Today's Sports info

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
டிவைன் பிராவோவின் பிரமிப்பூட்டும் சாகச அதிரடி: தோல்வியின் விளிம்பிலிருந்த சென்னை சூப்பர் கிங்ஸ் அபார வெற்றி


மும்பை வான்கடே மைதானத்தில் நடைபெற்ற ஐபிஎல் 2018-ன் முதல் போட்டியில் டிவைன் பிராவோவின் தனிமனித பிரமிப்பூட்டும் சாகச அதிரடியில் 169/9 என்று 1 விக்கெட் வித்தியாசத்தில் மும்பையை வீழ்த்தி சென்னை சூப்பர் கிங்ஸ் நம்ப முடியாத வெற்றியை ஈட்டியுள்ளது.


பிராவோவின் நம்ப முடியாத திகைப்பூட்டும் அதிரடி!


முதலில் பேட் செய்த மும்பை இந்தியன்ஸும் தொடக்கச் சரிவிலிருந்து மீண்டு இஷான் கிஷன், சூரியகுமார் யாதவ், குருணால் பாண்டியா அதிரடியில் 165/4 என்று ஒரு நல்ல ஸ்கோரை எட்ட, தொடர்ந்து ஆடிய சென்னை சூப்பர் கிங்ஸ் அணி 17 வது ஓவர் முடிவில் 119/8 என்று தோல்வியின் விளிம்பில் நம்பிக்கையற்ற நிலையில் இருந்தது. அப்போது சென்னை சூப்பர் கிங்ஸ் அணிக்கு இருந்த ஒரே நம்பிக்கை 19 பந்துகளில் 29 ரன்களுடன் ஆடி வந்த டிவைன் பிராவோதான்.


18 பந்துகளில் 47 ரன்கள் தேவை, வெற்றிக்குத் தேவைப்படும் ரன் விகிதம் 15.66. அப்போதுதான் ரோஹித் சர்மா, முஸ்தபிசுரிடம் கொடுக்காமல் ரன்களை தொடக்கத்திலிருந்தே கொடுத்து வந்த மெக்லினாகனிடம் கொடுக்க, ரோஹித் சர்மா, மும்பை ரசிகர்களின் நகங்கள் காலியாகும் அதிரடி ஆரம்பமானது.


அந்த ஓவரின் முதல் பந்தை இம்ரான் தாஹிர் எதிர்கொள்ள 1 ரன் எடுத்துக் கொடுத்தார். ஸ்ட்ரைக் பிராவோவிடம் வந்தது.


முதல் பந்து மோசமான பந்து என்று கூற முடியாது தரையிலிருந்து பெயர்த்து பவுலர் தலைக்கு மேல் நேராக மிகப்பெரிய சிக்ஸ் அடித்தார் பிராவோ. அடுத்த பந்து பேடில் விழுந்தது, ஆனாலும் அடிப்பதற்கு போதிய இடமோ காலமோ இல்லாத நிலையிலும் ஒரே தூக்குத் தூக்கினார் மிட்விக்கெட்டில் மீண்டுமொரு அதிர்ச்சி சிக்ஸ். அடுத்த பந்து லாங் ஆனில் தட்டிவிட்டு 2 வேக ரன்களை எடுத்தார். அடுத்த பந்தை மேலேறி வந்து மிட்விக்கெட்டில் ஒரே இழுப்பு இழுக்க பவுண்டரிக்குப் பறந்தது. 18வது ஓவரின் கடைசி பந்தை சிங்கிளுக்குத் தட்டி விட்டு 19வது ஓவரில் பேட்டிங்குக்கு வந்தார் பிராவோ. மெக்லினாகன் ஓவரில் 20 ரன்கள்!


19வது ஓவரை டெத் ஓவர் ஸ்பெஷலிஸ்ட் பும்ரா வீச முதல் பந்து யார்க்கர் மிஸ் ஆக சற்றே ஒதுங்கிக் கொண்டு லாங் ஆஃப் மேல் மிகப்பிரமாதமான ஒரு சிக்சரை அடித்தார் பிராவோ, அடுத்த பந்தும் யார்க்கர் மிஸ் ஆகி புல்டாஸ் ஆக மிட்விக்கெட் மேல் மிகப்பெரிய சிக்ஸர். அடுத்த பந்து சிங்கிளாக இருந்திருந்தால் இம்ரான் தாஹிர் ஸ்ட்ரைக்குக்கு வந்திருப்பார், ஆனால் ஓவர் த்ரோவில் 2வது ரன் வந்தது. அடுத்ததாக பும்ராவின் ஸ்லோ யார்க்கர் சரியாக விழ மட்டையை பிராவோ கீழே இறக்க பந்து ஸ்டம்பில் பட்டது, ஆனால் பைல்கள் விழவில்லை, மும்பையின் துரதிர்ஷ்டம், சென்னையின் அதிர்ஷ்டம். அடுத்த பந்து தாழ்வான புல்டாஸாக அமைய மிட்விக்கெட்டில் மீண்டும் பந்து சிக்சருக்குப் பறந்தது. அடுத்த பந்து ரவுண்ட் த விக்கெட்டில் பும்ரா வீச ஷார்ட்டாக வைடாக வீசினார் பிராவோ அடிக்க ரோஹித்திடம் கேட்ச் ஆனது. அப்போது இந்த ஷாட்டை அடித்திருக்க வேண்டிய தேவையில்லை ஏனெனில் 7 பந்துகளில் 7 ரன்கள்தான் தேவைப்பட்டது.


பிராவோ 30 பந்துகளில் 3 பவுண்டரிகள் 7 சிக்சர்களுடன் 68 ரன்கள் எடுத்து ஆட்டமிழந்தார்.


கடைசி ஓவர் முஸ்தபிசுர் ரஹ்மான் வீச வந்தார். 13வது ஓவரில் இடது காலில் காயம் ஏற்பட்டு பெவிலியன் சென்ற கேதார் ஜாதவ் மீண்டும் களமிறங்கினார். 7 ரன்கள் தேவை என்ற நிலையில் முஸ்தபிசுர் வீசிய முதல் 3 பந்துகளில் ரன்கள் வரவில்லை, மும்பைக்கு நம்பிக்கை பிறந்தது. அப்போதுதான் ஒரு ஏ.பி.டிவில்லியர்ஸ் ஷாட் ஒன்று ஜாதவ்வுக்குக் கைகொடுத்தது, முஸ்தபிசுர் வீச லேசாக ஆஃப் திசையில் நகர்ந்து மண்டியிட்டு மட்டையை பந்திற்கு கொடுத்து பைன் லெக் மேல் ஒரு தூக்குத் தூக்கினார் அது சிக்ஸ் ஆனது ஆச்சரியம்தான்.


2 பந்து 1 ரன் எடுத்தால் வெற்றி. ரோஹித் சர்மா அனைவரையும் முன்னால் கொண்டு வந்தார், ஆனால் ஜாதவ் கவர் திசையில் அருமையான பவுண்டரி அடிக்க சென்னை சூப்பர் கிங்ஸ் மீண்டும் ஐபிஎல்-க்கு வந்து முதல் போட்டியிலேயே, அதுவும் தோல்வியின் வாயிலிருந்து ஆட்டத்தைப் பிராவோ பிடுங்கி வர அபாரமான வெற்றி பெற்றது.


இளம் லெக் ஸ்பின்னர் மார்க்கண்டே, ஹர்திக் பாண்டியா அபாரம்!


முன்னதாக சென்னை சூப்பர் கிங்ஸ் அணி மோசமான ஷாட் தேர்வு, அடிப்பதற்கு சரியான பவுலர்களை தேர்வு செய்யாதது என்று ஏகப்பட்ட தவறுகளைச் செய்து விக்கெட்டுகளை மடமடவென இழந்தது.


தொடக்கத்தில் ஷேன் வாட்சன் (16), அம்பாட்டி ராயுடு (22) ஆகியோர் 22 பந்துகளில் 27 ரன்கள் என்ற நம்பிக்கைத் தொடக்கத்தைக் கொடுத்தனர். அப்போது ஹர்திக் பாண்டியாவிடம் வாட்சன் வீழ்ந்தார், மெதுவான் விரல் பந்து அது வாட்சன் கணிக்கவில்லை லாங் ஆனில் கேட்ச் ஆனார். ரெய்னா 4 ரன்களில் மீண்டும் ஷார்ட் பிட்ச் பந்துக்கு பலியானார்.


ஹர்திக் பாண்டியா மிடில் ஸ்டம்பில் ஷார்ட் ஆக வீச ஒதுங்கிக் கொண்டு புல்ஷாட் ஆடிய ரெய்னா மிட் ஆனில் குருணால் பாண்டியாவிடம் ஆட்டமிழந்தார்.


அடுத்ததாக இளம் லெக்ஸ்பின்னர் மார்க்கண்டே, 4 பவுண்டரிகளுடன் 22 ரன்கள் எடுத்து ஆடிவந்த ராயுடுவை வீழ்த்தினார், ராயுடு தேவையில்லாமல் ஒரு ஸ்வீப் ஷாட்டை ஆட கூக்ளியில் எல்.பி.ஆனார்.


அடுத்த அதிர்ச்சி கேப்டன் தோனி, இவர் 5 ரன்களில் மார்க்கண்டேயின் கூக்ளியில் பின்னால் சென்று கால்காப்பில் வாங்கி எல்.பி.ஆனார். களநடுவர் அதை எப்படி நாட் அவுட் என்று கூறினார் எனத்தெரியவில்லை, தோனிக்கு அவுட் கொடுக்க பயந்திருப்பார். ஆனால் ரிவியூவில் தோனி நடையைக் கட்ட வேண்டியதாயிற்று.


ஜடேஜாவுக்கு இந்த ஆட்டம் மோசமாக அமைந்தது, பவுலிங்கில் ஒரே ஓவர் 9 ரன்கள் பேட்டிங்கில் 12 ரன்களில் முஸ்தபிசுர் கட்டரை மிக மோசமாக ஆடி வெளியேறினார். 5/75 என்று ஆனது சென்னை சூப்பர் கிங்ஸ்.


கேதார் ஜாதவ்வுடன் பிராவோ இணைந்தார். ஜாதவ் பவுண்டரி வறண்டு போனபோது மார்க்கன்டேயை இறங்கி வந்து ஒரு சிக்ஸ் தூக்கினார். பிராவோ இறங்கி மார்க்கண்டேயை நேராக மிக அழகாக ஒரு சிக்ஸ் விளாசினார். தீபக் சாஹர் தேவையில்லாமல் மார்க்கண்டே பந்தை மேலேறி வந்து அடிக்கப்போய் ஸ்டம்ப்டு ஆனார். 13வது ஓவரில் கேதார் ஜாதவ் இடது தொடை சதைப்பிடிப்பினால் பெவிலியன் திரும்ப சென்னை சூப்பர் கிங்ஸ் நம்பிக்கை அற்றுப் போனது. ஹர்பஜன் சிங் இறங்கி பந்தை நன்றாக டைமிங் செய்தார், ஒரு பவுண்டரி அடித்தார். அதுவும் மிஸ்பீல்ட். ஹர்பஜன் சிங்கும் 8 ரன்களில் மெக்லினாகன் பந்தை தேர்ட்மேனில் கேட்ச் கொடுத்து வெளியேறினார்.


மார்க் உட் 1 ரன்னில் ஹர்திக் பாண்டியாவின் 3வது விக்கெட் ஆனார். அப்போதுதான் 17 ஓவர்கள் முடிவில் 119/8. பிராவோ மட்டும் 29 ரன்களில் கிரீசில் இருந்தார், அதன் பிறகுதான் மெக்லினாகன், பும்ரா என்று விளாசித்தள்ளி வெற்றிக்கு அருகில் கொண்டு விட்டு அவுட் ஆனார். பிறகு மீண்டும் இறங்கிய கேதார் ஜாதவ் மிக அருமையான பைன்லெக் சிக்ஸ், கவர் பவுண்டரி மூலம் வெற்றியை உறுதி செய்தார்.


ஆட்ட நாயகன் பிராவோ. மும்பை இந்தியன்ஸ் அணியின் தோல்விக்குக் காரணமான மெக்லினாகன் 4 ஓவர்கள் 44 ரன்கள், பும்ரா 4 ஓவர்கள் 37 ரன்கள், முதல் 2 ஓவர்களில் 8 ரன்கள்தான். பாண்டியா 24 ரன்களுக்கு 3 விக்கெட்டுகளையும், மார்க்கண்டே 23 ரன்களுக்கு 3 விக்கெட்டுகளையும் கைப்பற்றினர். சென்னை சூப்பர் கிங்ஸுக்கு நம்ப முடியாத வெற்றி.


2018 ஐபிஎல் கிரிக்கெட்டுக்கு ஒரு அபாரத் தொடக்கம் இந்த முதல் போட்டி.


:typing:


தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
சாதித்தது தோனி படை: சன் ரைசர்ஸை நொறுக்கிய வாட்சனின் சதம்; 3வது முறையாக ஐபிஎல் சாம்பியன் சிஎஸ்கே

வயதான வீரர்களைக் கொண்ட அணி என்று பலராலும் கேலி செய்யப்பட்ட சென்னை சூப்பர் கிங்ஸ் கடைசியில் தோனி உறுதியாக நம்பிய அனுபவத்தினால்தான் வெற்றியைச் சாதித்தது. ஏனெனில் புவனேஷ்வர் குமார், சந்தீப் சர்மா வீசிய தொடக்க ஓவர்களில் எந்த இளம் வீரர்களும் விக்கெட்டைப் பறிகொடுத்திருப்பார்கள், முதல் 10 பந்தில் 0-வில் இருந்த வாட்சன் 11வது பந்தை அடித்த பவுண்டரியிலிருந்து திரும்பிப் பார்க்கவேயில்லை. வாட்சனின் சரவெடிக்கு சன்ரைசர்ஸின் சித்தார்த் கவுலின் மோசமான பந்து வீச்சு உதவியது. பிறகு சந்தீப் சர்மா தன் 4வது ஓவரை படுமோசமாக வீச 27 ரன்கள் விளாசினார் வாட்சன். பிராத்வெய்ட் ரெய்னாவை ஷார்ட் பிட்ச் பவுன்சரில் வீழ்த்திய அதே ஓவரில் 1 பவுண்டரி, ஒரு சிக்சரை விளாசினார் வாட்சன். இந்த ஓவரை கொஞ்சம் டைட் செய்திருந்தால் கூட கொஞ்சம் நெருக்கடியாக அமைந்திருக்கும், ஆனால் வாட்சன் இருந்த மூடிற்கு ஒன்றும் செய்ய முடியவில்லை. ஆனால் இந்த ரணகள அதிரடியிலும் ரஷீத் கானை ஒன்றும் அசைக்கக் கூட முடியவில்லை. அவர் 3 ஓவர்களில் 13 ரன்களை மட்டுமே விட்டுக் கொடுத்தார், 4வது ஓவரில் 2 பவுண்டரிகளுடன் 4 ஓவர்களில் 25 என்று முடிந்தார். அவருக்கு இது சிறந்த ஐபிஎல் தொடராக அமைந்தது. அதாவது திட்டம் என்னவெனில் ரஷீத் கான் ஓவர்களை எச்சரிக்கையுடன் ஆடி கடந்து செல்வதாகும்.

முதல் ஓவரே புவனேஷ்வர்குமார் அதி அற்புதமாக ஸ்விங் செய்து மெய்டன் ஓவரை வீசினார். 2வது ஓவரில் சந்தீப் சர்மா சிறப்பாக வீசி டுபிளெசிஸின் ஒரு பவுண்டரியுடன் முடித்தார். புவனேஷ்வர் குமார் மீண்டும் ஒரு ஓவரை டைட்டாக வீசி 2 ஓவர்களில் 1 மெய்டன் 5 ரன்கள் என்று நெருக்கடி கொடுக்க வாட்சன் 10 பந்துகளில் 0. தன் 11வது பந்தில் சந்தீப் சர்மாவை பவுலருக்குப் பின்னால் பவுண்டரி அடித்தவர் நிற்கவில்லை, நிறுத்த முடியவில்லை. இதே ஓவரில் டுபிளெசிஸ் சந்தீப்பின் வேகம் குறைக்கப்பட்ட விரலிடுக்கு பந்தில் நேராக பவுலர் தலைக்கு மேல் கொடியேற்ற சந்தீப் சர்மாவே அதனைப் பிடித்தார். குமார் தன் முதல் ஸ்பெல்லில் 3 ஓவர்கள் 9 ரன்கள்தான்!! பவர் பிளே முடிய இருந்த 6வது ஓவரில் ஷேன் வாட்சன் ஆரம்பித்தார். சந்தீப் சர்மாவை டி20 ஸ்டைல் ஷாட்டில் மிட்விக்கெட்டில் ஒரு சிக்ஸ். பிறகு மிட் ஆஃபில் ஒரு பவுண்டரி. இவையெல்லாம் நல்ல பந்துகள் அல்ல என்பது வேறு விஷயம். பவர் பிளே முடிவில் 35/1.

7வது ஓவரில் சித்தார்த் கவுல் சென்னைக்கு திருப்பு முனையை ஏற்படுத்தினார். முதல் பந்தே வாட்சனுக்கு வாகாக அவர் கால்காப்பில் வீச அங்கு போட்டபோதெல்லாம் வாட்சன் தன் வாழ்நாள் முழுக்க ஆன் திசையில் சிக்ஸ் அடித்துள்ளார், இந்தப் பந்தும் அதற்கு விதிவிலக்கல்ல. இதே ஓவரில் ரெய்னாவுக்கு இந்தத் தொடர் முழுதும் பவுலர்கள் சில இலவச பவுண்டரிகளை வழங்கியது போல் கவுல் மீண்டும் ஒரு லெக் திசை ஷார்ட் பிட்ச் அசிங்கமான பந்தை வீச பவுண்டரி ஆனது. மீண்டும் லெக் திசையில் ரெய்னா பவுண்டரி அடிக்க ஒரு ஓவரில் 16 ரன்கள். ரஷீத் கான் தன் முதல் ஓவரை டைட்டாக வீச எச்சரிக்கையுடன் 5 ரன்கள்தான் எடுக்கப்பட்டது. ஆனால் கவுல் ஓவரை கட் செய்திருக்க வேண்டிய வில்லியம்சன் மீண்டும் அவரிடமே கொடுக்க மீண்டும் இரண்டு விரலிடுக்கு மெதுவான பந்துகளில் ஒன்று சிக்ஸ், ஒன்று பவுண்டரி. 16 ரன்கள்! கவுல் 2 ஓவர்களில் 32 ரன்கள். ஷாகிப் அல் ஹசன் சற்று தாமதமாகக் கொண்டு வரப்பட மோசமான லெக் திசை பந்து மிட்விக்கெட்டில் வாட்சன் மட்டையிலிருந்து சிக்ஸ் ஆக 33 பந்துகளில் 51 என்று வந்தார் வாட்சன். இதே ஓவரில் ரெய்னாவுக்கும் ஒரு இலவசப் பந்து சிக்ஸ் ஆனது. ஷாகிப் ஒரு ஓவர் 15 ரன்கள்.

12 ஓவர்களில் 104/1 என்று இருந்த போது சந்தீப் சர்மா 13வது ஓவரை வீசினார், ஷேன் வாட்சன் மைதானம் நெடுக பந்தை சிதறடித்தார், புல்டாஸ்கள், வேகம் குறைந்த விரலிடுக்குப் பந்துகள், ஆஃப் வாலி என்று சொதப்பலாக வீச 4,6,6,6, வைடு, 4, என்று 27 ரன்கள் விளாசப்பட்டது.

ரெய்னா ஒரு முனையில் உறுதுணை இன்னிங்சை ஆடி 24 பந்துகளில் 3 பவுண்டரி 1 சிக்சருடன் 32 எடுத்து பிராத்வெய்ட்டின் ஷார்ட் பிட்ச் பவுன்சரில் விக்கெட் கீப்பரின் அபாரமான கேட்சுக்கு வெளியேறினார். இதை முதலிலேயே செய்திருக்கலாம். அதே ஓவரில் வாட்சனிடம் பிராத்வெய்ட் சிக்க ஒரு பவுண்டரி ஒரு சிக்சருடன் 97 ரன்கள் வந்தார் வாட்சன். பிறகு ரஷீத் கான் பந்தை சிங்கிள் தட்டி 51வது பந்தில் சதம் கண்டார் வாட்சன். சதம் கண்டதைக் கொண்டாட ரஷீத் கானையே 2 பவுண்டரிகள் விளாசினார். மீண்டும் கவுல் வந்தார், கவுல் மீது இவருக்கு என்ன கோபம் என்று தெரியவில்லை மீண்டும் 2 பவுண்டரிகளை விளாசினார். கடைசியில் 19வது ஓவரின் 3வது பந்தை பவுண்டரி அடித்தார் ராய்டு. சென்னை சூப்பர் கிங்ஸ் 2018 ஐபிஎல் சாம்பியன்கள்!!. புவனேஷ்வர் குமார் 4 ஓவர்கள் 17 ரன்கள் சந்தீப் சர்மா 4 ஓவர்கள் 52 ரன்கள். கவுல் 3ஓவர்களில் 43 ரன்கள். பிராத்வெய்ட் 2.3 ஓவர்களில் 27 ரன்கள், ஆக இவர்கள் மூவரும் சேர்ந்து 9.3 ஓவர்களில் 122 ரன்களை கொடுத்தாகிவிட்டது. எப்படி வெற்றி சாத்தியமாகும், ஷாகிப் அல் ஹசன் 1 ஓவர் 15 ரன்கள். தோனி இறங்க வேண்டிய தேவையில்லாமலேயே சிஎஸ்கே வெற்றி. தோனியின் வெற்றி சிக்சரைப் பார்க்க நினைத்திருந்த ரசிகர்களுக்கு ஒரு சந்தோஷ ஏமாற்றம்தான். ரெய்னா வாட்சன் இணைந்து 2வது விக்கெட்டுக்காக 9.3 ஓவர்களில் 117 ரன்களைச் சேர்த்து சன் ரைசர்ஸுக்குக் குழி தோண்டினர்.

சிஎஸ்கே பவுலிங் அபாரம்.. மட்டுப்பட்ட சன் ரைசர்ஸ்

சிஎஸ்கேயில் வழக்கம் போல் லுங்கி இங்கிடி, தீபக் சாஹர் மிக அருமையாகத் தொடங்கினர். ஹர்பஜனுக்குப் பதிலாக தோனி, கரன் சர்மாவை எடுத்தது உடனடியாகப் பலன் கொடுத்தது, கோஸ்வாமி இல்லாத 2வது ரன்னை எடுக்கப் போக ஸ்கொயர் லெக்கில் ஓடி வந்து கரண் சர்மா பந்தை தோனியிடம் அடிக்க ரன் அவுட் ஆனார். கரண் சர்மா வேகமான கால்கள் உடையவர். தோனி அவரை எடுத்தது இன்னொரு விதத்திலும் முக்கியத்துவமானது. 3 ஓவர்கள் வீசி 25 ரன்களில் கேன் வில்லியம்சன் 47 ரன்களில் அபாயகரமாக திகழ்ந்த போது ஒரு பந்தை வெளியே வீசி இறங்கி வந்தவரை பீட் செய்ய தோனி ஸ்டம்பிங்கை முடித்தார், இது திருப்பு முனை விக்கெட், இன்னொரு முறை தோனியின் அணி மாற்றம் மிக அற்புதமாக வேலை செய்தது.

கோஸ்வாமி அவுட் ஆன பிறகு வில்லியம்சன் தவண் இணைந்து ஸ்கோரை 6 ஓவர்களில் 42/1 என்று கொண்டு வந்தனர்.

25 ரன்கள் எடுத்த தவண் ஜடேஜாவின் முதல் ஓவரில் பவுல்டு ஆகி வெளியேறினார். ஆனால் ஜடேஜாவின் 2வது ஓவர் 2 பவுண்டரிகளோ 1 சிக்சருடன் ஷாகிப், வில்லியம்சன் கையில் சாத்துமுறையாக 17 ரன்கள் வந்தது. சாஹர் தன் அருமையான ஸ்பெல்லை 4 ஓவர்கள் 25 என்று முடித்திருந்தார். பிராவோ 22 ரன்களை 2 ஓவர்களில் விட்டுக் கொடுத்தார்.

36 பந்துகளில் 5 பவுண்டரிகள் 2 சிக்சர்களுடன் 47 எடுத்த வில்லியம்சன் கரண் சர்மாவிடம் ஸ்டம்ப்டு ஆக, யூசுப் பத்தான் இறங்கினார். யூசுப் பத்தான் சில அடிகளைச் சாத்த 12 பந்துகளில் 21 என்றும் ஷாகிப் 13 பந்துகளில் 22 என்றும் 15வது ஓவரில் சன் ரைசர்ஸ் ஸ்கோர் 126/3 என்று இருந்தது. பிராவோவிடம் ஷாகிப் அல் ஹசன் 23 ரன்களில் வெளியேறினார். புல்டாஸை நேராக எப்படி கவரில் ஜடேஜாவிடம் அடித்தார் என்று புரியவில்லை.

யூசுப் பத்தான் 25 பந்துகளில் 45 ரன்கள் என்று நல்ல இன்னிங்சை ஆட, ரஷீத் கானை இறக்கி அவரது பார்மை பயன்படுத்திக் கொள்ளாத வில்லியம்சன் பிராத்வெய்ட்டை இறக்கினார், அவர் 11 பந்துகளில் 3 சிக்சர்களுடன் 21 ரன்கள் எடுத்தாலும் 5 பந்துகளை அவர் டாட்பால்களாக விட்டார். ரன்கள் எடுத்த 6 பந்துகலில் 3 சிக்சர்கள் மற்றும் 3 ரன்கள்தான். இந்த டாட்பால்களை விடாமல் 2-3 பவுண்டரிகளை அவர் அடித்திருந்தல் ஒருவேளை 190க்கும் மேல் ஸ்கோர் சென்றிருக்க வாய்ப்பிருந்தது. ஆனால் லுங்கி இங்கிடி, தாக்கூர் அருமையாக வீசினர். இங்கிடி 4 ஓவர்களில் 26 ரன்கள் ஒரு விக்கெட். 178 ரன்களுக்கு மடிந்தது ஹைதராபாத். ஆனாலும் இந்தப் பிட்சில் இது வெற்றிக்கான ஸ்கோர்தான். வாட்சன் முதல் 10 பந்துகளுக்குப் பிறகு பொங்கி எழுவார் என்று யாருக்குத் தெரியும்.

தோனிக்கு இந்தத் தொடரின் சிறந்த திடீர் முடிவுகளை, புத்தம் புதிய முடிவுகளை எடுத்த சிறந்த சிந்தனைக்கான பரிசு கிடைத்தது.


z-csk.jpg

Tamil Hindu
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
தேதி 27, என் ஜெர்சி எண் 7, எங்களின் 7வது ஐபிஎல் இறுதி: வெற்றிக்குப் பிறகு தோனி குதூகலம்

குறுகிய வடிவ கிரிக்கெட்டின் சிறந்த கேப்டனான தோனியின் தலைமையில் சென்னை சூப்பர் கிங்ஸ் நேற்று இன்னொரு ஐபிஎல் மகுடத்தைச் சூடியது. சன் ரைசர்ஸ் அணியை சற்றும் எதிர்பாராதவிதமாக 8 விக்கெட்டுகள் வித்தியாசத்தில் நொறுக்கியது சிஎஸ்கே.

வாட்சன் ஆட்டத்தை ‘நோ-கான்டெஸ்ட்’ என்பார்களே அப்படிக் கொண்டு சென்றார். ரஷீத் கான் பவுலிங்குக்கு மரியாதை கொடுப்போம் என்ற முடிவு சென்னை சூப்பர் கிங்ஸுக்கு கை கொடுத்தது.

இந்நிலையில் ஆட்டம் முடிந்து தோனி கூறியதாவது:

இறுதிப் போட்டிக்கு நுழைகிறோம் எனும்போதே அனைவரும் தங்கள் பங்கு என்னவென்பதை தெரிந்து வைத்திருந்தனர். பீல்டிங்கைத் தேர்வு செய்யும் போது நம் திட்டங்களில் சிறு அட்ஜெஸ்ட்மெண்ட்களை செய்து கொள்ள வேண்டும். இதுதவிர எங்கள் பேட்ஸ்மென்களுக்கு அவர்கள் ஸ்டைல் தெரியும்.

களத்தில் பேட் செய்பவர்கள் கடினமாக உணர்ந்தால் புதிதாக வரும் பேட்ஸ்மெனுக்கும் கடினமாக இருக்கும் என்பது தெரியும்தானே.

ரஷீத் கான் எப்படி சாதுரியமாக வீசுவாரோ, அதேபோல்தான் புவனேஷ்வர் குமாரும் பேட்ஸ்மெனை ஏமாற்றும் ஒரு பவுலர் எனவே ஒரு பவுலர் மட்டும்தான் எங்களுக்கு நெருக்கடி கொடுப்பார் என்பதல்ல. இது ஒரு நல்ல பேட்டிங் ஆகும். மிடில் ஓவர்களில் அடித்து நொறுக்க முடியும் என்பது எங்களிடம் உள்ள நம்பிக்கையாகும்.

பிராவோவை முன்னால் இறக்கும் திட்டம் எதுவும் இல்லை. ராயுடு எங்கள் முக்கிய பேட்ஸ்மேன். எனவே நடு ஓவர்களில் அடிக்க ஆளிருந்தது. அனைத்து வெற்றிகளுமே சிறப்பு வாய்ந்ததுதான், இதில் எது சிறந்தது, பிடித்தது என்று தேர்வு செய்வது கடினம்.

நிறைய பேர் எண்கள், புள்ளிவிவரங்களைப் பேசிக்கொண்டிருக்கிறார்கள் இன்றைய தேதி 27, என் ஜெர்சி எண் 7, இது எங்களுடைய 7வது பைனல். வயது பற்றி நிறைய பேசியாகிவிட்டது, ஆனால் உடல்தகுதிதான் முக்கியம். ராயுடுவுக்கு 33 வயது என்பது ஒரு பிரச்சினையல்ல. எந்த கேப்டன்களை நீங்கள் கேட்டாலும் களத்தில் நன்றாக நகர்ந்து இயங்கும் பீல்டர்களையே விரும்புவார்கள். இதற்கு வயது ஒரு தடையல்ல 19-20 வயதாக இருந்தாலும் 30 வயதாக இருந்தாலும்.

ஆனாலும் எங்களுடைய பலவீனங்கள் எங்களுக்கு நன்றாகவே தெரியும், வாட்சன் டைவ் அடித்தால் காயமடைவார், அதனால் அவர் அதைச் செய்ய வேண்டாம் என்றே விரும்புவோம். இவையெல்லாம் எங்களுக்குத் தெரிந்ததுதான், வயது என்பது ஒரு எண் மட்டுமே. ஆனால் உடற்தகுதியில் ஃபிட் ஆக இருக்க வேண்டும். இப்போதைக்கு எந்த ஒரு திட்டமும் இல்லை. சென்னைக்குச் செல்கிறோம். முடிவு என்னவாக இருந்திருந்தாலும் சென்னைக்குச் சென்று ரசிகர்களையும் அணிக்கு நெருக்கமானவர்களையும் சந்திக்க வேண்டும். விடுதி ஒன்றில் அனைவரும் ஒன்றிணைந்து மாலைப்பொழுதை மகிழ்ச்சியுடன் கழிக்கவிருக்கிறோம்.

இவ்வாறு கூறினார் தோனி.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
ஐபிஎல் 2018: வீரர்கள் பெற்ற பிற விருதுகள்

ஐபிஎல் 2018 சென்னை சூப்பர் கிங்ஸ் அணியின் மகாவெற்றியுடன் அபாரமாக முடிந்தது. தொடக்கப் போட்டியிலும் சென்னை சூப்பர் கிங்ஸ் வெற்றி பெற்றிருந்ததையடுத்து வெற்றியுடன் தொடங்கி வெற்றிக்கோப்பையுடன் முடித்தது சென்னை சூப்பர் கிங்ஸ்.

இதற்கு முக்கியக் காரணம் கேப்டன் தோனி, அவரது உறுதியும் அமைதியும் பெரிய அளவுக்கு வீரர்களுக்குப் பக்கபலமாக இருந்தது, அதன் உச்ச கட்டமாக வாட்சன் நேற்று வெளுத்துக் கட்டி சதம் எடுத்தார். ஆட்ட நாயகன் விருது வாட்சனுக்கு வழங்கப்பட்டது.

இந்த ஐபிஎல் கிரிக்கெட்டில் வேறு சில வீரர்களும் விருதுகளை வென்றுள்ளனர். அதன் விவரம் வருமாறு:

இந்த ஐபிஎல் தொடரின் சிறந்த மைதானம்: ஈடன் கார்டன்ஸ், கொல்கத்தா

7 போட்டிகளுக்கும் குறைவாக ஆடப்பட்டதில் சிறந்த ஐபிஎல் மைதானம்: மொஹாலி

சிறந்த வளரும் வீரர்: ரிஷப் பந்த், ரூ10.லட்சத்துக்கான காசோலையைப் பெற்றார்.

ஃபேர் பிளே விருது: மும்பை இந்தியன்ஸ்

சிறந்த கேட்ச்: விராட் கோலிக்கு ட்ரெண்ட் போல்ட் எடுத்த அந்த திகைக்க வைத்த கேட்ச்.

சிறந்த ஸ்ட்ரைக் ரேட்: சுனில் நரைன்

சீசனின் மிகச்சிறந்த ஸ்டைலிஷ் வீரர்: ரிஷப் பந்த்

புதியன புகுத்தும் யோசனைக்கான விருது: தோனி

அதிக விக்கெட்டுகளுக்கான பர்ப்பிள் கேப்: ஆண்ட்ரூ டை.

அதிக ரன்களுக்கான ஆரஞ்சு கேப்: கேன் வில்லியம்சன்.

சீசனின் மதிப்பு மிக்க வீரர்: சுனில் நரைன். (உண்மையில் இந்த விருதை ரஷீத் கானுக்குக் கொடுத்திருக்க வேண்டும்)

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
நெருக்கடித் தருணங்களை சிஎஸ்கே சிறப்பாகக் கையாண்டது: கேன் வில்லியம்சன் புகழாரம்

ஐபிஎல் 2018 கிரிக்கெட் எதிர்பார்த்தது போல் சென்னை சூப்பர் கிங்ஸ் அணி வென்று கோப்பையை தோனி தூக்குவதுடன் கோலாகலமாக நிறைவடைந்தது.

சென்னைக்கு அழுத்தமான கணங்கள் இல்லை என்று கூற முடியாது, 8 விக்கெட்டுகள் வித்தியாசத்தில் வென்றாலும் நெருக்கடி தருணங்கள் இருக்கவே செய்தன, ஆனால் அவற்றை அபாரமாக அந்த அணி கையாண்டு மீண்டது என்று சன் ரைசர்ஸ் கேப்டன் கேன் வில்லியம்சன் தெரிவித்தார்.

கேன் வில்லியம்சன் சிஎஸ்கேவைப் பாராட்டிக் கூறியதாவது:

இது இந்த ஆட்டத்தின் இயற்கை. சில வேளைகளில் எதிரணியினரின் நல்ல கிரிக்கெட்டை கைதட்டி வரவேற்க வேண்டியதுதான். சிஎஸ்கே பேட்டிங் அப்படிப்பட்ட ஒரு தருணமாகும்.

தனித்துவமான பேட்டிங், அவர்கள் வாய்ப்புகளையே வழங்கவில்லை. எங்கள் கைகளில் அடிப்பதை விட தூக்கி பவுண்டரிக்கு வெளியே அடித்தனர். 8 விக்கெட் வெற்றிதான், ஆனாலும் எங்களுக்கான வாய்ப்புகள் இருக்கவே செய்தன. அந்தத் தருணங்களில் ஆட்டத்தின் போக்கு விரைவில் மாறிவிடும்.

அந்தக் கணங்களைப் பற்றிக் கொள்ள வேண்டும். ஆனால் இத்தகைய தருணங்களை சிஎஸ்கே சிறப்பாகக் கையாண்டதால் வெற்றி பெற்றது, இதற்காக அந்த அணியைப் பாராட்டவே வேண்டும். நெருக்கடியைப் புறந்தள்ளி பேட்டிங்கில் நிரூப்பித்தனர்.

பிட்ச் 180 ரன்களை சிறப்பாக தடுத்து விடும் என்றே நினைத்தோம். முதல் 6 ஓவர்கள் அவர்களால் அடிக்க முடியவில்லை, ஆனால் பந்து கொஞ்சம் ஸ்விங் ஆவது நின்ற உடன் ஷேன் வாட்சன் புகுந்தார். அவரை நிறுத்த முடியவில்லை.

இந்தத் தொடர் முழுதுமே நடுவில் 2 விக்கெட்டுகள் எதிரணியினரை நிலைகுலையச் செய்யுமாறு ஆடினோம், ஆனால் இந்தப் போட்டியில் அது நடக்கவில்லை, அதனால்தான் ஷேன் வாட்சன் பேட்டிங் பாராட்டுக்குரியது, அனுபவத்தைக் காட்டிவிட்டது சென்னை சூப்பர் கிங்ஸ்.

இவ்வாறு கூறினார் கேன் வில்லியம்சன்.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
சிஎஸ்கேயின் வெற்றியை உறுதி செய்த அந்த 3 ஓவர்கள்: வில்லியம்சன் தவறு?

ஐபிஎல் 2018 இறுதிப் போட்டியில் ஷேன் வாட்சனின் அதிரடி சதத்துடன் சென்னை சூப்பர் கிங்ஸ் சாம்பியன்களானாலும் இடையில் 3 ஓவர்களை கேன் வில்லியம்சன் கொஞ்சம் சரியாகத் திட்டமிட்டிருக்கலாம் என்று தோன்றுகிறது.

வில்லியம்சனுக்கு பெரிய பின்னடைவு நேற்று சித்தார்த் கவுல், சந்தீப் சர்மா ஆகியோர் மோசமாக வீசியதே, மேலும் ஷாகிப் அல் ஹசனை சரியாகப் பயன்படுத்தவில்லை, வாட்சன் நன்றாக செட்டில் ஆகி பந்து கால்பந்து சைசுக்குத் தெரிய ஆரம்பித்த போது ஷாகிப் அல் ஹசனைக் கொண்டு வந்தார்.

சந்தீப் சர்மா, சித்தார்த் கவுல் ஆகிய வேகப்பந்து வீச்சாளர்கள் சன் ரைசர்ஸின் வெற்றிகளில் அபாரமாக வீசியவர்கள் ஆனால் நேற்று இருவரும் மோசமாக வீச, ஷேன் வாட்சனுக்கு அவருக்கு வாகான இடங்களில் வீசினர். இதனால் இருவரும் 7 ஓவர்களில் 95 ரன்கள் விளாசப்பட்டனர்.

7 ஓவர்களில் 95 ரன்களைக் கொடுக்கும் ஒரு சிறந்தப் பந்து வீச்சு அணி வெற்றி பெற வாய்ப்பேயில்லை, இலக்கு என்னவாக இருந்தாலும் இப்படி வீசுவது கொஞ்சம் தரநிலைக்குக் கீழான பந்து வீச்சுதான்.

ஆட்டத்தின் 11 ஓவர்கள் முடிந்த பிறகு சென்னை சூப்பர் கிங்ஸ் வெற்றிக்குத் தேவை 9 ஓவர்களில் 84 ரன்கள். அப்போது ரஷீத் கானுக்குத் தொடர்ந்து கொடுத்து நெருக்கடி கொடுத்து விக்கெட்டுகளைக் கைப்பற்ற முயற்சி செய்திருக்க வேண்டும், ஆனால் அவர் ரஷீத் கானை பந்து வீச்சிலிருந்து அகற்றி விட்டு பிராத்வெய்ட், சந்தீப் சர்மா ஆகியோருக்கு 3 ஓவர்களை நடுவில் கொடுத்தார். 12வது ஓவரில் பிராத்வெய்ட் 9 ரன்களைக் கொடுத்தார், 13வது ஓவரில் சந்தீப் சர்மா ஹாட்ரிக் சிக்சர்களுடன் 2 பவுண்டரிகள் என்று 27 ரன்களைக் கொடுத்தார். மீண்டும் பிராத்வெய்ட்டிடமே 14வது ஓவரைக் கொடுக்க ரெய்னா விக்கெட்டை அவர் வீழ்த்தினாலும் அதே ஓவரில் வாட்சனுக்கு வாகாக 2 பந்துகளை வீச ஒன்றுபவுண்டரி ஒன்று சிக்ஸர்.

இந்த ஓவரில் 14 ரன்கள் வந்தது, ஆகமொத்தம் 12-14 ஓவர்களில் 50 ரன்களை சன் ரைசர்ஸ் கொடுக்க சென்னை சூப்பர் கிங்ஸ் அணி வெற்றிக்கு வெகு அருகில் வந்தது. ரஷீத் கானுக்கு 2 ஓவர்கள் மீதமிருந்தும் சென்னை சூப்பர் கிங்ஸ் வெற்றிக்குத் தேவை பந்துக்கு ஒரு ரன் என்ற விகிதத்தில் மாறியது. டி20-யில் இந்த நிலைமையில் அதுவும் 8 விக்கெட்டுகள் மீதமிருக்கையில் எந்த அணியும் வெற்றி பெற முடியாது.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
சிஎஸ்கே சாம்பியன்: வாட்ஸனுக்கு “புதுப்பெயர்” சூட்டி புகழ்ந்த தோனி

11-வது ஐபிஎல் சாம்பியன் பட்டத்தை சென்னை சூப்பர் கிங்ஸ் வென்றுள்ள நிலையில், இறுதிஆட்டத்தில் பட்டையை கிளப்பிய ஷேன் வாட்ஸனுக்கு செல்லமாக “புதிய பெயர்” வைத்து கேப்டன் தோனி புகழாரம் சூட்டியுள்ளார்.

11-வது ஐபிஎல் சீசன் போட்டி கடந்த 50- நாட்களுக்கும் மேலாக நடந்தது. சூதாட்ட சர்ச்சை காரணமாக 2 ஆண்டுகள் தடைமுடிந்து, தோனி தலைமையிலான சென்னை சூப்பர் கிங்ஸ் இடம் பெற்று இருந்ததால், முன்னாள் சாம்பியனான சிஎஸ்கே இந்த முறை பட்டம் வெல்லும் என ரசிகர்கள் எதிர்பார்த்தனர்.

அதற்குஏற்றார்போல், லீக் ஆட்டங்களிலும், ப்ளே ஆப் சுற்றிலும் அற்புதமான ஆட்டங்களைவெளிப்படுத்திய சென்னை அணி இறுதிப்போட்டிக்கு தகுதி பெற்றது. மும்பையில் நேற்று நடந்த இறுதிஆட்டத்தில், சன்ரைசர்ஸ் ஹைதராபாத் அணியை எதிர்கொண்டது சென்னை சூப்பர் கிங்ஸ் அணி.

முதலில் பேட் செய்த சன்ரைசர்ஸ் அணி 20 ஓவர்களில் 6 விக்கெட் இழப்புக்கு 178 ரன்கள் சேர்த்தது. 179 ரன்களைத் துரத்திய சென்னை சூப்பர் கிங்ஸ் அணி வாட்ஸனின் அபாராமான சதத்தால் 18.3 ஓவர்களில் 2 விக்கெட்டுகளை மட்டும் இழந்து இலக்கை அடைந்து சாம்பியன் பட்டத்தைக் கைப்பற்றியது.

இறுதி ஆட்டத்தில் தொடக்கத்தில் மந்தமான ஆட்டத்தை வெளிப்படுத்திய வாட்ஸன், முதல் 10 பந்துகளைச் சந்தித்து ஒரு ரன்னை எடுத்தார், ஆனால், அடுத்த 41 பந்துகளில் காட்டடி அடித்து சதத்தை நிறைவு செய்தார். இவரின் மிரட்டலான பேட்டிங் சென்னை அணிக்கு எளிதான வெற்றியைப் பெற்றுக்கொடுத்தது.

ஷேன் வாட்ஸனின் ஆட்டத்த கேப்டன் தோனி நேற்று வெகுவாகப் புகழ்ந்தார். இன்ஸ்ட்ராகிராமில் கையில் வெற்றிக் கோப்பையையும், தனது மகள் ஜிவாவையும் ஏந்திக்கொண்டு தோனி தனது மனைவி சாக்ஸியுடன் புகைப்படத்தை வெளியிட்டார். அதில் வாட்ஸனுக்கு புதுப்பெயரை செல்லாகச் சூட்டியுள்ளார்.

தோனி அதில் குறிப்பிடுகையில், சென்னை சூப்பர் கிங்ஸ் அணிக்கு ஆதரவளித்த ஒவ்வொருவருக்கும் நன்றி. மும்பை இன்று மஞ்சள்நிறத்தில் மாறி எங்களுக்கு ஆதரவு கொடுத்தமைக்கும் நன்றி. ஷேன் ”ஷாக்கிங்” வாட்ஸன் அனைவருக்கும் இன்பஅதிர்ச்சி தரக்கூடிய இன்னிங்ஸை விளையாடியிருக்கிறார். இந்த சீசன் மிக இனிமையாக முடிந்தது எனத் தெரிவித்துள்ளார்.

ஆஸ்திரேலிய வீரர் ஷேன் வாட்ஸனுக்கு , ஷேன் ஷாக்கிங் வாட்ஸன் என தோனி சூட்டியுள்ளதை வாட்ஸனும் வரவேற்றுள்ளார். 15 போட்டிகளில் விளையாடிய வாட்ஸன் 2 சதம், 2 அரைசதம் உள்ளிட்ட 555 ரன்கள் சேர்த்தார்.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
சிஎஸ்கே சாம்பியன்: தோனியின் புதிய சாதனைகள், அதிக சிக்ஸர் விளாசிய அணி- சுவாரஸ்யமான 10 தகவல்கள்

11-வது ஐபிஎல் போட்டியில் சாம்பியன் பட்டம் வென்றுள்ள சென்னை சூப்பர் கிங்ஸ் அணியின் கேப்டன் தோனி குறித்தும், இறுதிப்போட்டியில் படைக்கப்பட்ட சாதனைகள் குறித்தும் பல்வேறு ருசிகரமான தகவல்கள் வெளியாகியுள்ளன.

மும்பையில் நேற்று நடந்த இறுதிஆட்டத்தில், சன்ரைசர்ஸ் ஹைதராபாத் அணியை எதிர்கொண்டது சென்னை சூப்பர் கிங்ஸ் அணி.

முதலில் பேட் செய்த சன்ரைசர்ஸ் அணி 20 ஓவர்களில் 6 விக்கெட் இழப்புக்கு 178 ரன்கள் சேர்த்தது. 179 ரன்களைத் துரத்திய சென்னை சூப்பர் கிங்ஸ் அணி வாட்ஸனின் அபாரமான சதத்தால் 18.3 ஓவர்களில் 2 விக்கெட்டுகளை மட்டும் இழந்து இலக்கை அடைந்து சாம்பியன் பட்டத்தைக் கைப்பற்றியது. இறுதி ஆட்டத்தில் படைக்கப்பட்ட சில முக்கிய சாதனைகள்.

1. 11-வது ஐபிஎல் சீசனில் சன் ரைசர்ஸ் அணியின் கேப்டன் வில்லியம்ஸன் 735 ரன்கள் சேர்த்து ஆரஞ்சு தொப்பியை வென்றார். ஒரே போட்டியில் அதிகமான ரன்கள் சேர்த்தவர்கள் பட்டியில் இதுவரை 2 வீரர்கள் மட்டுமே உள்ளனர். 2016-ம் ஆண்டு ஐபிஎல் போட்டியில் விராட் கோலி 973 ரன்களும், டேவிட் வார்னர் 848 ரன்களும் சேர்த்தனர்.

2. இறுதிப்போட்டியில் சன்ரைசர்ஸ் பந்துவீச்சாளர் புவனேஷ்குமார் 10 டாட்பால்களை வீசினார். இறுதிப்போட்டியில் அதிகமான டாட் பந்துகளை வீசிய பட்டியலில் புவனேஷ் குமார் இணைந்தார். இதற்கு முன் கடந்த 2010-ம் ஆண்டு ஐபிஎல் இறுதிப்போட்டியில் மும்பை அணியில் இடம் பெற்ற இலங்கை வீரர் தில்ஹாரா பெர்ணான்டோ சிஎஸ்கே அணிக்கு எதிராக 10 டாட் பந்துகளை வீசினார்.

3. இறுதிப்போட்டியில் சதம் அடித்த ஒரே அணி வீரர்கள் சிஎஸ்கே அணியில் இடம் பெற்றுள்ளனர். கடந்த 2014-ம் ஆண்டு இறுதிப்போட்டியில் கொல்கத்தா அணிக்கு எதிராக சுரேஷ் ரெய்னா சதம் அடித்தார். இந்த போட்டியில் சன்ரைசர்ஸ் அணிக்கு எதிராக வாட்ஸன் சதம் அடித்தார். இருவரும் தற்போது சிஎஸ்கே அணியில் இடம் பெற்றுள்ளனர்.

4. ஒரே ஐபிஎல் சீசனில் அதிகமான சதம் அடித்த வீரர்கள் பட்டியலில் 4-வது வீரராக வாட்ஸன் இணைந்தார். இந்த சீசனில் வாட்ஸன் இருசதங்கள் அடித்தார். இதற்கு முன், 2011-ல் கிறிஸ் கெயில், 2016-ல் விராட் கோலி, 2017-ல் ஹசிம் அம்லா ஆகியோர் ஒரே சீசனில் அதிகமான சதங்கள் அடித்து சாதனை புரிந்திருந்தனர்.

5. டி20 இறுதிப்போட்டியில் முதலில் பேட் செய்த அல்லது சேஸிங் செய்த அணிகளில் இடம் பெற்று அதிகமான ரன் குவித்த 2-வது வீரர் எனும் பெருமையை ஷேன் வாட்ஸன்(117ரன்கள்) பெற்றார். இதற்கு முன் பங்களாதேஷ் பிரியமியர் லீக் போட்டியின் இறுதி ஆட்டத்தில் தாகா டைனமைட்ஸ் அணிக்கு எதிராக ராங்பூர் ரைடர்ஸ் அணியில் இடம் பெற்ற கெயில் 146ரன்கள் சேர்த்ததே அதிகபட்சமாக இருக்கிறது. வாட்ஸன் தற்போது சேர்த்த 117 ரன்கள் 2-வதாகும்.

6. ஐபிஎல் இறுதிப்போட்டியில் எந்த அணியில் இடம் பெற்ற வீரரும், சேஸிங்கின் போது, 50 ரன்களுக்கு மேல் சேர்க்கும்போது அதிகமான ஸ்டிரைக் ரேட் வைத்ததில் வாட்ஸன் முதலிடம் பெறுகிறார். வாட்ஸனின் 57 பந்துகளில் 117 ரன்கள் சேர்த்தார். இவரின் ஸ்டிரைக் ரேட் 205.27 ஆகும். 2016-ம் ஆண்டு இறுதிஆட்டத்தில் சன்ரைசர்ஸ் அணிக்கு எதிரான ஆட்டத்தில் பெங்களூரு அணியில் இடம் பெற்றிருந்த கெயில் 38 பந்துகளில் 76 ரன்கள் சேர்த்தார். அப்போது அவரின் ஸ்டிரைக் ரேட் 200 மட்டுமே இருந்தது.

7. 11-வது ஐபிஎல் சீசனில் அதிகமான சிக்ஸர் அடித்த அணிகளில் சென்னை சூப்பர் கிங்ஸ் அணி முதலிடம் பெற்றது. 145 சிக்ஸர்களை சிஎஸ்கே அணி வீரர்கள் அடித்துள்ளனர். ஒரே சீசனில், ஒரே அணியால் அடிக்கப்பட்ட அதிகமான சிக்ஸர்களும் இதுவாகும். இதற்குமுன் கடந்த 2016-ம் ஆண்டு பெங்களூரு அணி 142 சிக்ஸர்கள் அடித்திருந்ததே அதிகபட்சமாக இருந்தது.

8. ஒரே சீசனில் ஒரு அணியை 4 முறை தோற்கடித்த அணி என்ற பெருமையை சிஎஸ்கே அணி பெற்றது. அதாவது, சன்ரைசர்ஸ் அணியை இந்த சீசனில் லீக் சுற்றில் 2முறையும், ப்ளே ஆப்ஃபில் ஒரு முறையும், இறுதிப்போட்டியில் ஒருமுறையும் என 4 முறை சிஎஸ்கே அணி தோற்கடித்தது.

9. ஐபிஎல் போட்டியில் ஒரே அணிக்கு அதிகமான கோப்பைகளை பெற்றுக்கொடுத்த கேப்டன்களில் சிஎஸ்கே அணியின் கேப்டன் தோனிக்கே முதலிடம். சிஎஸ்கே அணி வென்ற 3 சாம்பியன்களும் தோனியின் தலைமையில்தான் கைப்பற்றப்பட்டதாகும்.

10. அதிகமான டி20 போட்டிகளில் கோப்பையை வென்று கொடுத்த கேப்டன்களில் தோனிக்குத்தான் முதலிடம். இதுவரை, தோனி தலைமையில் 7 வகையான டி20 போட்டிகளில் சாம்பியன் பட்டம் வெல்லப்பட்டுள்ளது. தோனி தலைமையில் 3 ஐபிஎல் போட்டிகளில் சாம்பியன் பட்டம், 2 முறை சாம்பின்லீக் டி20 போட்டியில் கோப்பை, ஒரு டி20 உலகக்கோப்பையில் மகுடம், ஆசியக் கோப்பை டி20 போட்டியில் வாகை சூடப்பட்டுள்ளது.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
உலகக்கோப்பைக் கால்பந்து: ரஷ்யா அபாரத் தொடக்கம்; சவுதி அரேபியாவை நொறுக்கியது

z-russia afp.jpg

உலகக்கோப்பைக் கால்பந்து மாஸ்கோவில் நேற்று ரஷ்யாவின் 5-0 கோல் வெற்றியுடன் அபாரமாகத் தொடங்கியது. சவுதி அரேபியா அணியை நொறுக்கி குரூப் ஏ-வில் மிகப்பெரிய வெற்றியைப் பெற்றது ரஷ்யா.

ரஷ்யாவிலேயே பலரும் இந்தப் போட்டி பெரிய தர்மசங்கடமாகப் போயிருக்கும் என்றே நினைத்தனர் ஆனால் ஸ்டானிஸ்லாவ் செர்சிசோவ் அணிக்கு நேற்று ஒரு அருமையான இரவாக அமைந்தது.

ரஷ்ய அணிக்காக காஸின்ஸ்கி 12வது நிமிடத்திலும் பதிலி வீரர் செரிஷேவ் 43 மற்றும் 90வது நிமிடங்களில் இரண்டு ஸ்டன்னிங் கோல்களையும் அடிக்க 71வது நிமிடத்தில் ஸையுபா ஒரு கோலையும் கடைசியில் விசில் ஊதுவதற்கு முன்னதாக கோலோவின் அழகாக ஒரு கோலையும் அடிக்க சவுதி மூழ்கியது.

ஹங்கேரியை 1986-ம் ஆண்டு உலகக்கோப்பையில் 6-0 என்று வென்ற பிறகு இதுதான் உலகக்கோப்பையில் ரஷ்யாவுக்கு பெரிய வெற்றியாக அமைந்தது. 2010-ல் தென் ஆப்பிரிக்காவில் நடைபெற்ற உலகக்கோப்பையில்தான் போட்டியை நடத்தும் நாடு குரூப் மட்டத்திலிருந்து நாக் அவுட் சுற்றுக்குத் தகுதி பெறாமல் போயுள்ளது, இம்முறை ரஷ்ய அணி தங்கள் மீதுள்ள சந்தேகங்கள் அனைத்தையும் தீர்த்து வைத்துள்ளது. இன்னும் இந்தப் பிரிவில் எகிப்து, உருகுவே ஆகிய அணிகளை வீழ்த்தி குரூப் ஏ-வில் முன்னிலை வகிக்கும் என்ற நம்பிக்கைப் பிறந்துள்ளது.

தொடக்கத்தில் சவுதி அரேபியா ரஷ்யப் பகுதிக்குள் இடதுபுறத்திலிருந்து நுழைந்து பெரிய தொல்லைகளைக் கொடுத்தது, ஆனால் 12வது நிமிடத்தில் சவுதி அரேபியா கோல் அருகே வந்த ரஷ்ய முன்கள வீரர் கோலை நோக்கி அடித்த ஷாட் சவுதி வீரர் காலில் பட்டு வெளியே செல்ல கார்னர் வாய்ப்பு கிடைத்தது. இடது புறத்திலிருந்து கோலோவின் உள்ளே வரும் அருமையான கிராஸ் அடிக்க இயூரி காஸின்ஸ்கி முதல் கோலை அடித்தார்.

22வது நிமிடத்தில் ஆலன் ஸாகோயேவ் என்ற ரஷ்ய வீரர் காயம் காரணமாக வெளியேறியது அந்த அணிக்கு ஒரு அடி என்று கூறப்படுகிறது, ஆனால் அவர் வெளியேற்றம் ரஷ்ய கோல் மழையைத் தடுக்கவில்லை.

இடைவேளைக்கு முன்னதாக டெனிஸ் செரிஷேவ் இன்னொரு கோலை அடிக்க 71வது நிமிடத்தில் ஆர்டெம் சையுபா ஒரு கோலையும் பிறகு மீண்டும் டெனிஸ் செரிஷேவ் 90வது நிமிடத்தில் ஒரு கோலையும் கடைசியில் ஸ்டாப்பேஜ் நேரத்தில் கோலோவின் ஒரு கோலையும் அடிக்க 5-0 என்று சவுதி நொறுங்கியது.

டெனிஸ் செரிஷேவ் பெஞ்சிலிருந்து வந்து அபாரமாக ஆடி 2 கோல்களை அடித்தார். அதுவும் 90வது நிமிடத்தில் அடித்த கோல் அருமையாகத் தூக்கி விடப்பட்ட ஒரு வளைந்த ஷாட் ஆகும். இடது கால்வண்ணத்தில் வந்த இந்த கோல் நிச்சயம் மீண்டும் மீண்டும் போட்டுக் காட்டப்படும். ஸகோயேவ் என்ற திறமையான நடுக்கள வீரர் காயமடைந்து வெளியேறியவுடன் இறக்கபப்ட்ட டெனிஸ் செரிஷேவ் ஆடிய ஆட்டத்தினால் கோலோவின் மையத்தில் இன்னும் தாக்குதல் ஆட்டத்தை ஆட முடிந்தது.

அதுவும் அவர் அடித்த ரஷ்யாவின் 2வது கோல் அபாரமானது. ரஷ்ய நடுக்கள வீரர் ரோமன் சோப்னினுக்கு பந்தை எடுத்துச் செல்லவாகான நிலையை கோலோவின் ஏற்படுத்திக் கொடுக்க ஸோப்னின் செரிஷேவுக்கு ஒரு ஸ்கொயர் பாஸ் செய்தார் .இதனையடுத்து சவுதி அரேபியா தடுப்பாட்ட வீரர்கள் ஒசாமா ஹவ்சாவி மற்றும் மொகமத் அல் புராய்க் ஆகியோர் அரக்கப் பரக்க தங்கள் இடத்தை விட்டு நகர்ந்து ரஷ்ய வீரர்களை நோக்கி வந்து செரிஷேவைத் தடுக்கப் பார்த்தனர் அப்போது கோல் அடிப்பது போல் பாசாங்கு காட்டி தடுக்க வந்தவர்களைக் குழப்பி விட்டு பிறகு பந்தை இடது காலால் கோலுக்குள் திணித்தது, காயமடைந்த வீரருக்குப் பதிலாக செரிஷேவ் களம் புகுந்தது மறைமுக ஆசிர்வாதமே என்பதை உணர்த்தியது.

71வது நிமிடத்தில் ஆர்டெம் ஸையுபாவை சவுதி வீரர்கள் மார்க் செய்யவில்லை விளைவு தனக்கு வந்த கிராஸை அருமையாக முட்டி கோலுக்குள் செலுத்தினார், சவுதி அரேபியாவுக்கு அனைத்தும் முடிந்தது, ஆனால் ரஷ்யாவுக்கு முடியவில்லை, மீண்டும் செரிஷேவ் வெகுவேகமாக உள்ளே வந்து நிபுணர் போன்று பந்தை கோலுக்குள் செலுத்தினார், 4-0 பிறகு கோலோவின் காய நேரத்தில் ஒரு வளைந்த ஃப்ரீகிக்கை கோலுக்குள் செலுத்த 5-0 என்று சவுதியை நொறுக்கியது.

சவுதி அரேபியா ஒரு விட்டுக்கொடுக்கும் எதிரணி என்று அவர்கள் ஆட்டத்தில் தெரிந்தது. இல்லையெனில் 61% பந்தைத் தங்கள் பிடியில் வைத்திருந்த ஒரு அணி 5 கோல்களை வாங்கியிருக்காது. காரணம் பாஸ் செய்வதில் எந்த ஒரு குறிக்கோளும் முனைப்பும் இல்லை.

யாசர் அல் ஷாரனி இடது புறத்தில் கொஞ்சம் வேகம் காட்டினார். ஆனால் கோலை நோக்கி ஒரு ஷாட் கூட சவுதி அடிக்கவில்லை. ஆரம்பத்தில் கிடைத்த ஒரு வாய்ப்பையும் கோட்டை விட்டனர், அணியில் அனைவரும் மத்திய கிழக்குப் பகுதியைச் சேர்ந்தவர்கள் என்பதால் உயர்மட்ட கால்பந்து ஆட்டத்திற்கான அவர்களது தயாரிப்பு போதாமையாக இருந்தது.

அடுத்த செவ்வாயன்று எகிப்துடன் ரஷ்யா மோதுகிறது. சவுதிக்கு மேலும் கஷ்டம்தான் உருகுவேயை அடுத்தப் போட்டியில் சந்திக்கிறது.

ஆட்டத்தைப் பற்றி சவுதி பயிற்சியாளர் யுவான் ஆண்டனியோ பிஸ்ஸி கூறுவது சவுதி ஆட்டத்தின் ஒரு ரத்தினச் சுருக்க வர்ணனையாகும்: “பெரிய அளவில் ரஷ்யா வென்றுள்ளது ஆனால் அதற்காக அவர்கள் பாடுபடவில்லை. எங்களது மோசமான ஆட்டம் முடிவில் பிரதிபலித்துள்ளது” என்றார். அதாவது ரஷ்யா அபாரமாக ஆடிவிடவில்லை, எங்கள் மோசமான ஆட்டம் அந்த அணியின் ஆட்டத்தை உயர்த்திக் காட்டியுள்ளது என்ற தொனியில் கூறுகிறார். இவர் இவ்வாறு கூறுவதற்கான தகுதி உடையவர்தான் ஏனெனில் ஸ்பெயின் அணிக்காக 4 ஆண்டுகள் தொழில்பூர்வ கால்பந்தாட்டத்தை ஆடியவர் பிஸ்ஸி.

தமிழ் ஹிந்து
 

Sriramajayam

Supreme Ruler's of Penmai
Registered User
Blogger
Joined
Sep 19, 2012
Messages
96,965
Likes
140,861
Location
Madras @ சென்னை
சதம் விளாசி சாதனை படைத்தார் தவண்

ஆப்கானிஸ்தானுக்கு எதிரான டெஸ்ட் போட்டியில் மதிய உணவு இடைவேளைக்கு முன்னதாக சதம் விளாசி சாதனை படைத்தார் ஷிகர் தவண். முதல் நாளில் இந்திய அணி 6 விக்கெட்கள் இழப்புக்கு 347 ரன்கள் குவித்தது.

இந்தியா - ஆப்கானிஸ்தான் அணிகள் இடையிலான வரலாற்று சிறப்பு வாய்ந்த டெஸ்ட் போட்டி பெங்களூரு சின்னசாமி கிரிக்கெட் மைதானத்தில் நேற்று தொடங்கியது. டாஸ் வென்று முதலில் பேட் செய்த இந்திய அணிக்கு ஷிகர் தவண், முரளி விஜய் ஜோடி அற்புதமான தொடக்கம் கொடுத்தது.

அதிரடியாக விளையாடிய ஷிகர் தவண் 87 பந்துகளில், 3 சிக்ஸர்கள், 18 பவுண்டரிகளுடன் சதம் விளாசினார். மதிய உணவு இடைவேளையில் இந்திய அணி 27 ஓவர்களில் விக்கெட் இழப்பின்றி 158 ரன்கள் எடுத்தது. ஷிகர் தவண் 104, முரளி விஜய் 41 ரன்களுடன் ஆட்டமிழக்காமல் இருந்தனர். இதன் மூலம் முதல் நாளில் மதிய உணவு இடைவேளைக்கு முன்னதாக சதம் அடித்த முதல் இந்திய வீரர் என்ற பெருமையையும், உலக அளவில் 6-வது வீரர் என்ற சாதனையை யும் படைத்தார் ஷிகர் தவண். சேவக் கடைசியாக 2006-ம் ஆண்டு மேற்கிந்தியத் தீவுகளுக்கு எதிராக மதிய உணவு இடைவேளைக்கு முன்னதாக 99 ரன்கள் எடுத்திருந்ததே இந்திய வீரர்களில் அதிகபட்ச சாதனையாக இருந்தது.

உணவு இடைவேளைக்கு பிறகு தொடர்ந்து விளையாடிய ஷிகர் தவண் மேற்கொண்டு 3 ரன்கள் எடுத்த நிலையில் யாமின் அகமதுஸாய் பந்தில், சிலிப் திசையில் முகமது நபியிடம் கேட்ச் கொடுத்து ஆட்டமிழந்தார். ஷிகர் தவண் 96 பந்துகளில் 107 ரன்கள் சேர்த்தார். முதல் விக்கெட்டுக்கு முரளி விஜய்யுடன் இணைந்து 168 ரன்கள் குவித்தார். இதையடுத்து கே.எல்.ராகுல் களமிறங்கினார். 45 ஓவர்களில் இந்திய அணி 248 ரன்கள் சேர்த்திருந்த போது மழையால் ஆட்டம் தடை பட்டது. சுமார் ஒருமணி நேரத்துக்குப் பிறகு ஆட்டம் தொடங்கப்பட்ட நிலை யில் மீண்டும் மழை இடையூறு செய்தது.

இதைத் தொடர்ந்து 40 நிமிடங்களுக்குப் பிறகு மீண்டும் ஆட்டம் தொடங்கிய நிலையில் சீராக ரன்கள் சேர்த்த முரளி விஜய் 143 பந்துகளில், ஒரு சிக்ஸர், 15 பவுண்டரிகளுடன் தனது 12-வது சதத்தை அடித்தார். சிறப்பாக விளையாடி வந்த அவர் 153 பந்துகளில் 105 ரன்கள் எடுத்த நிலையில் வாஃபாதர் பந்தில் எல்பிடபிள்யூ ஆனார். அவரைத் தொடர்ந்து கே.எல்.ராகுல் யாமின் அகமதுஸாய் பந்தில் போல்டானார். கே.எல்.ராகுல் 64 பந்துகளில், 8 பவுண்டரிகளுடன் 54 ரன்கள் எடுத்தார்.

இதைத் தொடர்ந்து கேப்டன் அஜிங்க்ய ரஹானே (10), ரஷித் கான் பந்தில் எல்பிடபிள்யூ முறையிலும், தினேஷ் கார்த்திக் (4), ரன் அவுட் முறையிலும் ஆட்டமிழந்தனர். 35 ரன்கள் எடுத்த நிலையில் புஜாரா, முஜீப் உர் ரஹ்மான் பந்தில் தனது விக்கெட்டை பறிகொடுத்தார். முதல் நாள் ஆட்டத்தின் முடிவில் இந்திய அணி 78 ஓவர்களில், 6 விக்கெட்கள் இழப்புக்கு 347 ரன்கள் எடுத்தது. ஹர்திக் பாண்டியா 10, அஸ்வின் 7 ரன்களுடன் களத்தில் இருந்தனர். ஆப்கானிஸ்தான் தரப்பில் யாமின் அகமதுஸாய் 2 விக்கெட்களும் ரஷித் கான், முஜீப் உர் ரஹ்மான், வாஃபாதர் ஆகியோர் தலா ஒரு விக்கெட்டும் கைப்பற்றினர். இந்திய அணி தனது கடைசி 5 விக்கெட்களை 56 ரன்களுக்கு பறிகொடுத்திருந்தது.

தமிழ் ஹிந்து
 

Similar threads

Important Announcements!

Type in Tamil

Click here to go to Google transliteration page. Type there in Tamil and copy and paste it.