடன் சுமார் 2 மணி நேரத்தில் அருகில் இருப்பவர் உதவியுடன் குழந்தைக்குப் பாலூட்ட ஆரம்பிக்க வேண்டும். பிறந்த சிசுவிற்கு தாய்ப்பாலைத் தவிர வேறு எதுவும் தரக்கூடாது. சர்க்கரைத் தண்ணீர், க்ளுக்கோஸ், தேன், விளக்கெண்ணை, வெல்லக் கலவை போன்ற எதுவும் தரக் கூடாது.

    இந்த வகைப் பொருட்களை ருசி கண்ட குழந்தை தாயிடம் சரிவர பால் குடிப்பதில்லை. பவுடர் பால், மாட்டுப்பால், ஊட்டி போன்றவையும் கூடாது. குழந்தை பிறந்த 2-3 நாட்கள் தாயிடம் சுரப்பது colostrums எனப்படும் சீம்பால். இதில் நோய் எதிர்ப்பு சக்திகள் செரிந்து இருக்கின்றன. குழந்தைக்குத் தேவையான எல்லா சத்துக்களும் இருக்கின்றன.

    முதல் முதலில் பால் ஊட்டப்பழகும் குழந்தைக்கு சில கஷ்டங்கள் இருக்கும். இதனை மிக அழகாக baby shy breast. Breast shy baby என்பார்கள். அதாவது ஆரம்பத்தில் குழந்தையும் சரியாக பால் ஊட்டாது, மார்பகமும் சரியாக பாலை சுரக்காது. குழந்தை உறிஞ்சிக் குடிக்க குடிக்க பால் சுரக்கும். இது ஒரு Reflex செயல்பாடு. இறைக்க இறைக்க நீர் ஊறுவது இல்லையா. அதைப் போல! ஒரு வாரத்தில் தானாகப் பழகிவிடும்.

    முதல் 1 மணி நேரத்தில் தாய்ப்பால் கொடுப்பதால் 10 லட்சம் குழந்தைகள் இறப்பதைத் தடுக்கலாம். பாலூட்டும் போது தாய்க்கு முதுகு, அடி வயிறு, மார்பகம் போன்றவை வலிக்கலாம். நமது குடும்பத்தின் வாரிசிக்கு அமுதைத் தருகிறோம் என்று நினைத்து விட்டால் எப்படிப்பட்ட வலியும் பறந்தோடி விடாதா?

    பிறந்த குழந்தை சுமார் 18 மணி நேரம் தூங்கும். இது இயற்கை. சில சமயம் அரை மணி நேரத்தில் பாலுக்கு அழும் குழந்தை 5 மணி நேரம் வரை தூங்கலாம். அமைதியான தூக்கம் குழந்தைக்கு கட்டாயம் தேவை. உறங்கும் போதுதான் குழந்தையின் மூளை வளர்ச்சி நடைபெறுகிறது.

    வளர்ச்சி ஹார்மோன் (Growth Hormone) சுரக்கிறது. குழந்தை தூங்கும் போது எழுப்பக் கூடாது. மூளை வளர்ச்சி தடைபடக் கூடும். வாய் காய்ந்து விடும். குடல் ஒடுங்கிவிடும். எழுப்பிப் பாலைக் கொடு என்றெல்லாம் பாட்டியோ ஆயாவோ சொன்னால் தயவு செய்து காதில் வாங்காதீர்கள்.

    சிறு பாப்பாவிற்கு வயிறு கடாமுடா என்று அடிக்கடி உறுமும். சீறும்! இது குடலில் அசைவுகள் நல்ல முறையில் ஏற்படுவதைக் குறிக்கிறது. அஜீரணம் அல்ல!

    தொப்புள் கொடி காய்ந்து உலரும் வரைக் குழந்தையைக் குளிப்பாட்டக் கூடாது. பிறந்த குழந்தையின் மேல் படர்ந்திருக்கும் Vernix Caseasa என்ற ஒரு வகை வெண் படிமத்தைக் கூட அதிகம் துடைத்து எடுக்க வேண்டாம். குழந்தையின் உடல் வெதுவெதுப்பாக இருக்க இது உதவும்.

    குறை மாத அல்லது எடை குறைந்த குழந்தைக்கு தேங்காய் எண்ணை, கடுகு எண்ணை, ஆலிவ் எண்ணை போன்ற ஏதாவது ஒன்றை தோலில் தடவலாம். இது உடல் வெப்பத்தைப் பராமரிக்கும். தோலையும் மென்மையாக்கும். அதிக குளிர் பிரதேசங்களில் கடுகு எண்ணை தேவை! ஆலிவ் எண்ணை விலை அதிகம்! கட்டாயமில்லை. இந்த எண்ணையால் தோலின் நிறம் வெண்மை அடையாது. தோலின் நிறம் ஜீன் சம்மந்தப்பட்டது.

    தொப்புளில் சாதாரணமான பவுடர், ஆயின்மெண்ட் ஏதும் வேண்டாம். சீழ் தெரிந்தால் மருத்துவ ஆலோசனை படி செய்யலாம். தொப்புள் கொடி உலர்ந்து விழுவதற்கு ஒரு வாரம் ஆகலாம். சீழ் பிடித்துவிட்டால் அதிக நாளாகலாம். இந்த நேரத்தில் தாயின் வளையல், செயின், தாலிக் கொடி ஆடையில் ஹூக், பட்டன் போன்றவை மாட்டி இழுக்கலாம்.

    ஜாக்கிரதையாக பார்த்துக் கொள்ள வேண்டும். குழந்தைக்கு தொப்புள் உதிரும் வரை துணியால் உடம்பை நன்கு துடைத்து விடலாம். (Sponge bath) சுத்தமான வெள்ளை காட்டன் துணியை வெந்நீரில் நனைத்து, பிழிந்து சுத்தம் செய்யலாம். தொப்புளை நோக்கித் துடைக்கக் கூடாது. தனியான ஒரு துணியால் பிறப்பு உறுப்பை முன்புறம் ஆரம்பித்து பின்புறமாக சுத்தம் செய்யலாம். கண்களையும், காது மடல்களின் பின்னேயும் ஈரத்துணியால் துடைக்கலாம்.

    தொப்புள் கொடி உலர்ந்து விழுந்த பின், புண் ஆறிய பிறகு எண்ணை தடவி சிறிது நேரம் மசாஜ் செய்த பிறகு குளிக்க வைக்கலாம். அமிலத் தன்மையுள்ள சோப் (low ph soap) அல்லது சோப் திரவம் கொண்டு குழந்தையை குளிக்க வைக்கலாம்.

    ஒரு நாள் விட்டு ஒரு நாள் அல்லது வாரம் இருமுறை தலைகுளிக்க வைக்கலாம். இது சீசனுக்குத் தகுந்தபடி தலைக்கு எண்ணைத் தேய்த்து குளிக்க வைக்கக் கூடாது. சாம்பிராணி போடக் கூடாது. குழந்தையின் ஒரு கண்ணில் மட்டும் அல்லது இரண்டு கண்ணிலும் நீர் வடியலாம்.

    கண்களில் பீளை ஏற்பட்டு கண்கள் காலை நேரங்களில் ஒட்டிக் கொள்ளலாம். இது கண்ணீர் சுரக்கும் பாதையில் கோளாறு (Naso laerimal apparatus) என்பதைக் காட்டுகிறது. மருத்துவ ஆலோசனைப் படி கண்களுக்கு சொட்டு மருந்து, கண்ணின் அருகே மசாஜ் ஆகியவை பயன் அளிக்கும்.

    சுமார் 2 மாதம் முடியும் வரை குழந்தை ஒரு நாளைக்கு குறைந்தது 10 முறை சிறுநீர் கழிக்கும். முதல் 10 நாட்களில் 10-15 முறை மலம் கழிக்கும். தாய்ப்பால் குடிக்கும் குழந்தை பளிச் மஞ்சள் நிறத்தில் 2 நாணயம் அளவு சிறிது பிசுபிசுப்பில் ஒரு புளிப்பு வாடையுடன் மலம் கழிக்கும். பால் குடிக்கும் போதே மலம் வெளியாகும். இதெல்லாம் இயற்கை. இதே போல் உங்கள் செல்லம் 3-4 நாட்கள் மலம் போகாமலும் இருக்கலாம். மற்றபடி எந்த தொந்திரவும் இல்லையெனில் பயப்பட வேண்டாம்.

    பிறந்த சிசுவிற்கு பல காரணங்களால் மஞ்சள் காமாலை இருக்கலாம். இதைப் பற்றிய விளக்கம் உங்கள் டாக்டர் சொல்வார். அப்போது தாய்க்கு பத்தியம் ஏதும் தேவையில்லை. மஞ்சள் காமாலை குணமடைய காலை மாலை வெய்யிலில் வைக்கக் கூடாது. இதனால் வேறு பிரச்னைகள் உண்டாகும். முதல் 2-3 மாதங்கள் குழந்தை வாந்தி எடுப்பது இயற்கை. ஒவ்வொரு முறை பால் தரும்போதும் வாந்தி எடுத்தால் உங்கள் மருத்துவரைக் கேளுங்கள்.



    Last edited by chan; 6th Oct 2015 at 02:00 PM.
    jv_66 likes this.

  5. #5
    jv_66's Avatar
    jv_66 is offline Super Moderator Silver Ruler's of Penmai
    Real Name
    Jayanthy
    Gender
    Female
    Join Date
    Dec 2011
    Location
    Bangalore
    Posts
    31,985

    re: How to take care of the Newborn babies?- -இளம் பெற்றோர்களே.இங்கே கவனியுங்Ĩ

    Thanks for these suggestions.

    chan likes this.
    Jayanthy





  6. #6
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    Re: How to care for a newborn baby? - பச்சிளம் சிசுவைப் பாதுகாப்பது எபĮ

    பச்சிளம் குழந்தை பராமரிப்பு

    குழந்தை பிறந்தவுடன் எடையை அறிந்து கொள்வது கட்டாயம். நிறை மாத குழந்தை குறைந்தது, 2.5 கிலோ எடை இருக்க வேண்டும்; அதிக எடையாக, 4 முதல் 4.5 கிலோ இருக்கலாம்.

    குழந்தை பிறந்தவுடன், முதலில் நன்கு வீறிட்டு அழ வேண்டும். அப்போது தான், நுரையீரல் நன்கு சுருங்கி, விரிந்து மூச்சு விடுதலும், மூளைக்குத் தேவையான ரத்த ஓட்டமும் சீராகும்.

    குளிர் காலத்தில், 5 முதல் 6 அடுக்குத் துணி கொண்டு பாதுகாக்கலாம். வெளிர் நிறத்தில், வேலைப்பாடுகள் எதுவும் இல்லாத, பருத்தி சட்டையை முதலில் போட்டு, அதன் மேல் ஸ்வெட்டர் அல்லது கெட்டியான பனியனை போட்டு விடலாம். தலைக்கு பருத்தி குல்லா, கை, கால்களுக்கு உறை போடலாம்.

    குழந்தையின் சட்டையில் பட்டன், கொக்கி, ஜிப் இருக்கக் கூடாது. நாடா அல்லது வெல்க்ரோ நல்லது. கடைகளில் விற்கப்படும், 'நாப்கின், டயாபர்'களைத் தவிர்க்கலாம். ஏனெனில் குழந்தையின் மலம், சிறுநீர் அதிலேயே ஊறி, பிறப்பு உறுப்பில் கிருமித் தொற்று, புண் ஆகியவை ஏற்பட வாய்ப்பு உண்டு.

    பிறந்த குழந்தைக்கு நீர், மலம், இரண்டுமே அதிகம் வெளியேறும் என்பதால், புண்ணாகும் வாய்ப்பு அதிகம். பெண் குழந்தைக்கு இன்னும் அதிகமாக நோய் தொற்று ஏற்படக் கூடும். சுத்தமான வெள்ளை அல்லது வெளிர் நிற பருத்தி துணிகளை முக்கோணமாக மடித்து, தளர்வாக இடுப்பில் கட்டிவிடலாம்.

    ஜெ.குமுதா, பச்சிளம் குழந்தை நிபுணர், பேராசிரியர்.
    அரசு குழந்தைகள் நல மருத்துவமனை, ஓய்வு பெற்ற கண்காணிப்பாளர்.
    சென்னை. 94440 23733


    jv_66 likes this.

  7. #7
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    Baby care tips -குட்டிப் பாப்பாவை எப்படிப் பார்த்துக

    குட்டிப் பாப்பாவை எப்படிப் பார்த்துக்கணும்?



    தாயின் வயிற்றில் இருக்கும்போதே, ஸ்ரீமன்நாராயணின் கதையைக் கேட்டுப் பிரகலாதன் பக்திமானாக உருவானதாகச் சொல்கிறது புராணம். தாயின் கருவிலேயே குழந்தை தன் உணர்வுகளை உணர ஆரம்பித்துவிடுகிறது என்பதை இன்றைய மருத்துவ உலகமும் உறுதியாகச் சொல்கிறது. குழந்தைகளை நல்ல மனநிலையோடும், நற்சிந்தனையோடும் வைத்திருக்கவேண்டும் என்பதே பெற்ற வயிறுகளின் தவிப்பு. அறிவிலும், உடல் நலத்திலும் ஆகச்சிறந்த வாரிசாக தங்கள் குழந்தைகளை வளர்க்க பெற்றோர்கள் பெரிதும் போராடுகிறார்கள். 'ஐந்தில் வளையாதது’ என்பதுபோல் மழலையாக இருக்கும்போதே ஊட்டமான உணவு, ஆரோக்கியமான சூழல், உற்சாகமான மனநிலை, நல்ல பழக்கவழக்கங்கள் எனக் கற்றுக்கொடுக்காவிட்டால், வளர்ந்த பிறகு திருத்துவது ரொம்பவே சிரமம்.

    போட்டிகளும் ஆபத்துகளும் நிறைந்த இந்தக் காலகட்டத்தில் குழந்தை பிறந்தது முதல், பள்ளிக்குச் செல்லும் வரை அதாவது மூன்று வயது வரை உற்சாகமாக வளரக்கூடிய விஷயங்களை இதயபூர்வத்தோடு விவரிக்கிறது இந்த இணைப்பு.






    குழந்தையைத் தூக்கும் முறை:

    பிறந்த சில மாதங்களுக்கு குழந்தையின் தலை நிற்காமல் இருக்கும். குழந்தையைச் சரியாகத் தூக்காமல் போனால், சட்டெனக் குழந்தைகளுக்குச் சுளுக்கு, வலி வந்து வீரிடலாம். உரம் விழலாம். இதற்குச் சுய மருத்துவம் செய்யக் கூடாது. குழந்தையைத் தூக்கும்போது, நம் கைகளை நேராக அகட்டி, குழந்தையின் கழுத்தையும், தலையையும் பிடிமானம் கொடுத்தே தூக்க வேண்டும். திரும்பவும் இறக்கி, படுக்கவைக்கும்போது, தலையையும், கழுத்துப்பகுதியையும் ஒன்றாகக் கையால் பிடித்தபடி, மெதுவாக இறக்குங்கள். பஞ்சு போல் மென்மையாகக் கையாளுவதன்மூலம் பிஞ்சு உடலுக்கு அரவணைப்பும் பாதுகாப்பும் கிடைக்கும்.

    குளிப்பாட்டும் முறை:



    பிறந்த குழந்தைகளைத் தாயே பயமின்றிக் குளிப்பாட்டலாம். குழந்தைகளுக்கான பிரத்யேக எண்ணெயை உடலில் தடவி வருடிவிடுங்கள். நாம் தரையில் அமர்ந்தபடி, குழந்தையின் தலை இடது கையில் வருவதுபோலத் தூக்கிப் பிடிக்க வேண்டும். குழந்தையின் உடலை பேபி சோப் போட்டுக் குளிப்பாட்டி, பிறகு தலை முகத்தைக் கழுவுங்கள். தலைக்குக் குளிப்பாட்டும்போது, ஒரு கையை அகல விரித்து, குழந்தையின் நெற்றிப் பகுதியைப் பிடித்தபடி, தண்ணீர் ஊற்ற வேண்டும். வாயால் மூக்குச் சளியை எடுக்கிறேன் என்ற பெயரில் வாயால் ஊதுவது, அழுத்துவது கூடவே கூடாது. குளிப்பாட்டிய உடன் தலை, காது, மூக்கு, கழுத்துப் பகுதியை ஈரம் போகத் துவட்டுங்கள்.

    வாரம் ஒரு முறை மிகவும் மிதமான வெந்நீரில், சிறிது யூகலிப்டஸ் இலையைப் போட்டுக் குளிப்பாட்டினால், குழந்தை ஆரோக்கியமாக வளரும். நிம்மதியாகத் தூங்கும்.

    தாய்ப்பால் ஊட்டும் முறை:


    குழந்தை பிறந்தது முதல் 6 மாதம் வரை தாய்ப்பால்தான் கொடுக்கவேண்டும். குழந்தையின் வளர்ச்சிக்கும், நோய் எதிர்ப்புச் சக்திக்கும் தாய்ப்பால் மிகச் சிறந்த உணவு. தாய்ப்பால் கொடுக்கக் கொடுக்க, பால் அதிகம் சுரக்கும். தாய்ப்பால் சரியாகப் புகட்டுகிறோமா? குழந்தை சரியாகப் பால் குடிக்கிறதா என்பதை அறிந்துகொள்ள முதலில் குழந்தையின் வாய்ப் பகுதி அகலமாக விரிந்திருக்கிறதா என்று கவனியுங்கள். குழந்தையின் முகவாய் தாயின் மார்பைத் தொடுவதுபோல் இருக்கவேண்டும். மார்புக் காம்பின் கரியப் பகுதி குழந்தையின் வாயின் மேற்பகுதியில், கீழ்ப்பகுதியைவிட அதிகமாகக் காணப்படவேண்டும். அதாவது கவ்விய நிலையில் இருந்தால் குழந்தை ஆழமாக உறிஞ்சும். தாய்க்கும் மார்பு காம்பில் வலி ஏற்படாது. இது, தாய்க்கும் குழந்தைக்கும் இடையேயான ஒரு அற்புதப் பிணைப்பை உருவாக்கும்.

    தூங்கவைக்கும் முறை:



    குழந்தை தூங்கும் வரை, அதன் அருகில் அரவணைத்தபடி பால் கொடுத்துவிட்டு, தூங்கியதும், புடவையில் கட்டிய தூளியில் போடலாம். தூளி அதிக உயரத்தில் இல்லாமல், தரையோடு இருப்பதுபோல் பார்த்துக் கொள்ளுங்கள். தாயின் அரவணைப்பு தொடர்ந்து இருப்பதுபோல் அது உணரும். வெயில் காலத்தில் கட்டிலில் படுக்க வைப்பதைவிட, குழந்தைகளைத் தரையில் ஒரு பாயை விரித்து, அதில் பருத்திப் புடவையை மெத்தைபோல் நன்றாக மடித்துப் படுக்கவையுங்கள். உஷ்ணம் குழந்தையைத் தாக்காமல் குளிர்ச்சியாக உணரும். குழந்தையின் அருகில் கனமான பொருட்கள் எதையும் வைக்காதீர்கள். காற்றாடிக்கு நேராகப்படுக்க வைக்காதீர்கள். இதனால் குழந்தை மூச்சுத் திணறலுக்கு ஆளாக நேரிடும். காற்றாடியின் வேகத்தைக் குறைத்து, ஓரமான இடமாகத் தேர்ந்தெடுப்பது நல்லது. ஒரே இடத்தில் படுக்கவைத்தாலும், உடலில் சீக்கிரமே உஷ்ணம் ஏறிவிடும். இரண்டு மணி நேரத்துக்கு ஒருமுறை, குழந்தையை இடம் மாற்றிப் படுக்கவைக்க வேண்டும்.




    குழந்தைகள் வயிற்றுப்போக்கு, சளி, இருமல், காய்ச்சல் இவற்றால் அடிக்கடி சோர்ந்துவிடுவது உண்டு. உணவு வயிற்றுக்கு ஒப்புக்கொள்ளாமல்போவது, செரிமானப் பிரச்னை, வயிற்றில் பூச்சி போன்ற காரணங்களால் வயிற்றுப்போக்கு ஏற்படலாம். குழந்தைகள் எதைக் கண்டாலும், அதை உடனே வாயில் வைத்துக்கொள்வார்கள். அதனால், கிருமிகள் வயிற்றில் சென்று, பிரச்னையை ஏற்படுத்திவிடும். சர்க்கரை மற்றும் உப்பை நீரில் கலந்து கொடுத்தால், உடலில் இருக்கும் கழிவுகளும் கிருமிகளும் வெளியேற்றப்படும். வயிற்றுப்போக்கும் சரியாகும்.

    அதிகக் குளிர்ச்சி, தொற்றுநோய் இருந்தாலும் காய்ச்சல் வரும். பல்வேறு நோய்களுக்குத் தண்ணீரே முக்கியக் காரணம். அதனால், தண்ணீரை நன்றாகக் காய்ச்சி, ஆறவைத்து, வடிகட்டிக் கொடுப்பது அவசியம். தொற்று நோய்களால் மூக்கு ஒழுகுதல், இருமல், காய்ச்சல் போன்றவை ஏற்படும். இவை நீடித்தால், பிற்காலத்தில் குழந்தைகளுக்கு ஆஸ்துமா உள்ளிட்ட தேவையற்ற பிரச்னைகள் வர வாய்ப்பு இருக்கிறது. சுற்றுப்புறத்தைச் சுகாதாரத்துடன் வைத்துக் கொள்வது நல்லது. குழந்தைகளுக்கு அணிவிக்கும் டயபர்களால்கூட சளி ஏற்படலாம். சிறுநீர் கழித்ததும், உடனுக்குடன் கவனித்து, மாற்றவேண்டியது அவசியம்.

    டயபரை அடிக்கடி மாற்றாமல் போகும்போதும், இறுக்கமாக அணிவிக்கும்போதும் குழந்தைகளுக்குச் சருமத்தில் அரிப்பு ஏற்படலாம். டயபரைக் குழந்தைக்குப் போடும்போதே, அதன் கால் இடுக்குப் பகுதியில் பேபி ஆயில் அல்லது தேங்காய் எண்ணெய் தடவிவிட்டுப் போடுங்கள். இதனால், குழந்தைக்கு அரிப்பு, அலர்ஜி ஏற்படாமல் இருக்கும்.

    நோய் தடுக்கும் மருந்துகள்...
    குழந்தை பிறந்தவுடன் மருத்துவமனையிலேயே மருந்துகள், தடுப்பு ஊசிகளைப் போட்டுவிடுகிறார்கள். அவை என்ன தடுப்பு ஊசி, என்ன மருந்து என்பதைத் தெரிந்துகொள்ளுங்கள்.

    குழந்தை பிறந்ததும், காசநோய் (பி.சி.ஜி), போலியோ சொட்டு மருந்து, ஹெபடைடிஸ் பி முதல் டோஸ் போடவேண்டும்.

    ஒன்றரை மாதத்தில், டிபிடி (தொண்டை அடைப்பான், கக்குவான் இருமல், ரண ஜன்னி தடுப்பு ஊசி) மற்றும் போலியோ சொட்டு மருந்து, ஹெபடைடிஸ் பி இரண்டாவது டோஸ்.

    மூன்றரை மாதத்தில் டிபிடி மற்றும் போலியோ சொட்டு மருந்து.

    நான்கரை மாதத்தில் போலியோ சொட்டு மருந்து.

    ஐந்தரை மாதத்தில் போலியோ சொட்டு மருந்து, ஹெபடைடிஸ் பி மூன்றாவது டோஸ்.

    ஒன்பதாவது மாதத்தில் தட்டம்மை தடுப்பு ஊசி மற்றும் போலியோ சொட்டு மருந்து.

    குழந்தைகளுக்குப் போடப்படும் தடுப்பு ஊசிகள்...

    ஒன்றே கால் வயதில் தட்டம்மை, ஜெர்மன் தட்டம்மை, புட்டாளம்மை தடுப்பு ஊசி

    ஒன்றரை வயதில் டிபிடி

    நாலரை வயதில் டிபிடி மற்றும் போலியோ சொட்டு மருந்து.

    இப்படி அந்தந்தக் காலக்கட்டத்தில் கட் டாயம் நோய் தடுப்பு ஊசி, மருந்துகளைப் போடுவதன் மூலம், வருங்காலத்தில் குழந்தைகள் நோய் நொடி இல்லாமல் ஆரோக்கியமாக வளர்வது நிச்சயம்.



    குழந்தைக்கு நம்பகமான சூழலும், தாயின் அரவணைப்பும் மிகவும் அவசியம். பாசமும், பாதுகாப்பும் இருப்பதைக் குழந்தைக்கு உறுதிப்படுத்தினால்தான் அதன் வளர்ச்சி ஆரோக்கியமாக இருக்கும். தொடுதல், கொஞ்சுதல், பேசுதல் போன்ற செயல்களின் மூலம், குழந்தை நம் முகம் பார்த்து வாயைக் குவித்து வார்த்தைகளை வெளிப்படுத்த முயற்சிக்கும். சிந்திக்கும் திறன் அதிகரிக்கும்.

    வளர்ப்பவர்களைப் பார்த்தே குழந்தையின் பழக்கவழக்கங்களும் இருக்கும். இன்றைய காலக்கட்டத்தில் பெற்றோர் இருவரும் வேலைக்குச் செல்லும் சூழல். ஒரு நாளில் தாய், குழந்தையுடன் செலவிடும் நேரம் குழந்தையின் விருப்பங்களுக்கு முக்கியத்துவம் தருவதாக இருக்க வேண்டும். குழந்தைகளின் செயல்களைப் பாராட்டுவதும், சிறு தவறு செய்தால் 'ஸாரி’ கேட்பதும், எடுத்த பொருட்களை அதற்கான இடத்தில் வைக்கப் பழக்குவதும் பெற்றோரின் கடமை. விட்டுக் கொடுத்துப் போகும் குணம்தான் சமூகத்தில் குழந்தையின் சிறப்பான வளர்ச்சிக்கு உறுதுணையாக இருக்கும்.

    எதைப் பார்த்தாலும், ஆசை எழும்பும் வயது. அதற்காக, கேட்டதை எல்லாம் வாங்கித் தருவதைக் குறைத்துக்கொள்ளுங்கள். உங்களின் குடும்பச் சூழல், வசதி, தேவையைப் புரிந்துகொண்டு, அதற்கேற்ப வாழும் சூழலை உருவாக்குங்கள். பிஞ்சிலேயே இந்த பழக்கத்தை ஏற்படுத்தினால், எதிர்காலத்தில் வாழும் சூழல், பொறுப்பு அறிந்து செயல்படுவார்கள். குழந்தையின் மனதில் தேவை இல்லாத ஆசைகள் இருக்காது. மனக்குழப்பமும் ஏற்படாமல், தெளிவாய் சிந்திக்கும் ஆற்றல் பெருகும்.



    நடப்பது, ஓடுவது, விளையாடுவது, எதையாவது எடுத்து வீசுவது என சுட்டிகள் துறுதுறுவென இருப்பார்கள். இதைத் தொல்லையாக நினைக்காமல் பெற்றோரும் கூடவே குழந்தையை உற்சாகப்படுத்தவேண்டும். இது பெற்றோருக்கும் ஓர் உடற்பயிற்சிதான்.

    பிஞ்சு குழந்தைகள் இருக்கும் வீட்டில், பெரியவர்கள் குரலை உயர்த்திப் பேசுவதோ, கத்துவதோ கூடாது. சுற்றி இருக்கும் விஷயத்தைக் கிரகிக்கத்தொடங்கும்போது, சத்தமான பேச்சுகூட குழந்தைக்குப் பயத்தை ஏற்படுத்தலாம்.

    சாப்பிட அடம்பிடித்தாலோ, அழுகையை நிறுத்துவதற்காகவோ குழந்தையிடம் 'பூச்சாண்டி வர்றான் பாரு’ என்று பயம் காட்டிப் பணியவைக்கக் கூடாது. குழந்தைகளுக்கு அழுகை என்பது ஓர் உணர்ச்சி வெளிப்பாடு. பின்னாளில் உணவையே வெறுக்கும் அளவுக்குச் சாப்பாட்டின் மீதான பிடிப்பு போய்விடலாம். அன்போடு, நெறிக் கதைகளைச் சொல்லி உணவை ஊட்டுவதே சிறந்தது.

    சிலர் குழந்தைகளை மேலே தூக்கிப்போட்டு விளையாடுவது, சுழற்றி விளையாடுவது என்று விபரீதமாகக் கொஞ்சுவார்கள். இதனால், குழந்தை சிரிப்பதைப் பார்த்து, ரசிப்பதாக நினைத்துக்கொண்டு திரும்பத் திரும்பச் செய்வார்கள். இது மிகவும் ஆபத்தான விஷயம். குழந்தைகளுக்கு மனதளவில் இனம் புரியாத பய உணர்வு ஏற்படும். 'இதைச் செய்யாதே’ எனத் தடை போடுவதே குழந்தையின் பயத்தை அதிகரிக்க செய்யும். அதே எச்சரிக்கையை, 'ஜாக்கிரதையாகப் பண்ணும்மா...’ என்று சொன்னால் குழந்தைகள் மனதில் பாதுகாப்பு உணர்வு ஏற்படும். நல்ல பண்புகளும் வளரும்.

    குழந்தைகள் நடக்க ஆரம்பித்ததும், வீட்டையே சுற்றிச்சுற்றி வலம் வரத்தொடங்கும். அடிக்கடித் தடுக்கி விழும். குழந்தைகள் நடக்கக்கூடிய இடங்களில் கூர்மையான டேபிள், ஸ்டூல் போன்ற எந்தப் பொருட்களையும் வைக்காதீர்கள். தண்ணீர், எண்ணெய் போன்றவை கொட்டிவிட்டாலும், உடனடியாகக் கவனிக்கவேண்டும். குழந்தையின் மீது எப்போதும் ஒரு கண் வைத்துக்கொண்டே இருப்பது மிகவும் முக்கியம்.

    அன்பு, பாசம், அரவணைப்பு எனச் சகல சந்தோஷ சூழலில் வளரும் குழந்தைகள் தன்னம்பிக்கை, தைரியத்துடன் அறிவாளியாகவும் வளர்வார்கள்.

    Last edited by chan; 30th Mar 2016 at 12:24 PM.
    jv_66 likes this.

  8. #8
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    Re: குட்டிப் பாப்பாவை எப்படிப் பார்த்துக்&

    குட்டிப் பாப்பாவை எப்படிப் பார்த்துக்கணும்?

    குழந்தைக்குத் தேவையான உணவு உடலில் சேர்கிறதா என்பதை அறிந்துகொள்ள முதலில் குழந்தையின் எடையைக் கவனிக்க வேண்டும். குழந்தை பிறக்கும்போது 2.75 கிலோ இருந்தால், நான்கே மாதத்தில் அதன் எடை 5 கிலோ இருக்க வேண்டும். எடை ஓரளவு இரட்டிப்பானால்தான், குழந்தை சரியான வளர்ச்சியில் இருக்கிறது என்று அர்த்தம்.


    உடை

    பிஞ்சுக் குழந்தைகளின் உடை பஞ்சுபோல் மிருதுவாக இருக்கவேண்டும். டிசைன், கலர், அழகு என்பதை மட்டும் பார்க்காமல், உடலை வதைக்காத பருத்தி ஆடைகளைத் தேர்ந்தெடுப்பது நல்லது. ஒரு மாதக் குழந்தைக்கும் இப்போது பாவாடை, சட்டை வந்துவிட்டது.

    இவற்றைப் போட்டுப் அழகுபார்ப்பது, குழந்தைக்கு இம்சையை ஏற்படுத்தலாம். உடைகளால் ஏற்படும் அசௌகரியங்களைக் குழந்தையால் வெளியில் சொல்ல முடியாது.

    வெயில் காலத்தில் பருத்தியால் ஆன உடைகளே குழந்தைகளின் உடலுக்குப் பாதுகாப்பு. மிகவும் இறுக்கமான ஆடைகள் அணிவிப்பதை முடிந்தமட்டும் தவிர்த்துவிடுங்கள். அடிக்கடி மாற்ற வேண்டிய சூழல் ஏற்படுவதால், எளிதில் கழற்றி மாற்றக்கூடிய உடைகளை வாங்குங்கள்.

    கடைகளிலேயே குழந்தைகளுக்கு உடைகளைப் போட்டுப் பார்த்து வாங்கும் நிலை இருப்பதால், புதுத் துணிகளை வாங்கியவுடன், நன்றாக அலசிக் காயவைத்த பிறகே அணிவது நல்லது.

    ஜிகினா, ஜம்கி உடைகளில் பட்டன்கள், ஊக்கு, கொக்கிகள் இருந்தால் அது குழந்தையின் உடலை உறுத்தலாம். குழந்தைகள் கையில் எடுத்து வாயில் போட்டுக்கொள்ளவும் வாய்ப்பு உண்டு. அதனால், வெல்க்ரோ, எலாஸ்டிக், லேஸ் உடைகளைத் தேர்ந்தெடுங்கள். மழைக் காலத்திலும், ஸ்வெட்டர் குல்லா போன்றவற்றை உடுத்தும்போது, ஜிப் இல்லாததாகப் பார்த்து, கழுத்துவழியாக மாட்டுவதுபோல் வாங்கலாம்.

    குழந்தை 3 மாதத்துக்குள் முகம் பார்த்து சிரிக்கும். நீங்கள் 'ம்...’ என்று சொன்னால், குழந்தையும் 'ம்’ என்று சொல்லும். காதில் வாங்கும் சத்தத்தை உணர்ந்து, திரும்பவும் அதைச் சொல்லிப்பார்க்கும். அதனால், மென்மையான ஒலி எழுப்பிக் குழந்தையை உற்சாகப்படுத்தலாம்.

    4-வது மாதம், கவிழ்ந்துகொண்டு, தனது கைகளைத் தரையில் ஊன்றித் தலையைத் தூக்கிப் பார்க்க



    குழந்தை முயற்சிக்கும். குழந்தையை நிற்கவைக்க, இந்த மாதம் முதல் பழகலாம். கைகளில் எதையாவது கொடுத்து குழந்தையை நிற்கவைக்கலாம்.

    5 - 6 மாதங்களில் குழந்தை உட்க£ர முயற்சிக்கும். தலையையும் நெஞ்சையும் உயர்த்தும். எதையாவது பிடித்துக்கொண்டு அதனால் உட்கார முடியும். பிடிமானம் விடுபட்டால் கீழே விழும். தரையில் அழுத்தமாக முன்னங்கையை ஊன்றித் தலையைத் தூக்கிப் பார்க்கும்.

    6 மாதங்களுக்குப் பிறகு பற்கள் முளைக்க தொடங்கும். அப்போது, வாயில் இருந்து அதிகமான அளவு எச்சில் வெளிவரும். தண்ணீர், பால் கொடுக்கும்
    போதும், வாயில் அதிகமாக எச்சில் சொட்ட ஆரம்பிக்கும்.



    துணிகள் ஈரமாக இருந்தால் அடிக்கடி மாற்ற வேண்டும். பற்கள் முளைப்பதன் அறிகுறி தென்பட்டாலே, குழந்தை வலியால் அடிக்கடி அழத் தொடங்கும். குழந்தை நல மருத்துவரை அணுகி, குழந்தைக்கு ஏற்ற வலி நிவாரணி மருந்தைக் கொடுக்கலாம். பற்கள் முளைக்கும்போது ஈறுகளில் அரிப்பு, வலி, எரிச்சல் இருக்கும். பால் குடிப்பதைக்கூட குழந்தை மறுக்கும். சில நேரங்களில் வயிற்றுப்போக்கு ஏற்படலாம்.

    பற்கள் முளைக்கும்போது குழந்தைகள் தூக்கம் இல்லாமல், புரண்டு புரண்டு படுக்கும். நடு ராத்திரியில் எழுந்து அழத் தொடங்கும்.

    7-வது மாதம் - எந்த உறுதுணையும் இல்லாமலே குழந்தை உட்காரப் பழகிக்கொள்ளும். உடலின் எடையில் ஒரு பகுதியைக் கால்களில் தாங்கியபடி நின்று, தானே நேராக நிற்கப் பழகும்.

    8 - 9 மாதங்களில், நன்றாகவே உட்காரும். கால்களில் மொத்த எடையையும் தாங்கிக்கொள்ளப் பழகும். எதைக் கொடுத்தாலும், அதைத் தன் இரண்டு கைகளாலும் பிடித்துக்கொள்ளும். சின்னச் சின்னப் பொருட்களை ஒன்றாகச் சேர்க்கவும், அடுக்கவும் கற்றுக்கொள்ளும்.

    பத்தாம் மாதம், நன்றாகத் தவழ்ந்துபோய் எல்லாப் பொருட்களையும் எடுக்க ஆரம்பிக்கும். எதையாவது பிடித்தபடி ஓர் இடத்தில் இருந்து, இன்னோர் இடத்துக்கு நகரும். இரண்டு கைகளையும் சேர்த்துத் தட்டக் கற்றுக்கொள்ளும்.

    11 - 12 மாதம் - உட்கார்ந்த நிலையில் திரும்பவும், நன்றாக முழங்கால்களை ஊன்றித் தவழவும் முடியும். நேராக நிற்கும். தரையில் எதையாவது எழுதுகிற மாதிரி செய்யும். ஒரு கையில் மட்டும் பிடிமானம் இருந்தாலும், நேராக நிற்கப் பழகும். ஆட்காட்டி விரல் மற்றும் கட்டை விரலை உபயோகித்துப் பொருட்களை எடுக்கக் கற்றுக்கொள்ளும்.

    2 - 3 வயதில், அம்மா அப்பா பேசுவதை உன்னிப்பாகக் கேட்டு, அதற்குப் பதில் சொல்லத் தொடங்கும். பெற்றோர் அதிகம் பேசுவதால் மட்டுமே, குழந்தை நல்ல பேச்சுத் திறனுடன் பிரகாசமாக ஜொலிக்கும். இந்த வயதில் குழந்தையுடனான உரையாடல் இல்லாமல் போனால், குழந்தை பேசுவதும் தாமதமாகிவிடும். குழந்தை சரியாக பேசவில்லை என்பதை உணர்ந்தால், 'ஸ்பீச் தெரப்பிஸ்ட்’டிடம் ஆலோசனை பெறுவது அவசியம்.

    கிடைப்பதை எல்லாம் வாயில் வைக்கும் பழக்கம், விரல் சூப்பும் பழக்கம் குழந்தைகளுக்கு ஏற்படுவது சகஜம்தான். ஒருவிதப் பயத்தினாலும் சில குழந்தைகள் விரலைச் சூப்பலாம். ஆனால், அதுவே தானாகச் சரியாகிவிடும். 'விரல் சூப்பினால் வாய் பெரிதாகிவிடும் கண்ணா... கிருமிகள் வயித்துக்குள்ள போய் ஃபைட் பண்ணும்’ என்று மென்மையாக ஒரு கதை போல் சொன்னால், நிச்சயம் குழந்தைகள் அந்தப் பழக்கத்தை விட்டுவிடுவார்கள்.

    குழந்தைகளுக்கான மென்மையான பிரஷினால் பல் தேய்த்து, வாய் கொப்பளித்த பின்னரே வயிற்றுக்கான ஆகாரத்தைத் தரப் பழக்குங்கள். பல் துலக்காமல் சாப்பிடும்போது, வாயில் உள்ள கிருமிகள் வயிற்றுக்குள் போய் பல்வேறு பிரச்னைகளை உண்டாக்கும்.

    இரண்டு வயது குழந்தைகள் 10 மணி நேரம் நன்றாக உறங்குவார்கள். சில குழந்தைகள் அதிக நேரம் தூங்க மாட்டார்கள். அதற்கு வீட்டுச் சூழல், அறையின் உஷ்ணம், சத்தம், கொசுக்கடி போன்ற ஏதாவது காரணம் இருக்கும். குழந்தை குறைவான நேரமே தூங்கினாலும், சுறுசுறுப்பாக இருந்தால், அதை நினைத்துக் கவலைப்பட வேண்டியது இல்லை.

    சில குழந்தைகள் மூன்று, நான்கு நாட்களுக்கு ஒருமுறை மலம் கழிப்பார்கள்.
    சில நேரங்களில்


    பச்சையாகவும் மலம் வெளியேறும். எப்போதாவது இப்படி நிகழ்ந்தால் ஆபத்து இல்லை. ஆனால், தொடர்ச்சியாகப் பச்சை நிறத்தில் இருந்தாலோ, வயிற்றை இளக்கிச் சென்றாலோ மருத்துவரிடம் காட்டுவதே நல்லது.
    ஒரு வயதான பிறகு சிறுநீர், மலம் கழிப்பது எப்படி என்பதைக் குழந்தைக்குக் கற்றுக்கொடுங்கள்.

    ஓடிப் பிடித்து விளையாடுவது, விளையாட்டுப் பொருட்களை வாங்கித் தந்து ஊக்குவிப்பது, கற்பனைத் திறனை அதிகரிக்கச் செய்யும் ஓவியம், பெயிண்டிங் கற்றுத் தருவது, இசையைக் கேட்கச் செய்வது, களிமண் அல்லது சப்பாத்தி மாவைப் பிசைந்து பலவிதமான உருவங்கள் செய்யச் சொல்வது, பேப்பர்களை மடக்கி விமானம், கப்பல், பூக்கள் செய்யக் கற்றுக்கொடுப்பது எனக் குழந்தைகளுக்கான உற்சாக வழிகளைத் திறந்துவிடுங்கள். குழந்தைகளுக்குப் பயனாக இருக்கும்பட்சத்தில்மட்டும் தொலைக்காட்சிப் பெட்டியின் முன்னால் உட்காரவையுங்கள். தொலைக்காட்சி நிகழ்ச்சிகளுக்குக் குழந்தைகள் அடிமையாகிவிடாமல் பார்த்துக் கொள்ளுங்கள்.

    சுவைக்கும் பேச்சுக்கும் நிறையத் தொடர்பு உண்டு. இனிப்பு, உவர்ப்பு, புளிப்பு, காரம் என அனைத்து சுவைகளும் பழகியக் குழந்தைக்கு பேச்சில் பிரச்னை இருக்காது. ஏதாவது ஒரு சுவை மட்டுமே பழக்கப்பட்ட குழந்தைக்குப் பேச்சு தெளிவாக இருக்காது. கோர்வையாக வார்த்தைகளைப் பேசத் தாமதம் ஆகலாம். ஆகவே, அனைத்து சுவைகளையும் சுவைக்கப் பழக்குங்கள்.

    குழந்தையால் எவ்வளவு சாப்பிட முடியுமோ... அந்த அளவு மட்டுமே உணவு கொடுங்கள். சாப்பிட்டு முடித்த உடன், 'வெரிகுட்’ சொல்லுங்கள். 'சமத்து’ எனக் கொஞ்சுங்கள். குழந்தைத் தானாக முன்வந்து சாப்பிடும்போது, உணவு சிந்தினாலோ, கொட்டினாலோ, திட்டாதீர்கள். சிந்தாமல் சிதறாமல் சாப்பிடக் கற்றுக்கொடுங்கள். துவைத்த துணிகளை மடித்து, குழந்தைகளை பீரோவில் அடுக்கச் சொல்லுங்கள். சுவாரஸ்ய அனுபவமாக நினைத்து குழந்தைகள் அந்த வேலையை உற்சாகமாகச் செய்வார்கள். வேலை, விளையாட்டு, உணவு என அனைத்தின் வழியாகவும் பழக்கங்களை உருவாக்கலாம்.

    சமைக்கும்போது, 'இது தக்காளி, இது வெண்டைக்காய்... இதை நான் நறுக்கப்போறேன்’ என்று காய்கறிகளைக் காட்டி, வார்த்தைகளைக் கற்றுக்கொள்ளும் வாய்ப்பை ஏற்படுத்தலாம். குழந்தை சுயமாகச் சிந்திக்கவும், அனைத்து செயல்களைத் திறமையாகச் செய்யவும் இது வாய்ப்பாக அமையும். 'செய்யாதே’ எனத் தடுப்பதற்கு முன் எதைச் செய்யலாம் என்பதைக் கற்றுக்கொடுங்கள். ஒரு பாராட்டும் முத்தமும் குழந்தையின் பிரகாசமான வாழ்க்கைக்கு வழிவகுக்கும்.

    குழந்தை பிறந்து முதல் 6 மாதங்களுக்குக் கட்டாய உணவு தாய்ப்பால் மட்டுமே. முதல் 6 மாதங்கள் தாயிடம் இருந்து பால் குடிப்பதால், வைட்டமின் சி கிடைத்துவிடும். அதன் பிறகு தாய்ப்பாலுடன், காய்கறிகள், பழங்கள், சீரான திட உணவைக் குழந்தைக்குக் கொடுக்கத் தொடங்கலாம்.

    கஞ்சிகளைக் கொடுக்கலாம். தானியங்களை நன்றாக அரைத்து, சலித்து, அந்த மாவில் கஞ்சியாக நீர்க்கக் காய்ச்சிக் கொடுக்கவேண்டும்.

    வாழைப்பழம், சப்போட்டா இவற்றை நன்றாக மசித்துத் தரலாம். நன்றாக வேகவைக்கப்பட்ட முட்டையின் மஞ்சள் கருவை மசித்துத் தரலாம்.

    குழைய வடித்த சாதத்தில் பருப்பை மசித்து, நெய் சேர்த்துத் தரலாம். இதனுடன் உருளைக்கிழங்கு, கேரட், பீன்ஸ் போன்ற பச்சைக் காய்கறிகளையும் லேசாக வேகவைத்து மசித்துச் சேர்க்கலாம்.

    இரண்டு ஸ்பூன் கேழ்வரகை முந்தைய நாள் இரவு ஊற வைத்து, மறுநாள் காலையில் அரைத்துக்கொள்ளுங்கள். சிறிது தண்ணீரை அடுப்பில் வைத்து, அரைத்த கேழ்வரகு விழுதை ஒரு துணியில் போட்டு வடிகட்டி, அந்தப் பாலை விட்டுக் கைவிடாமல் 2 நிமிடம் கிளறவும். இதில் பால், சர்க்கரை சேர்த்துக் கொடுக்கலாம்.

    வளரும் குழந்தைக்குப் பால் போஷாக்கான உணவு. ஆனால், பாலை நன்றாகக் காய்ச்சித்தான் தர வேண்டும். அதேபோல் முட்டையை வேகவைத்து அதைக் குளிரவைத்துத் தர வேண்டும்.

    தண்ணீரையும் நன்றாகக் காய்ச்சி ஆறவைத்து வடிகட்டி குழந்தைக்குக் கொடுக்கலாம்.

    குழந்தைக்கு 7 முதல் 8 மாதங்கள் நிறைவடைந்ததும், தயிர் சாதம் கொடுக்கலாம். சிலர் சளி பிடிக்கும் என்று தவிர்த்துவிடுவார்கள். தயிர் வயிற்றுக்கு மிகவும் நல்லது. வயிற்றில் புண் வராமல் தடுக்கும். அதிக அளவு பழச்சாறுகள், காய்கறிகளில் சூப் செய்து தரலாம். அந்த சீசனில் கிடைக்கும் பழங்கள், காய்கறிகளைக் குழந்தைக்கு ஏற்றபடி செய்து தரலாம்.

    9 முதல் 10-வது மாதத்தில் ஆப்பிள், வாழைப்பழம், கொய்யா போன்ற வெரைட்டியான பழங்கள், வைட்டமின் சி அடங்கிய நெல்லிக்காய் மசித்துக் கொடுக்கலாம். பழச்சாறாகவும் கொடுக்கலாம்.

    எந்தப் பழத்தில் சாறு தயாரித்துக் கொடுத்தாலும், அதை வடிகட்டிய பிறகே தரவேண்டும். கொட்டைகள் சரியாக அரைபடாமல் இருந்தால், குழந்தையின் மூச்சுக் குழாயில் சிக்கும் அபாயம் இருக்கிறது. பழங்களைத் தரும்போது அதை நன்றாகக் கழுவி மசித்த பிறகே தர வேண்டும். இட்லி, உப்புமா, சப்பாத்தி, தயிர், வேகவைத்த முட்டை, முள் நீக்கப்பட்ட மீன் தரலாம்.

    குழந்தைகளின் வளர்ச்சிக்கான காலகட்டம் 7 மாதம் முதல் ஒன்றரை வயது வரை. இதில் புரதசத்து மிகவும் அத்தியாவசியம். வைட்டமின் சி, பி காம்ப்ளெக்ஸ், கொழுப்பு என நிறைய சத்துக்கள் தேவைப்படும்.

    6 மாதங்களுக்குப் பிறகு குழந்தைக்கு மற்ற உணவுகள் தேவைப்பட்டாலும், சத்து, புரதம் மற்றும் வைட்டமின் ஏ, இரும்புச் சத்து போன்றவைகளுக்குத் தாய்ப்பாலே சிறந்த மூலப்பொருள். குழந்தை தாய்ப்பால் குடிக்கும் வரை நோய்களில் இருந்து தாய்ப்பால் பாதுகாப்பு அளிக்கிறது.

    6 மாதத்தில் இருந்து ஒரு வயது வரை மற்ற உணவுகளுக்கு முன்பாக தாய்ப்பால் தரவேண்டும். குழந்தையின் உணவில், வைட்டமின் மற்றும் தாதுக்கள் கிடைக்க, தோல் நீக்கி, வேகவைத்து, மசிக்கப்பட்ட காய்கறிகள், தானியங்கள், பருப்பு வகைகள் மற்றும் பழங்கள், எண்ணெய், மீன், முட்டை, பால் சார்ந்த பொருட்கள் இருக்க வேண்டும். இரண்டாவது வயதில், தாய்ப்பாலை உணவுக்குப் பிறகும் மற்ற நேரங்களிலும் தரவேண்டும்.


    Last edited by chan; 30th Mar 2016 at 12:27 PM.
    jv_66 likes this.

  9. #9
    chan's Avatar
    chan is offline Ruler's of Penmai
    Gender
    Female
    Join Date
    Mar 2012
    Location
    chennai
    Posts
    17,520

    Re: குட்டிப் பாப்பாவை எப்படிப் பார்த்துக்&

    குட்டிப் பாப்பாவை எப்படிப் பார்த்துக்கணும்?

    1 வயது முதல் மூன்று வயது வரை

    ஒரு வயது நிறைந்த குழந்தைகளுக்கு இனிப்பு வகைகளை அதிகம் தரக் கூடாது. ஒருமுறை மட்டுமே பழரசம் கொடுக்கலாம். நாம் சாப்பிடும் உணவுகளைக்



    குழந்தைக்குத் தரலாம். கட்டாயப்படுத்திச்சாப்பிடவைக்கக் கூடாது. ஒரே மாதிரியாகச் செய்யாமல், விதவிதமாக செய்து தரவேண்டும். உணவில் தினமும் கீரை நல்லது. கீரையில் ஒரு நாள் கூட்டு, மறுநாள் மசியல், மறுநாள் பருப்பு கடைசல் என வெரைட்டியாகச் செய்துதந்தால், குழந்தைகள் விரும்பிச் சாப்பிடும்.

    எந்த உணவையும் முதலில் சிறிது கொடுத்த பிறகு, கொஞ்சம் கொஞ்சமாக அதிகரிக்க வேண்டும். எடுத்தவுடன் திணிக்கக் கூடாது.

    இந்த வயதில் குழந்தைகளின் மூளை வளர்ச்சி மிக அதிகமாக இருக்கும். இந்தக் காலகட்டத்தில் கொழுப்பு நிறைந்த உணவுகள் அவசியம். குழந்தைகளின் எடைக்கு ஏற்ப ஒரு கிலோவுக்கு 100 கி. கலோரி, 1.2 கிராம் புரதம் மற்றும் வைட்டமின் ஏ, சி சத்துள்ள உணவுகளைக் கொடுக்க வேண்டும்.
    சாப்பிட அடம்பிடிக்கும் குழந்தைகளுக்கு எதிர்ப்புச் சக்தி குறையும். இதைத் தவிர்க்க மஞ்சள் நிறப் பழங்களைக் கொடுக்கலாம்.

    கேரட், உருளைக்கிழங்கு, மீன், கீரை ஆகியவற்றையும் உணவில் அவசியம் சேர்க்க வேண்டும். இவற்றில் இருந்து வைட்டமின் ஏ கிடைக்கிறது.

    கொழுப்புச் சத்து அதிகம் உள்ள பால் தர வேண்டும். இது, நரம்பு வளர்ச்சிக்கு நல்லது. காலையில் ஒன்றேகால் கப் சாதம் மற்றும் மசித்த உருளைக்கிழங்கு தரலாம். காய்கறி சேர்த்து சமைத்த உப்புமா, சேமியாவும் தரலாம்.



    இடைப்பட்ட நேரங்களில் வேகவைத்த சுண்டல், கால் கப் பழச்சாறு மற்றும் கால் கப் பழக்கலவை தரலாம். மதிய உணவில் ஒரு முட்டை/மீன்/மட்டன் தரலாம். கீரையை நன்கு வேக வைத்து சாதத்துடன் பிசைந்து தரவும். வெண்ணெய், எண்ணெய் வகைகள் சேர்த்துக்கொள்ளலாம்.

    குழந்தைப் பருவத்தில் வளர்ச்சி என்பது வேகமாக இருக்கும். அதேநேரம் குழந்தைகளின் உடல் வளர்ச்சியும், மனவளர்ச்சியும் நன்றாக இருக்க நல்ல சத்தான சரிவிகித உணவு மிகவும் அவசியம். அது குழந்தைகளுக்கு அதிக பருமன், எடை சார்ந்த நோய்களையும் தடுக்கும்.

    குழந்தைகளுக்கு நார்ச்சத்து அதிகம் உள்ள முழுத் தானிய பிரெட் போன்றவற்றைக் குழந்தைகளுக்குக் கொடுங்கள். எண்ணெயில் பொரித்த உணவுகளைவிட சுட்ட, வறுத்த, ஆவியில் வேகவைத்த உணவுகளைக் கொடுப்பது, குழந்தைகளை ஆரோக்கியமாக வைத்திருக்கும்.
    ஃபாஸ்ட் புட் உணவுகளைக் கூடிய மட்டும் தவிர்த்துவிடுங்கள். கடைகளில் விற்கப்படும், இனிப்பு சேர்த்த பழச்சாறுகள், சோடாக்களைக் கொடுக்கவே கூடாது.

    இரும்புச் சத்து நிறைந்த உணவுகள் (முருங்கைக் கீரை, பேரீச்சை, வெல்லம்) போன்றவற்றை உணவில் அதிகம் சேருங்கள்.

    நிறைய கலர்ஃபுல்லான காய்கறிகள், பழங்கள் என்று சாப்பிடும் ஆசையைத் தூண்டிவிடலாம்.

    சாண்ட்விச், முந்திரி, பாதாம், உலர்ந்த திராட்சை, வேகவைத்த வேர்க்கடலை போன்ற கால்சியம், புரோட்டீன் மற்றும் வைட்டமின்கள் நிறைந்த உணவுகளைச் சாப்பிடக் கொடுக்க வேண்டும்.


     அம்மைத் தடுப்பு ஊசி போட்ட இடத்தில் புண் ஆகாமல் இருக்க, வேப்பிலையுடன், பசு மஞ்சளை சேர்த்து அரைத்துத் தடவினால், விரைவில் தழும்பு ஆறிவிடும்.

     சுக்கு, சித்தரத்தை, ஜாதிக்காய், மாசிக்காய் இவற்றைப் பாலில் போட்டு வேகவிட்டு, நிழலில் உலர்த்தவும். பச்சிளம் குழந்தைக்குத் தலைக் குளிப்பாட்டும்போது பாலில் வேகவைத்த சாமான்கள், கட்டிப் பெருங்காயம், இவற்றை சந்தனக் கல்லில் ஒருமுறை இழைத்து தாய்ப்பால் சேர்த்துப் புகட்டலாம். சுக்கு, பெருங்காயம் வாயுவைக் கலைக்கும். சித்தரத்தை சளி வராமல் தடுக்கும். ஜாதிக்காய் நல்ல தூக்கத்தைக் கொடுக்கும். மாசிக்காய் வயிறு பிரச்னை இல்லாமல் செய்யும்.

    சளி
     குழந்தை பிறந்து ஐந்தாவது நாள் வெற்றிலைச் சாறு, தாய்ப்பால், ஒரு கடுகு அளவு கோரோஜின் கலந்து புகட்டினால், சளி வெளியேறிவிடும்.

     கற்பூர வல்லி இலையுடன் சிறிது தண்ணீர் சேர்த்து நன்றாகக் கொதிக்க வைத்து வடிகட்டி, சர்க்கரை சேர்த்துக் கொடுத்தால், சளி கரையும்.

     ஆறு மாதம் முடிந்த குழந்தைகளுக்கு நொச்சி இலை, நுணா இலை, ஆடாதோடா இலை இந்த மூன்றையும் தண்ணீரில் போட்டுக் கொதிக்கவைத்து வடிகட்டி சர்க்கரை சேர்த்துக் கொடுத்தால், சளி கரையும்.

     கண்டங்கத்திரி இலையை நீரில் சேர்த்துக் கொதிக்கவைத்து, வடிகட்டி சர்க்கரை சேர்த்துக் கொடுக்கலாம். தூதுவளை இலையை நீர் விட்டுக் கொதிக்கவைத்து, தேன் கலந்து வடிகட்டிக் கொடுத்தால், சளி கரையும்.

    வயிறு
     பிறந்து மூன்று நாட்களே ஆன குழந்தைக்கு, ஒரு சொட்டு விளக்கெண்ணெயில் சிறிது தாய்ப்பால் சேர்த்து நன்றாகக் குழைத்து, குழந்தையின் நாக்கில் தடவுங்கள். குழந்தையின் வயிற்றில் தங்கியிருக்கும் கறுப்பு மலம் வெளியேறிவிடும்.

     ஏழாம் நாள் தாய்ப்பாலுடன் ஒரு சொட்டு துளசிச்சாறு கலந்து புகட்டினால், சளி கரையும்.

     கொய்யா இலையுடன் தண்ணீர் சேர்த்து நன்றாகக் கொதிக்கவைத்து வடிகட்டி சிறிது உப்பு சேர்த்துக் கொடுத்தால், பேதி நின்றுவிடும்.

     வயிற்றுவலியால் அழும் குழந்தைக்கு நாமக் கட்டியை இழைத்து, தொப்புளில் தடவலாம்.

     வசம்பை உப்புத் தண்ணீரில் நனைத்து, நல்லெண்ணெய் ஏற்றிய விளக்கில் சுட்டு வைத்துக்கொள்ளவும். குழந்தை வயிற்று வலியால் அழும்போது, சந்தனக் கல்லில் ஒரு இழை இழைத்துத் தாய்ப்பால் கலந்து ஒரு பாலாடை புகட்டலாம். சுட்ட வசம்பின் சாம்பலை ஒரு வெற்றிலையில் சிறிது தேன் கலந்து, குழைத்து குழந்தையின் நாக்கில் தடவினாலும் வயிற்று வலி சரியாகும்.

     குழந்தைக்கு வயிறு மந்தமாக இருந்தால், வெற்றிலை, ஓமம், பூண்டு, உப்புக்கல் சேர்த்து அரைத்து வடிகட்டி, சிறிது சர்க்கரை சேர்த்துப் புகட்டினா,ல் வயிறு மந்தம் சரியாகிவிடும்.

     வயிற்றில் பூச்சி இருந்து குழந்தை அழுதால், வேப்பங்கொழுந்து, ஓமம், உப்பு சேர்த்து சுடுநீர் விட்டு அரைத்து, வடிகட்டிக் கொடுத்தால், வயிற்றில் பூச்சி இருக்காது.

    செல்லக்குழந்தையிடம் நீங்கள் காட்டும் அக்கறையான கவனிப்பே... ஆரோக்கியம் காத்திடும். வாழ்த்துகள்!


    தகவல்: குழந்தைகள் மனநல மருத்துவர் சாந்தி நம்பி, குழந்தைகள் மருத்துவர் ஸ்ரீனிவாசன், சித்த மருத்துவர் கண்ணன், தலைமை ஊட்டச்சத்து ஆலோசகர் கிருஷ்ணமூர்த்தி


    Last edited by chan; 30th Mar 2016 at 12:30 PM.
    jv_66 likes this.

  10. #10
    ahilanlaks's Avatar
    ahilanlaks is offline Ruler's of Penmai
    Real Name
    Athilakshmi Ahilan ( Bhuvana )
    Gender
    Female
    Join Date
    Mar 2015
    Location
    Chennai
    Posts
    12,408

    Re: குட்டிப் பாப்பாவை எப்படிப் பார்த்துக்Ĩ

    Very nice share


loading...

Bookmarks

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  
Like It?
Share It!







Follow Penmai on Twitter